ރާއްޖޭގެ އިޤްތިސާދު ކުރިއަރުވައި އާރާސްތުކުރުމަށް އަންނަ އަހަރުތެރޭ ބިޔަ ބޮޑެތި މަޝްރޫޢޫތަކެއް ކުރިއަށްގެންދިޔުމަށް ސަރުކާރުންދަނީ ތައްޔާރުވަމުންނެވެ. މިމަޝްރޫޢުތަކާއެކު އަންނައަހަރު ވެގެންދާނީ އިޤްތިސާދީގޮތުންވެސް ރާއްޖެއަށް ތާރީޚީ އަހަރަކަށެވެ.
ގުޅީފަޅުގައި ތަރައްޤީކުރާ ޕޯޓާއި، ގްރޭޓަރ މާލެ ކަނެކްޓިވިޓީ ބްރިޖުގެ މަޝްރޫޢަކީ މިގޮތުން އެންމެ ފާހަގަކޮށްލެވޭ މަޝްރޫޢުތަކެވެ. މިއީ މާލެ ސަރަޙައްދުގައި ކުރިއަށްދާނެ މަޝްރޫޢުތަކެވެ. ސަރުކާރުން ވަނީ މާލެ ސަރަޙައްދުގެ އިތުރުން ތަރައްޤީގެ މަޝްރޫޢުތައް މުޅި ރާއްޖޭގައި ކުރިއަށްގެންދިޔުމަށް ނިންމާފައެވެ.
ޕީއެސްއެމް ނިއުސްއިން ގެނެސްދޭ ދައުލަތުގެ ބަޖެޓު 2021، ޕްރޮގްރާމުގައި ވާހަކަދައްކަވަމުން މިނިސްޓަރ އޮފް ސްޓޭޓް ފޮރ އިކޮނޮމިކް ޑިވެލޮޕްމަންޓް، މުޙައްމަދު އިއާދު ހަމީދު ވަނީ ސަރުކާރުން އަންނަ އަހަރުތެރޭ ކުރިއަށްގެންދިޔުމަށް ހަމަޖެހިފައިވާ ބައެއް މަޝްރޫޢުތަކުގެ ތަފްސީލް ހާމަކުރައްވާފައެވެ.
އަންނަ އަހަރު ވެގެންދާނީ ރާއްޖޭގެ ތާރީޚުގައިވެސް އެއް އަހަރެއްގެތެރޭ ބިޔަ ބޮޑެތި މަޝްރޫޢުތަކެއް އެއްފަހަރާ ފެށިގެންދާ އަހަރަށްގެ ގޮތުގައި ސްޓޭޓް މިނިސްޓަރ އިއާދުވެސްވަނީ ސިފަކުރައްވާފައެވެ. މަޝްރޫޢުތައް ކުރިއަށްގެންދިޔުމުގައި ސަރަޙައްދީ ތަރައްޤީއަށް ޚާއްސަ އިސްކަމެއް ދީފައިވާކަމަށާ އަދި މީގެ ތެރެއިން ގިނަ މަޝްރޫޢުތަކަކީ ބޭރުގެ ލޯނުއެހީގައި ކުރިއަށް ގެންދިޔުމަށް ހަމަޖެހިފައިވާ މަޝްރޫޢުތަކެއްކަން އިއާދު ފާހަގަކުރެއްވިއެވެ.
"ތިލަފުއްޓާއި މާލެއާދެމެދު އަޅާ ބުރިޖުތަކުގެ ބިޔަ މަޝްރޫޢާއި، ގުޅީފަޅު ޕޯޓު މަޝްރޫޢާއި، ލ.ގަމުގައި ޤާއިމްކުރަން ނިންމާފައިވާ ބައިނަލްއަޤްވާމީ ކެންސަރ ހޮސްޕިޓަލާއި، ހަނިމާދޫ އެއަރޕޯޓު، އިންޓަރނޭޝަނަލް އެއަރޕޯޓެއްގެ ގޮތުގައި، ހަޤީޤީ އިންޓަރނޭޝަނަލް އެއަރޕޯޓެއްގެ ގޮތުގައި ތަރައްޤީކުރުމުގެ މަޝްރޫޢާއި އައްޑޫ ގަން އެއަރޕޯޓު ތަރައްޤީކުރުމުގެ މަޝްރޫޢާއި، މިފަދަ ވަރަށް ބޮޑެތި ބިޔަ މަޝްރޫޢުތައް އަންނަ އަހަރު ފެށިގެންދާނެ،" އިއާދު ވިދާޅުވިއެވެ.
