އެމެރިކާގެ ރިޔާސީ އިންތިޚާބު ކާމިޔާބުކުރައްވާފައިވާ ޖޯ ބައިޑަނަށް ޖޯޖިއާ ސްޓޭޓުގެ އަޣުލަބިއްޔަތުވެސް ލިބިވަޑައިގެންފިއެވެ.
ފާއިތުވި 28 އަހަރު ޖޯޖިއާ އޮތީ ރިޕަބްލިކަނުންގެ ސްޓޭޓެއްގެ ގޮތުގައެވެ. މިއީ ޑިމޮކްރަޓެއްކަމަށްވާ ކުރީގެ ރައީސް ބިލް ކްލިންޓަން 1992ވަނަ އަހަރު ޖޯޖިއާ ސްޓޭޓުގެ އަޣުލަބިއްޔަތު ކާމިޔާބުކުރެއްވި ފަހުން ޑިމޮކްރަޓު ކެންޑިޑޭޓަކަށް ޖޯޖިއާގެ އަޣުލަބިއްޔަތު ލިބުނު ފުރަތަމަ ފަހަރެވެ.
ރައީސްކަމަށް އިންތިޚާބުވުމަށް ބޭނުންވާ 270 އިލެކްޓޯރަލް ވޯޓު މިހާތަނަށް ކާމިޔާބު ކުރައްވާފައިވާ ބައިޑަން ޖޯޖިއާގެ ވޯޓުން ކުރި ލިބިވަޑާއިގަތުމުން އިތުރު 16 އިލެކްޓޯރަލް ވޯޓު މިވަނީ ޔަޤީންވެފައެވެ. އެއާއޮ އެކު ބައިޑަންއަށް ލިބިވަޑައިގެންނެވި އިލެކްޓޯރަލް ވޯޓުގެ ޖުމްލަ ޢަދަދު މިހާރުވަނީ 306އަށް އިތުރުވެފައެވެ. އެއީ 2016ވަނަ އަހަރުގެ ރިޔާސީ އިންތިޚާބު ރައީސް ޓްރަންޕު ކާމިޔާބުކުރެއްވިއިރު ލިބިވަޑައިގެންނެވި އިލެކްޓޯރަލް ވޯޓުގެ ޢަދަދެވެ.
ފަސް ސްޓޭޓަކުން ރައީސް ޓްރަންޕަށް އޮތް ތާޢީދު ގެއްލި، މި އަހަރުގެ އިންތިޚާބުގައި ޓްރަންޕަށް ލިބިވަޑައިގެންފައިވަނީ 232 އިލެކްޓޯރަލް ވޯޓެވެ. ނަމަވެސް އިންތިޚާބުގެ ނަތީޖާ ބަލައިގަންނަވާ ރައީސް ޓްރަންޕު މިހާތަނަށް ބަލި ޤަބޫލުކުރައްވާފައެއް ނުވެއެވެ.
ނޮވެމްބަރު މަހުގެ 7ވަނަ ދުވަހަށްފަހު ފުރަތަމަ ފަހަރަށް އާންމުކޮށް ވާހަކަދައްކަވަމުން ރައީސް ޓްރަންޕުވަނީ އިންތިޚާބު ނާކާމިޔާބު ވެވަޑައިގެންނެވުމުގެ ފުރުޞަތެއް އޮތްކަމަށް ޤަބޫލުކުރައްވާ ފަދަ މޭރުކަމުން ވާހަކަދައްކަވާފައެވެ. ނަމަވެސް ބަލި ޤަބޫލުކުރައްވާކަމެއް ސީދާ ވިދާޅުވެފައެއް ނުވެއެވެ.
