ރާއްޖޭގެ ރަށްރަށަކީ ކުށްމަދު އަމާން ތަނަކަށް ހެދުމަށް ފުލުހުން ކުރަމުންދާ މަސައްކަތުގެ ދަށުން، ރ. މީދޫގައި ވިޔަފާރިކުރާ ތަންތަނަށް ޒިޔާރަތްކޮށް މަޢުލޫމާތު ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.
މީދޫ ޕޮލިސް ސްޓޭޝަނުން ކުރިއަށް ގެންދިޔަ ޕްރޮގްރާމުގެ ތެރެއިން މީދޫގައި ވިޔަފާރިކުރާ ހުރިހާ ތަނަކަށް ޒިޔާރަތްކޮށް އެފަރާތްތަށް ހޭލުންތެރިކޮށްފައިވެއެވެ. މި ޕްރޮގްރާމުގެ ދަށުން މަކަރާއި ހީލަތުން ފައިސާ ހޯދުމަށް އެކިފަރާތްތަކުން ކުރަމުންދާ ކަންކަމުގެ މަޢުލޫމާތު ހިއްސާ ކޮށްފައިވެއެވެ. އަދި އޮންލައިން ވިޔަފާރި ކުރުމަށްފަހު ސައްޙަ ނޫން ސްލިޕް ފޮނުވާ މައްސަލަތައްވެސް ހިނގަމުންދާތީ އެފަދަ ކަންކަމުން ރައްކާތެރިވާނެ ގޮތާއި ބެހޭގޮތުން މަޢުލޫމާތު ފޯރުކޮށްދިނެވެ.
ވައްކަމުގެ މައްސަލަތަކުން ރައްކާތެރިވުމުގެ ގޮތުން ވިޔަފާރި ބަންދުކުރާ ވަގުތު ފިހާރަތަކުގައި ފައިސާ ނުބަހެއްޓުމަށާއި، ސީ.ސީ.ޓީ.ވީ ކެމެރާ ހަރުކުރުމަށް ފުލުހުން ވަނީ އިލްތިމާސް ކޮށްފައެވެ. ހަމައެއާއިއެކު ފިހާރަ ތަކުގައި ކޭޝިއަރުންގެ ގޮތުގައި 18 އަހަރު ނުފުރޭ ކުޑަކުދިންނާއި ބިދޭސީން ނުބޭތިއްބުމަށް ނަސޭހަތްތެރިވިއެވެ. އަދި ވައްކަމުގެ މައްސަލައެއްގައި ޢަމަލު ކުރަންވީގޮތުގެ މަޢުލޫމާތުވެސް ފުލުހުން ވަނީ ފޯރުކޮށްދީފައިވެއެވެ.
އަތޮޅުފެންވަރުގައި ރ.އަތޮޅު ފުލުހުން ބޭނުންކުރަމުން އަންނަ އެޕެއް މެދުވެރިކޮށް ވިޔަފާރިކުރާ ތަންތަނުގެ ދަފްތަރެއް އެކުލަވައިލުމުގެ މަސައްކަތްވެސް މި ޕްރޮގްރާމުގެ ދަށުން ކޮށްފައިވެއެވެ.