އިއާދު ވިދާޅުވީ ސަރުކާރުގެ ސިޔާސަތަކީ ތަރައްޤީ ލާމަރުކަޒުކުރުމުގެ ސިޔާސަތުކަމަށާއި، ތަރައްޤީ ރާއްޖޭގެ އެކި ހިސާބުތަކަށް ބެހިގެންދާނެ ގޮތަށް އިޤްތިސާދީ ތަރައްޤީގެ މަޝްރޫޢުތައް ކުރިއަށްގެންދިޔުން ކަމަށެވެ. އެގޮތުން ފާއިތުވި 2 އަހަރަކީ ރާއްޖޭގެ ތާރީޚުގައިވެސް އެންމެ ގިނަ މަޝްރޫޢުތައް ކުރިއަށްގެންދިޔަ 2 އަހަރުކަން އިއާދުވަނީ ފާހަގަކުރައްވާފައެވެ.
މީގެ އިތުރުން ހަނިމާދޫ އެއަރޕޯޓު ހަޤީޤީ ބައިނައަލްއަޤްވަރުގެ އެއަރޕޯޓަށް ހެދުމަށް އަންނަ އަހަރުތެރޭ ގިނަ މަސައްކަތްތަކެއް ކުރުމަށް ހަމަޖެހިފައިވާ ކަމަށާ، މިއާއެކު 5 ލައްކަ އެއްހައި ފަތުރުވެރިންނަށް މަރުހަބާ ކިޔުމުގެ ޤާބިލްކަން އެއަރޕޯޓުގައި ހުންނޭނޭކަމަށް އިއާދު ވިދާޅުވިއެވެ.
"ހަނިމާދޫ އެއަރޕޯޓު ބައިނަލްއަޤްވާމީ އެއަރޕޯޓެއްގެ ގޮތުގައި ތަރައްޤީކުރުމަށް އެމަޝްރޫޢުވެސް ފެށިގެންދާނެ. މި މަޝްރޫޢުގެ ދަށުން، ހަނިމާދޫގައި 2.2 ކިލޯމީޓަރުގެ ރަންވޭއެއް ޤާއިމްކުރެވިގެންދާނެ. އަދި އޭ ތްރީ ޓުވެންޓީގެ ބޯޓު ފަހަރަށް ޖެއްސޭވަރަށް އެއަރޕޯޓު ތަރައްޤީކުރެވިގެންދާނެ،" އިއާދު ވިދާޅުވިއެވެ.
މީގެއިތުރުން އައްޑޫ ސިޓީ ތަރައްޤީކޮށް، ފަތުރުވެރިކަން ކުރިއެރުވުމަށްވެސް އަންނަ އަހަރުތެރޭ ގިނަ މަޝްރޫޢުތަކެއް އެއަތޮޅުގައި ކުރިއަށްގެންދިޔުމަށް ހަމަޖެހިފައިވާކަމަށް އިއާދު ވިދާޅުވިއެވެ.
ސަރުކާރުން ކުރިއަށް ގެންދިޔުމަށް ރާވާފައިވާ މި މަޝްރޫޢުތަކާއެކު މުޅި ރާއްޖޭގައި އަންނަ އަހަރުތެރޭ ގިނަ މަޝްރޫޢުތަކެއް ފެށި ރާއްޖޭގެ އިޤްތިސާދަށް ގިން ކުރިއެރުންތަކެއް ލިބިގެންދާނެއެވެ. ގިނަ ވަޒީފާތަކެއް އުފެދި ރައްޔިތުންގެ ފުއްދުންތެރިކަން އިތުރުވެގެންދާނެ ކަމަށް ތަޖްރިބާކާރުންދެކެއެވެ.