2020 ވަނަ އަހަރުގެ ޕަބްލިކް ސެކްޓަރ އިންވެސްޓްމަންޓް ޕްރޮޖެކްޓްތަކުގެ ތެރެއިން އެންމެ ބޮޑު ބަޖެޓެއް ކަނޑައަޅާފައިވާނީ ރަށްރަށުގެ ލަފާފުރުމުގެ މައްސަލައަށް ޙައްލެއް ގެނައުމަށެވެ. އަހަރުތަކެއްކުރިން ރަށްތަށުގައި ޒަމާނީ ލަފާފުރުމުގެ ނިޒާމު ނުވަތަ ބަނދަރު ހެދުމުގެ މަސައްކަތް ކުރިއަށްގެންދިޔަނަމަވެސް، ބަނދަރުތައް އޭރު ހަދާފައިވަނީ ރަށު އަބާދީއަށް ބަލައިގަނެވެ.
ނ.މިލަދޫގެ 300 ފޫޓުގެ ބަނދަރަކީ ރާއްޖޭގެ ރަށްރަށުގައި ހަދާފައިވާ ބަނދަރުތަކަށް ބަލާއިރު، ނިސްބަތުން އެންމެ ކުޑަ އެއް ބަނދަރެވެ. އެރަށުގެ ބަނދަރު ތަރައްޤީކުރުމުގެ މަސައްކަތް ކުރިއަށްގެންގޮސްފައި ވަނީ ރައީސް މައުމޫންގެ ވެރިކަމުގައި 2006 ވަނަ އަހަރުއެވެ. ނަމަވެސް ބަނދަރުގެ މަސައްކަތް މުޅިން ނުނިމި، އެކަމުގެ ފުރިހަމަ މަންފާ ރަށުގެ ރައްޔިތުންނަށް މިއަދާއި ހަމައަށްވެސް ލިބިފައިނުވާކަމަށް މިލަދޫ ރަށު ކައުންސިލުން ވިދާޅުވެއެވެ.
"އޭރު ބަނދަރު ހަދަން ފެށިނަމަވެސް އެއްކޮށް ނުނިމެ. ބޭރު ބޮޑުހިލައިގެ ތޮށިވެސް ނުނިމެ. ވަރަށް މަދުން ތިރިކޮށް ހިލަޖަހާފައި އޮތީ. މޫސުން ގޯސްވާ ދުވަސްވަރު މިކަމުގެ ނޭދެވޭ އަސަރު ވަރަށް ބޮޑަށްކުރޭ. ރިވެޓްމަންޓް އަދި ދޯނިއެހެލާ ސަރަޙައްދުގެ މަސައްކަތްވެސް ނުނިމެ." ނ.މިލަދޫ ކައުންސިލްގެ ރައީސް އިލްޔާސް ޢަބްދުއްޞަމަދު ޕީއެސްއެމްއާއި ވާހަކަދައްކަވަމުން ވިދާޅުވިއެވެ.
އިލްޔާސް ވިދާޅުވީ ބަނދަރު މަރާމާތު ނުކުރެވި، ރަށުގެ ބަނދަރުތެރެއަށް ވެލިވަދެ ބަނދަރުގެ ބޮޑުބައެއް ބޭނުންނުކުރެވޭ ޙާލަތަށް ގޮސްފައިވާކަމަށެވެ. މިކަމުގެ ސަބަބުން ރަށު ބަނދަރުގައި އުޅަނދު އަޅާފައި ބޭއްވުމާއި، އަދި ރަށުގެ އާއްމު ދަތުރުފަތުރުގެ ނިޒާމަށް ވަރަށް ބޮޑަށް ދަތިވެފައިވާކަމަށް އިލްޔާސް ވިދާޅުވިއެވެ.
"ރަށުގައިވެސް މާލެ ދަތުރުކުރާ ބޯޓެއް އޮވޭ. އަދި މުދާ އުފުލާ އިތުރު ދެރަށެއްގެ ބޯޓު އާދޭ. ނަމަވެސް ނެރަށް ވެލިއަރަށް ތިލަވެފައިވުމުގެ ސަބަބުން، ބަނދަރަށް ވަންނަން އުޅުމުގެ ތެރޭގައި ބޯޓު ބީހިގެން، މިހާރު ދެ ބޯޓުވެސް ރަށަށް ނުވަދެ. އަދި މާލެ ދަތުރުކުރާ ދެ ލޯންޗުވެސް ވަދޭ. ނަމަވެސް ބަނދަތުގެ ދަތިކަމުގެ ސަބަބުން ރައްޔިތުންނާއި ގުޅުންހުރި މި އާއްމު ޚިދުމަތަށް ދަތިވެފައި މިވަނީ." އިލްޔާސް ވިދާޅުވިއެވެ..
މިލަދޫއަށް ދިމާވެފައިވާ ލަފާ ފުރުމުގެ ދަތިކަމަށް ހައްލެއް ގެނައުމުގެ މަސައްކަތް ރައީސް އިބްރާހިމް މުހައްމަދު ޞާލިހުގެ ސަރުކާރުން މިހާރު ވަނީ ފައްޓަވާފައެވެ. އެގޮތުން އެރަށުގެ ބަނދަރު ބޮޑުކުރުމުގެ މަސައްކަތް މިއަހަރުގެ ބަޖެޓުގައި ސަރުކާރުން ހިމަނައި، އެ މަސައްކަތް މިހާރު ވަނީ ފަށާފައެވެ. މިހާރުގެ ބަނދަރާއި ގުޅާލާގޮތަށް، އެރަށު ބަނދަރަށް 500 ފޫޓު އިތުރުކުރުމުގެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީއާއެވެ. މި މަސައްކަތުގެ ދަށުން ބަނދަރުގެ ބަންދުވޯލް ޖަހައި، ފުންކުރުމުގެ މަސައްކަތް ދަނީ ކުރަމުންނެވެ.
މި ޕްރޮޖެކްޓްގައި 500 ފޫޓުގެ އެއްގަމު ތޮށި ލުމާއި، ބޭރު ހިލަތޮށި ޖެހުމާއި، ނެރުހެދުމާއި، ބަނދަރުގައި ޕޭވްމަންޓްހެދުމާއި ލައިޓްޖެހުން ހިމެނެއެވެ. އަދި ބޮޑެތި ބާޖުތައް ކައިރި ކުރެވޭގޮތަށް ރޭމްޕްލުން ހިމެނެއެވެ. މިލަދޫގެ ބަނދަރު އަންނަ އަހަރުގެ މޭ މަހުގެ ނިޔަލަށް ނިންމާލެވޭނެކަމަށް އެމްޓީސީސީން މަޢުލޫމާތުދެއެވެ.
ކައުންސިލުން މަޢުލޫމާތުދޭ ގޮތުގައި، އަލަށް ހަދާ ބަނދަރުގެ މަސައްކަތް ނިމި ބޭނުންކުރަން ފެށުމުން، މިހާރު ބޭނުންކުރަމުންދާ ބަނދަރު މަރާމާތުކުރުމުގެ މަސައްކަތް ކުރިއަށްގެންދިއުމަށް ވަނީ ހަމަޖެހިފައެވެ.
މިލަދޫ ބަނދަރު ބޮޑުކުރުމުގެ މަސައްކަތް ސަރުކާރުން ކުރިއަށްގެންދަވާއިރު، މިއީ ދައުލަތުގެ ބަޖެޓުން 42 މިލިއަން ރުފިޔާ ޚަރަދުކުރައްވާ ތަރައްޤީގެ މަޝްރޫޢުއެކެވެ.