ބޮލީވުޑްގެ ބަޠަލާ ސޮނާކްޝީ ސިންހާ މިހާރު ރާއްޖޭގައި ޗުއްޓީ ހޭދަކުރަމުން އެބަދެއެވެ. ސޮނާކްޝީވަނީ ރާއްޖެއަށް އެތަށް ފަހަރެއްގެ މަތިން ޒިޔާރަތްކޮށްފައެވެ.
އޭނާ ޗުއްޓީ ހޭދަކުރަމުން ދަނީ ގްރޭންޑް ޕާރކް ކޮށްދިއްޕަރު ރިސޯޓުގައި ކަމަށް އޭނާގެ އިންސްޓަގްރާމުގައި ބުނެފައިވެއެވެ. އޭނާގެ އިންސްޓަގްރާމުގައި ޕޯސްޓު ކޮށްފައިވާ ރާއްޖޭގެ ފޮޓޯ ތަކަށް ގިނަ ބައެއްގެ ސަމާލުކަން ދަނީ ލިބެމުންނެވެ. އޭނާގެ ޕޯސޓެއްގައި ބުނެފައިވަނީ އޭނާ އަކީ "އައިލެންޑް ގަރލް"އެއް ކަމުގައެވެ.
ސޮނާކްޝީ ބުނެފައިވާ ގޮތުގައި އެންމެ އުފާވެރި ވަގުތުތަކަކީ މޫދުގައި ހޭދަކުރެވޭ ވަގުތުތަކެވެ. ޢާއްމުންގެ މެދުގައި މަޤުބޫލު ފިލްމުތަކެއް ކުޅެފައިވާ ސޮނާކްޝީ ދެން އެންމެ އަވަހަށް ފެނިގެންދާނީ "ބޫޖް: ދަ ޕްރިއިޑް އޮފް އިންޑިއާ" ވެބް ސީރީޒް އިންނެވެ.
މިދުވަސްވަރަކީ ބޮލީވުޑްގެ ފަންނާނުންގެ މެދުގައި ރާއްޖެ ވަރަށް ބޮޑަށް މަޤުބޫލުވެފައިވާ ދުވަސްވަރެކެވެ. މިވަގުތުވެސް ރަކުލް ޕްރީތު އަދި ތާރާ ސުތާރިއާ ފަދަ ފަންނާނުން އަންނަނީ ރާއްޖޭގައި ޗުއްޓީ ހޭދަކުރަމުންނެވެ. އަދި ދާދި ފަހުން ކެޓްރީނާ ކައިފް، ޓައިގަރ ޝްރޮފް، ދިޝާ ޕަޓާނީ، ނޭހާ ދޫޕިއާ އަދި ވަރުން ދަވަން ފަދަ ތަރިން ވަނީ ރާއްޖޭގައި ޗުއްޓީ ހޭދަކޮށްފައެވެ.