ކޯވިޑް-19 ގެ ސަބަބުން ޤައުމުތަކުގެ އިޤްތިސާދު މިއަހަރުގެ ތެރޭގައި ދަށަށްދިޔަ ނަމަވެސް، ދެކުނު އިރުމަތީ އޭޝިއާގައި އިޤްތިސާދު ދަށަށް ދިޔަ ނުދީ ހިފަހައްޓާލި ހަމައެކަނި ޤައުމަކަށް ވިއެޓްނާމް ވެއްޖެއެވެ.
ވިއެޓްނާމްގެ އިޤްތިސާދު މިއަހަރު 2.4 އިންސައްތަ ކުރިއަރާނެކަމަށް އިންޓަރނޭޝަނަލް މަނިޓަރީ ފަންޑު، އައިއެމްއެފުން ލަފާކޮށްފަވާއިރު މި ފެށޭ 2021 ވަނަ އަހަރު 6.5 އިންސައްތަ ކުރިއަރާނެކަމަށްވެސް އައިއެމްއެފްއިން ލަފާކުރެއެވެ.
ވިއެޓްނާމުން ކޯވިޑް-19 އަށް ޕޮޒިޓިވްވެފައި ވަނީ 1288 މީހުންނެވެ. އަދި މިބަލީގައި އެޤައުމުން މަރުވެފައިވަނީ 35 މީހުންނެވެ.
ދެކުނު އިރުމަތީ އޭޝިއާގައި ސިއްހީ ނިޒާމަށް ބަލާއިރު ވިއެޓްނާމަށް ވުރެ ކުރިއަރާފައިވާ އެތައް ގައުމެއްވާއިރު، ކޯވިޑްގެ ބަލިމަޑުކަން ކޮންޓްރޯލްކުރުމަށް އެ ހުރިހާ ގައުމުތަކަށްވުރެ ވިއެޓްނާމުން އެޅި ފިޔަވަޅުތައް ހަރުދަނާކަން އައިއެމްއެފްއިންވަނީ ފާހަގަކޮށްފައެވެ.
ވިއެޓްނާމުންވަނީ ކޯވިޑަށް ޓެސްޓް ކުރުމުގެ އިންތިޒާމުތަކާއި ކޮންޓެކްޓް ޓްރޭސިންގްގެ ކަންކަން ވެސް ހަރުދަނާކޮށް، ކޯވިޑް ޖެހޭ މީހުންގެ އަދަދުތައް ކޮންޓްރޯލްކޮށްފައެވެ.
ވިއެޓްނާމްގެ އިޤްތިސާދަށް ކުރިއެރުން ލިބިގެން ދިޔަ މައިގަނޑު އެއް ސަބަބަކީ ކޯވިޑްއާއި ގުޅިގެން ގޭގައި ތިބެގެން މަސައްކަތްކުރާ ފަރާތްތައް އިތުރުވެގެން ދިޔުމެވެ. ގޭގައި ތިބެގެން މަސައްކަތްކުރުމަށް އެކަމަށް ބޭނުންވާ ސާމާނު ގިނަ ބަޔަކު ގަނެފައިވެއެވެ. މިފަދަ ސާމާނުތަކަކީ ވިއެޓްނާމުން އެންމެ ގިނަ އަދަދަކަށް އެކްސްޕޯޓު ކުރާ ބާވަތްތަކެވެ.