އައިޖީއެމްއެޗާ ދިމާ މޫދު ބޭރުން މަރުވެފައި އޮތްވައި ފެނުނު މުޙައްމަދު ސިދުރަތުﷲ އަޙްމަދުގެ ހަށިގަނޑު ޕޯސްޓްމޯޓަމްއަށްފަހު މާލެގެނެސް ވަޅުލައިފިއެވެ.
އޭނާގެ ހަށިގަނޑު މާލެގެނެސް މިރޭ އޭނާގެމައްޗަށް ކަށު ނަމާދު ކޮށްފައިވަނީ އިޝާނަމާދުގެ ފަހުގައި މަސްޖިދުއް ތަޢާވުން އާސަހަރާ މިސްކިތުގައެވެ. ވަޅުލާފައިވަނީ އާސަހަރާގައެވެ. ސިދުރަތުﷲ މަރުވެފައި އޮތްވާ ފެނުނީ މިދިޔަ މަހުގެ 23 ވަނަ ދުވަހު އައިޖީއެމްއެޗާ ދިމާލުން މޫދުންނެވެ. އޭނާ ފެނުނުރިއރު ހަށިގަނޑުގައި އަނިޔާގެ ނިޝާންތަކެއް ހުރުމާއެކު އޭނާގެ މަރަކީ ގުދުރަތީ މަރެއްކަމާ މެދު ޝައްކުތަކެއް އުފެދުމުން ހަށިގަނޑުގެ ޕޯސްޓްޕޯޓަމް ހެދުމަށް ފުލުހުންވަނީ ނިންމާފައެވެ.
ސުދުރަތުﷲގެ ހަށިގަނޑު ޕޯސްޓްމޯޓަމް ހެދުމަށް ބޭރަށް ފޮނުވާފައިވަނީ މިމަހުގެ 2 ވަނަ ދުވަހުއެވެ. ޕޯސްޓްމޯޓަމް ހެދުމަށްފަހު އޭނާގެ ހަށިގަނޑު މާލެ ގެނެސް މިރޭ ވަޅުލާފައިވާއިރު މިމައްސަލައއާއި ގުޅިގެން އަދި ފުލުހުން ވަކި އެއްޗެއް ހާމައެއްނުކުރައްވައެވެ. ސިދުރަތުﷲގެ ހަށިގަނޑުގައި ޒަޚަމްތަކެއް ހުރިކަމަށް އޭނާގެ ޢާއިލާއިންވެސްވަނީ ބުނެފައެވެ.
ފުލުހުން ވިދާޅުވީ ސިދުރަތުގެ ހަށިގަނޑުގެ ޕޯސްޓްމޯޓަމް ހަދާފައިވަނީ އިންޑިއާގެ ޓްރިވެންޑްރަމްގައި ހުންނަ މެޑިކަލް ކޮލެޖް ހޮސްޕިޓަލުގައެވެ. ފުލުހުންގެ އިދާރާއިން ވަނީ، މިދިޔަ މަހުގެ 22ވީ ބުރާސްފަތި ދުވަހުގެ ހެނދުނު، 9:00 އާއި 10:00 އާއި ދެމެދު ސިދުރަތުﷲ ރަސްފަންނާއި ދިމާއަށް މޫދަށްއެރެން ދާ މަންޒަރު ފެންނަ ސީސީޓީވީ ފުޓޭޖުވެސް އާއްމުކޮށްފައެވެ. އަދި ސިދުރަތުﷲ އެސަރަހައްދުން ދުށް، ނުވަތަ ބައްދަލުވި މީހަކު، ނުވަތަ އޭނާ އާއި ގުޅޭ މައުލޫމާތެއް ލިބިފައިވާ މީހަކު ވާނަމަ އެ މައުލޫމާތެއްވެސް ހިއްސާކޮށްދިނުމަށް ފުލުހުން ވަނީ އެދިވަޑައިގެންފައެވެ.