ވެލާނާ އިންޓަރނޭޝަނަލް އެއަރޕޯޓުގެ އާ ރަންވޭ އަންނަ އަހަރު ބޭނުންކުރަން ފަށާނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ވިދާޅުވެއްޖެއެވެ. އާ ރަންވޭއާއިއެކު ފްލަޓް ޖެއްސުމަށް ހޭދަވާ ވަގުތު ވަރަށް ބޮޑަށް ކުޑަވެގެންދާނެކަމަށް އެ ކުންފުނިން ވިދާޅުވެއެވެ.
ކޮންމެ ދުވަހަކުވެސް އެތަށް ސަތޭކަ ބަޔަކު ބޭނުންކުރަމުންދާ ރާއްޖޭގެ މައި އެއަރޕޯޓު، ވެލާނާ އިންޓަރނޭޝަނަލް އެއަރޕޯޓުގެ ތަރައްޤީއަށް ބޮޑެތި މަޝްރޫޢުތަކެއް ދަނީ ހިންގަމުންނެވެ. އެއަރޕޯޓު ހިންގަމުން އަންނަ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޢަމާޒަކީ ފެންވަރު ރަނގަޅު އަވަސް ޚިދުމަތްތަކެއް ވެލާނާ އިންޓަނޭޝަނަލް އެއަރޕޯޓުން ލިބޭނެ އިންތިޒާމްތައް ހަމަޖެއްސުމެވެ. 2017ވަނަ އަހަރު އެއަރޕޯޓްގައި ފެށި 1.2 ބިލިއަން ޑޮލަރުގެ ބިޔަ ޕްރޮޖެކްޓްގައި ވަކިވަކި 7 މަސައްކަތެއް ހިމެނެއެވެ. މީގެތެރެއިން އެންމެ ފާހަގަކޮށްލެވޭ އެއް މަސައްކަތަކީ އާ ރަންވޭގެ މަސައްކަތްކެވެ.
3400މީޓަރު ދިގު، 65މީޓަރު ފުޅާ ރަންވޭގެ ޢަމަލީ މަސައްކަތްތައް ނިމި ޓެސްޓް ފްލައިޓް ޖައްސާފައިވަނީ 2018ވަނަ އަހަރުއެވެ. ނަމަވެސް ރަންވޭ ބޭނުންކުރަން ނުފެށި ލަސްވެގެންދިޔައީ، ރަންވޭއާ ދިމާެިން އަލަށް ހަދާ ސީޕްލޭން ޓަރމިނަލްގެ މަސައްކަތަށް އެސަރަޙައްދު ބޭނުންކުރަންޖެހޭތީކަމަށް، އެމްއޭސީއެލްއިން ވަނީ ވިދާޅުވެފައެވެ.
އާ ރަންވޭ ބޭނުންކުރަން ފެށުމާ ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި އެމްއޭސީއެލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވިދާޅުވީ، އެއަރޕޯޓްގައި ފަށައިގެން ކުރިއަށްގެންދާ ބޮޑެތި ގިނަ ޕްރޮޖެކްޓްތައް އަންނަ އަހަރު މުޅިން ނިންމައި، ޚިދުމަތް ފަށާނެކަމަށެވެ. މީގެތެރެއިން އެއް މަސައްކަތަކީ ރަންވޭގެ މަސައްކަތެވެ. ހަސަން ވިދާޅުވީ މަސައްކަތް ނިމިފައިވީނަމަވެސް އާ ރަންވޭ ބޭނުންކުރަން ފަށާނީ އަންނަ އަހަރުކަމަށެވެ.
އާ ރަންވޭ ބޭނުންކުރަން ފެށުމުން މިހާރުގެ ރަންވޭ ބޭނުންކުރާނީ ޓެކްސީ ވޭއެއްގެ ގޮތުގައިކަމަށް އޭނާ ވިދާޅުވިއެވެ. ރަންވޭގެ ޖާގަ މިހާރު އޮތްގޮތުން ފްލައިޓެއް ޖައްސާއި ޓެކްސީ ކުރުމަށް މިހާރު 12ނުވަތު 15 މިނެޓު ހޭދަވެއެވެ. ނަމަވެސް އާ ރަންވޭއާއެކު ރަންވޭ ހުސްކުރެވޭ ވަގުތު 3 މިނެޓަށް ކުޑަކުރެވޭނެކަމަށް އެމްއޭސީއެލްއިން ވިދާޅުވެއެވެ.
"ގިނަ ފްލައިޓް އަންނަ ދުވަސްވަރު ރަންވޭ ހުސްނުވެގެން ނުޖެއްސިފައި މަތީގައި އެބައޮންނަންޖެހޭ. ފްލައިޓް ރަންވޭގައި ޖެއްސީމަ އެވަނީ ޓެކްސީވޭއަކަށް. ވައިޑްބޮޑީ އެއަރކްރާފްޓެއްނަމަ 12،15މިނެޓް ހޭދަވޭ އެބަ ރަންވޭ ކްލިއަރވާން. އާ ރަންވޭ ބޭނުންކުރަންފެށީމަ ޓެކްސީވޭގެ ގޮތުގައި ބޭނުންކުރާނީ މިހާރުގެ ރަންވޭ. އޭރުން 3މިނެޓުން ރަންވޭ ކްލިއަރ ކުރެވޭނެ." ހަސަން ވިދާޅުވިއެވެ.
ހަސަން ވިދާޅުވީ ކޯވިޑް-19އާ ގުޅިގެން އެއަރލައިންތަކުން ދަތުރުކުރާ މިންވަރު މަދުވި ނަމަވެސް، މިހާރު އެއަރލައިންތައް ރާއްޖެ އަންނަ މިންވަރު މަޑުމަޑުން އިތުރުވާން ފަށާފައިވާކަމަށެވެ.
އާ ރަންވޭއަކީ ބައިނަލްއަޤްވާމީ މިންގަނޑުތަކާ އެއްގޮތަށް ތަރައްޤީކޮށްފައިވާ ފުރިހަމަ ރަންވޭއެކެވެ. މި ރަންވޭއަކީ ދުނިޔޭގައި ބޭނުންކުރާ އެންމެ ބޮޑެތި އެއަރކްރާފްޓް އޭ.380ގެ މަތިންދާ ބޯޓު ޖެއްސޭ ފެންވަރުގެ ރަންވޭއެކެވެ. އޭ.380ގެ މަތިންދާބޯޓުގައި 700އެއްހައި މީހުންނަށް އެއްފަހަރާ ދަތުރުކުރެވޭނެއެވެ.