އަންހެނުންނަށް ކުރާ އަނިޔާ އާއި ދެކޮޅަށް ބައިނަލް އަޤުވާމީ ގޮތުން ފާހަގަކުރާ ދުވަހާއި ގުޅުވައިގެން ބީއެމްއެލް އިން ފެމިލީ ލީގަލް ކްލިނިކް( އެފްއެލްސީ)އަށް 50،000 ރުފިޔާ ހަދިޔާކޮށްފިއެވެ.
ބީއެމްއެލްއިން ވިދާޅުވީ، މިއީ އެ ޖަމިއްޔާގެ ފަރާތުން ކުރިޔަށް ގެންދާ ލީގަލް އެއިޑް ޕްރޮގްރާމުގެ ދަށުން ގާނޫނީ ލަފާ ބޭނުންވާ ފަރާތްތަކަށް އެހީވުމަށާއި އާންމުން ހޭލުންތެރިކުރުވުމުގެ ގޮތުން ބާއްވާ ހަރަކާތްތަކަށް އެހީތެރިވުމުގެ ގޮތުން ދެވުނު މާލީ އެހީއެއް ކަމަށެވެ.
މިއަދު ހެނދުނު ބީއެމްއެލްގެ ހެޑް އޮފީހުގައި ބޭއްވުނު ކުޑަ ހަފްލާއެއްގައި އެޖަމިއްޔާ އާއި މި އެހީ ހަވާލުކޮށްދެއްވީ ބޭންކުގެ ސީއީއޯ އަދި މެނޭޖިންގ ޑައިރެކްޓަރ ޓިމް ސޯޔަރއެވެ. އެ ޖަމިއްޔާގެ ފަރާތުން މިއެހީ އާއި ހަވާލުވެވަޑައިގެންނެވީ ކޯ ޗެއަރޕާސަން ޝަފީޢާ ރިޟާ އެވެ. އަންހެނުން ކުރިމަތިވާ އަނިޔާ އާ ދެކޮޅަށް ފެމިލީ ލީގަލް ކްލިނިކްގެ ފަރާތުން މެދުކެނޑުމެއް ނެތި މިވޭތުވެދިޔަ ހަ އަހަރު ކުރައްވަމުން ގެންދަވާ މަސައްކަތައް ފާހަގަކުރައްވައި ޓިމް ވަނީ ޝުކުރު އަދާކުރައްވާފައެވެ.
ފެމިލީ ލީގަލް ކްލިނިކުން މި އެހީ ބޭނުން ކުރަން ހަމަޖެހިފައި ވަނީ ގާނޫނީ އެހީ ހިލޭ ބޭނުންވާ ފަރާތްތަކަށް މި ޚިދުމަތް ފޯރުކޮށްދިނުމަށާއި، އެ ޖަމިއްޔާއިން ކުރަމުންދާ ގާނޫނީ އެހީ އާ ގުޅޭ މައުލޫމާތު ވީހާވެސް ބޮޑަށް އާންމުންނާއި ހަމަޔަށް ފޯރުކޮށްދިނުމަށް ކުރަމުންދާ މަސައްކަތަށެވެ. އަދި މީގެ އިތުރުން އެ ޖަމިއްޔާއިން ހިންގާ ލީގަލް އެއިޑް ޕްރޮގްރާމްގެ ތަފާސް ހިސާބުތައް ބެލެހެއްޓުމަށްވެސް މި އެހީ ބޭނުންކުރެވިގެންދާނެއެވެ.