ކޯވިޑް-19ގެ ސަބަބުން ޙާލަތު ގޯސްވަމުންދާ އިންޑިޔާގެ ނިއު ދިއްލީ ފުރަބަންދުކުރުމަށް ނުވިސްނަވާކަމަށް އެ ސިޓީގެ ޞިއްޙަތާއިބެހޭ ވަޒީރު ވިދާޅުވެއްޖެއެވެ. އޭނާ އެގޮތަށް ވިދާޅުވެފައިވަނީ އެ ޤައުމުގެ ޔޫނިއަން ދާޚިލީ ވަޒީރު އަމިތު ޝާހާއިއެކު ބަލި ފެތުރުން ކޮންޓްރޯލުކުރުމާއިގުޅޭ މަޝްވަރާތައް ކުރުމުގެ އެއް ދުވަސް ފަހުންނެވެ.
ދުނިޔޭގެ ދެވަނައަށް އެންމެ ބޮޑު އާބާދީ އޮންނަ އިންޑިޔާގައި މިހާތަނަށް 8.8 މިލިއަން މީހުންނަށް ކޯވިޑް-19ޖެހި 130،109 މީހުންވަނީ މަރުވެފައެވެ. އެ ޤައުމު އޮތީ އެމެރިކާއަށްފަހު ދެވަނައަށް އެންމެ ގިނަ ޢަދަދެއްގެ މީހުންނަށް ބަލިޖެހިފައިވާ ޤައުމުގެ ގޮތުގައެވެ. ނިއު ދިއްލީގައި ބަލިޖެހޭ މިންވަރު ކޮންމެވެސް މިންވަރަކަށް ދަށަށް ދިޔުމަށްފަހު އަލުން ބަލި ފެތުރެން ފަށައިފައިވަނީ މީގެ ތިން ހަފުތާ ކުރިންނެވެ. އެ ސިޓީގައި މިހާތަނަށް އެއްދުވަސް ތެރޭގައި އެންމެ ގިނަ ޢަދަދެއްގެ މީހުންނަށް ބަލިޖެހިފައިވަނީ ނޮވެމްބަރު މަހުގެ 11ވަނަ ދުވަހުގައެވެ. އެއީ 8،593 މީހުންނެވެ. ފާއިތުވި 24 ގަޑިއިރުގެ ތެރޭގައި އެ ސިޓީގައި ބަލިޖެހިފައިވަނީ 3،235 މީހުންނަށެވެ.
ނިއު ދިއްލީގެ ޞިއްޙަތާއިބެހޭ ވަޒީރު ސަތުޔެންދަރު ޖައިން ވިދާޅުވީ ނިއު ދިއްލީގައި އަލުން ފުރަބަންދެއް ޤާއިމްކުރުމުގެ ފައިދާއެއް ފެނިވަޑައިނުގަންނަވާކަމަށެވެ. މިވަގުތަށް އެންމެ ރަނގަޅު ގޮތަކީ މާސްކު ބޭނުންކުރުންކަމަށް އޭނާ ވިދާޅުވިއެވެ. ޞިއްޙަތާއިބެހޭ ވަޒީރު ވިދާޅުވީ ނިއު ދިއްލީގައި މިވަގުތު ފެތުރެމުންދާ ކޯވިޑް-19ގެ ތިންވަނަ ރާޅުގެ އެންމެ ޙާލަތު ގޯސްވި ދުވަސްވަރު ފަހަގައަޅައި ގޮސްފައިވާކަމަށެވެ.
ނަމަވެސް ޞިއްޙީ މާހިރުންވަނީ ބަލިޖެހޭ މީހުންގެ ޢަދަދު މަދުވެފައިވަނީ އެ ޤައުމުގައި ފާހަގަކުރާ ޢީދުތަކާއި ދިމާކޮށް ތަހުލީލުކުރާ މީހުންގެ ޢަދަދު މަދުވުމުންކަމަށްވުން އެކަށީގެންވާކަމަށް ފާހަގަކޮށްފައެވެ. އެހެންކަމުން ބަލިޖެހޭ މީހުންގެ ޢަދަދު ކުއްލިއަކަށް އިތުރުވެދާނެކަމުގެ އިންޒާރު އެ ފަރާތްތަކުންވަނީ ދީފައެވެ. ފޯޓިސް ހޮސްޕިޓަލުގެ ޑިރެކްޓަރެއްކަމަށްވާ ޑރ. ވިކާސް މައުރުޔާ ވިދާޅުވީ ބަލިޖެހޭ މީހުންގެ ޢަދަދު ޕީކަށް ގޮސްފައިވާކަމަށް ބުނަން އަދި މާ އަވަސްކަމަށާއި ބަލި ފެތުރޭ މިންވަރު ހަޤީޤަތުގައިވެސް ދަށަށް ދާން ފަށައިފައިވާކަމަށް ޤަބޫލުނުކުރެވޭކަމަށެވެ.
ނިއު ދިއްލީގެ ވައިގެ ނުސާފުކަން އިތުރުވުމާއި ފިނިހޫނުމިން ދަށަށް ދިޔުމުގެ ސަބަބުން އެ ސަރަޙައްދުގައި ބަލިފެތުރޭ މިންވަރު އިތުރުވުމުގެ ކަންބޮޑުވުންވެސް އެބަ އޮތެވެ. މާހިރުންގެ ޚާއްޞަ ކޮމިޓީއަކުންވަނީ ކުރިއަށްއޮތް ފިނި މޫސުމުގައި ދުވާލެއްގެ މައްޗަށް ގާތްގަނޑަކަށް 15،000 މީހުންނަށް ނިއު ދިއްލީގައި ބަލިޖެހުން އެކަށީގެންވާކަމަށް ބުނެފައެވެ.
މީގެ ދެ ދުވަސްކުރިން ދާޚިލީ ވަޒީރު އަމިތު ޝާހާއިއެކު ބޭއްވި ބައްދަލުވުމެއްގައި ނިއު ދިއްލީގައި ތަހުލީލުކުރާ މިންވަރު ދުވާލަކު 100،000 ތަހުލީލަށް އިތުރުކުރުމަށްވަނީ ނިންމާފައެވެ. މިވަގުތު އެ ސިޓީގައި ކުރަނީ ދުވާލެއްގެ މައްޗަށް ގާތްގަނޑަކަށް 60،000 ތަހުލީލެވެ. އޭގެ އިތުރުން އައިސީޔޫ އެނދުގެ ޢަދަދު އިތުރުކޮށް އޮކްސިޖަން ދެވޭ އެނދުގެ ޢަދަދުވެސް އިތުރުކުރުމަށްވަނީ ނިންމާފައެވެ. ޕެރެމިލިޓަރީ ފައުޖުތަކުގެ ގިނަ ޢަދަދެއްގެ ޑޮކްޓަރުން ނިއު ދިއްލީއަށް ގެނައުމަށްވަނީ ނިންމާފައެވެ.