ކޯވިޑް ދެކޮޅަށް އުފައްދާ ވެކްސިނާއި ގުޅޭގޮތުން ވައިޓު ހައުސްގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ޓްރަންޕު ވިދާޅުވީ މުޅި ޤައުމުގެ އާބާދީއަށް އަންނަ އޭޕްރިލް މަހުގައި ވެކްސިން ފޯރުކޮށްދެވޭނެކަމަށެވެ. މިހާރުގެ ސަރުކާރުން ޤައުމު ފުރަބަންދު ނުކުރާނެކަމުގެ ޔަޤީންކަން ދެއްވަމުން ރައީސް ޓްރަންޕު ވިދާޅުވީ ކުރިމަގުގައި ކަންތައްވެގެންދާނެ ގޮތެއް ނޭނގޭކަމަށާއި، މުސްތަގުބަލުގައި ވެރިކަންކުރާނީ ކޮން ސަރުކާރަކުންކަމަށް ނޭނގޭކަމަށެވެ. އަދި ކުރިއަށް އޮތް ދުވަސްތަކުގައި އެކަން ސާފުވާނެކަމަށް އޭނާ ވިދާޅުވިއެވެ. އެ ރަސްމިއްޔާތަށްފަހު ނޫސްވެރިންގެ ސުވާލުތަކަށް ހުޅުވާލާފައެއް ނުވެއެވެ.
ރައީސް ޓްރަންޕު ގެންދަވަނީ އެއްވެސް ހެއްކެއް ހުށަހެޅުމެއްނެތި އިންތިޚާބު އޮޅުވާލާފައިވާކަމުގެ ތުހުމަތުތައް ތަކުރާރުކޮށް ކުރައްވަމުންނެވެ. ނަމަވެސް އިންތިޚާބާއި ބެހޭ އެއްވެސް އިދާރާއަކަށް ވޯޓު އޮޅުވާލާފައިވާކަމުގެ އެއްވެސް ނިޝާނެއް ފާހަގަވެފައިވާކަމަށް މިހާތަނަށް ބުނެފައެއް ނުވެއެވެ.
ނަތީޖާއަށް ގޮންޖައްސަވައި ރައީސް ޓްރަންޕުގެ ފަރާތްޕުޅުން ހުށަހަޅާފައިވާ އެއްވެސް ޤާނޫނީ މައްސަލައެއްގައި މިހާތަނަށް ކުރި ލިބި ވަޑައިގެންފައެއް ނުވެއެވެ. ބައިޑަން ކުރި ހޯއްދަވާފައިވާ ތިން ސްޓޭޓެއްގެ ނަތީޖާ ޓްރަންޕާއި އެއް ކޮށްޅަށް އެނބުރިގެން ނޫނީ ޓްރަންޕަށް ރައީސްކަމުގެ އިތުރު ދައުރެއް ކާމިޔާބެއް ނުކުރެއްވޭނެއެވެ. ނަމަވެސް އެއިން އެއްވެސް ސްޓޭޓެއްގެ ނަތީޖާ އެނބުރުމަށް ބޭނުންވާ ހެކި ހުށަހެޅުމުގައި މިހާތަނަށް ޓްރަންޕަށް ކާމިޔާބުވެވަޑައިގެންފައެއް ނުވެއެވެ.
އެމެރިކާގައި ބޭނުންކުރާ އިންތިޚާބީ ނިޒާމުގައި ރިޔާސީ ކެންޑިޑޭޓުންނަށް ލިބޭ މަގުބޫލު ވޯޓުގެ ޢަދަދަށް ބަލައި ރައީސްގެ ގޮތުގައި ބޭފުޅަކު ކަނޑައެއް ނޭޅެއެވެ. ނަމަވެސް މަގުބޫލު ވޯޓުގެ ޢަދަދަށް ބަލާއިރުވެސް 5.3 މިލިއަން ވޯޓުގެ ތަފާތަކާއެކު ކުރި ހޯއްދަވާފައިވަނީ ބައިޑަނެވެ. އެމަނިކުފާނަށް ވޯޓުގެ 50.8 އިންސައްތަވަނީ ލިބިވަޑައިގެންފައެވެ.
އިންތިޚާބުގެ ނަތީޖާ ރައީސް ޓްރަންޕު ގަބޫލުނުކުރެއްވި ނަމަވެސް އިންތިގާލީ މަރުހަލާގެ ކަންކަން ފަށްޓަވާ ކުރިއަށް ގެންދަވާނެކަމަށް ބައިޑަންގެ ޓީމުން ވަނީ ބުނެފައެވެ.