ޚިދުމަތް ރަނގަޅުކޮށް ތެލަސީމިއާ ސެންޓަރަކީ ތެލަސީމިއާ ކުދިންނާ ގާތް ތަނަކަށް ހަދައިދޭނަން: ހެލްތު މިނިސްޓަރ
ތެލެސީމިއާ ސެންޓަރަކީ ތެލަސީމިއާ ކުދިންނާ ގާތް ތަނަކަށް ހައްދަވައިދެއްވާނެކަމަށް މިނިސްޓަރ އޮފް ހެލްތު އަޙްމަދު ނަސީމް ވިދާޅުވެއްޖެއެވެ.
ހެލްތު މިނިސްޓަރ ނަސީމް މިހެން ވިދާޅުވީ ބައެއް ތެލަސީމިއާ ކުދިންނާއި އެކުދިންގެ ބެލެނިވެރިންނާ ބައްދަލުކުރައްވާ ދެއްކެވި ވާހަކަފުޅުގައެވެ. ހެލްތު މިނިސްޓަރާއި ބައްދަލުކޮށް ތެލެސީމިއާ ކުދިންވަނީ އެކުދިންނަށް ދިމާވެފައިވާ ބައެއް ދަތިތަކަށް ޙައްލު ނުލިބި ގިނަ ދުވަސްވެފައިވާތީ އެކަންކަން ހިއްސާކޮށްފައެވެ. އަދި ތެލަސީމިއާ ސެންޓަރާއި ގުޅޭގޮތުން ތެލަސީމިއާ ކުދިންގެ ހުރި ކަންބޮޑުވުން މިނިސްޓަރާ ހިއްސާކުރައްވާފައިވާއިރު މިނިސްޓަރ އަޙްމަދު ނަސީމް ވަނީ އެ ސެންޓަރަކީ ކުދިންނާއި ގާތް ރައްޓެހި ތަނެއްގެ އިޙްސާސްކުރެވޭ ފަދަ ތަނަކަށް ހައްދަވާނެކަމުގެ ޔަޤީންކަން ތެލަސީމިއާ ކުދިންނަށް އަރުވާފައެވެ.
ރާއްޖޭގައި ހަސަތޭކައަށްވުރެ ގިނަ ތެލަސީމިއާ ކުދިން ތިބިކަމަށް ރާއްޖޭގެ ތެލަސީމިއާ ސެންޓަރ، މޯލްޑިވިއަން ބްލަޑް ސަރވިސްއިން ވިދާޅުވެއެވެ. މީގެ ތެރެއިން 360 ކުދިންނަކީ މާލޭގައި ދިރިއުޅޭ ކުދިންނަށްވާއިރު އެކުދިން ޚިދުމަތް ހޯދަމުން އަންނަނީ ތެލަސީމިއާ ސެންޓަރުންނެވެ. ޤާނޫނަކާއެކު ތެލަސީމިއާ ސެންޓަރުގެ މަސައްކަތް ހަރުދަނާކުރުމަށް މަސައްކަތްތަކެއް ކުރަމުން އައިނަމަވެސް ޤާނޫނުގައި ތެލަސީމިއާ ކުދިންނަށް ލިބެންޖެހޭ ފަރުވާގެ ބައެއް ކަންކަން އަދިވެސް ފުރިހަމަ ނުކުރެވިހުރިކަމުގެ ޝަކުވާވަނީ އިތުރުވެފައެވެ.
ތެލަސީމިއާ ކުދިންނަކީ އެހެން ކުދިންފަދައިން ކަންކަމުގައި ބައިވެރިވުމުގެ ފުރުސަތު އޮންނަ ބަޔަކަށް ހެދުމަށް ސަރުކާރުން ދަނީ މަސައްކަތްކުރަމުންނެވެ. އަދި ކުރިއާ ޚިލާފަށް މުޖުތަމަޢު ތެރެއިން މިކަމުގައި ބަދަލުތަކެއް ފެންނަމުންދާކަންވެސް ތެލެސީމިއާ ތަހައްމަލްކުރާ ބައެއް ކުދިން ފާހަގަކުރެއެވެ. އެކުދިންގެ އެންމެ ބޮޑު ޝަކުވާއަކީ އެކަށީގެންވާ ފަރުވާއާއި ނަފްސާނީ ގޮތުން މީހާ ބަލިކަށިކުރާ މިފަދަ ބައްޔަކާ ހަނގުރާމަކުރާއިރު އެކުދިންނަށް ބޭނުންވާ ސައިކޯސޯޝަލް ސަޕޯޓް ފަދަ އަސާސީ ޚިދުމަތްތައް ރަނގަޅު ފެންވަރުގައި އަދިވެސް ލިބެން ނުހުންނަކަމެވެ. އަދި ލޭ އެޅުމާއި ލޭ ހޯދުމަށް ހުރި ގޮންޖެހުންތައް ކުޑަކޮށް ހަމަޖެހޭ ދިރިއުޅުމެއް ލިބިގަތުމަށް އެކުދިންވަނީ ސަރުކާރާއި ޢާއްމުންގެ އެހީ ބޭނުންވާކަން ފާހަގަކޮށްފައެވެ.