ޒުވާނުންނަށް މުނިފޫހި ފިލުވައި ހުނަރު ތަރައްޤީ ކުރެވޭނެ މަރުކަޒެއް ހެދުމަށް، މަޖިލީހަށް ޤަރާރެއް
ޒުވާނުންގެ މިޔުޒިކު ހުނަރުތައް ތަރައްޤީކުރުމަށާއި، މުނިފޫހި ފިލުވައި، އިޖުތިމާއީ ގުޅުންތައް ދެެހެއްޓުމަށް އެހީވުމަށް ބޭނުންވާ ޖާގަ ތަނަވަސްކޮށްދިނުމަށް، މާލޭގައި މަރުކަޒެއް ޤާއިމުކުރުމަށް ސަރުކާރަށް ގޮވާލައި، މަޖިލީހަށް ޤަރާރެއް ހުށައަޅައިފިއެވެ.
މި ޤަރާރު މަޖިލީހަށް ހުށައަޅުއްވާފައި ވަނީ ހެންވޭރު ހުޅަނގު ދާއިރާގެ މެންބަރު ހަސަން ލަތީފައެވެ.
މި ޤަރާރު ހުށައަޅާފައި ވަނީ ޒުވާނުންނަށް ދިމާވެފައިވާ އިޖުތިމާޢީ މައްސަލަތަކުން، ލުޔެއް ހޯދައިދިނުމަށްކަމަށް ވިދާޅުވެފައިވެއެވެ. އެގޮތުން އެފަދަ ސެންޓަރެއް ޤާއިމްކުރުމަށް ބޭނުންވަނީ، އެކުވެރިނާއި ގުޅުން ބަދަހި ކުރުމާއި، ބޭރަށް ނިކުމެލައި އުޅެވޭނެ މާޙައުލެއް ޤާއިމުކޮށްދިނުމާއި، މިއުޒިކް ފަދަ ފަންނުތައް ތަރައްޤީކޮށް ކުރިއެރުވުމަށް އެހީވެދިނުމަށްކަމަށް ޤަރާރުގައި ވެއެވެ. ޒުވާނުންގެ ފަންނާއި ހުނަރު ކުރިއެރުވޭނީ، ޒުވާނުންނަށް ޚާއްސަ މަރުކަޒެއް ހުރެގެން ކަމަށާއި، މިފަދަ މަރުކަޒެއް ޤާއިމުކޮށްދިނުމަށް ސަރުކާރަށް ގޮވާލާކަމަށް ޤަރާރުގައިވެއެވެ.
މާލޭގެ އޮތް ތޮއްޖެހުމާއި، ބޯހިޔާވަހިކަމުގެ ދަތިތަކާއި ވަޒީފާ ހޯދުމުގެ ދަތިކަން ފަދަ މައްސަލަތަކަށް ޙައްލު ހޯދައިދެމުން އަންނައިރު، ޒުވާނުން ހާސްކަމުގައި އުޅެންޖެހިފައިވާ އުޅުމަށް ލުޔެއް ހޯދައިދޭންޖެހޭކަމަށްވެސް ވަނީ ބުނެފައެވެ.
މިއާއިއެކު ޒުވާނުންނަށް ރަޙުމަތްތެރިންނާއިއެކު އެއްވެ އުޅެވޭނެ ތަނަކާއި، މިއުޒިކް ރެކޯޑިންގް ސްޓޫޑީއޯ އާއި، ބޭންޑް ޕްރެކްޓިސް ރޫމާއި ހުނަރި ދަސްކޮށް އާލާކުރެވޭނެ ވަސީލަތްތައް ހުންނަ މަރުކަޒަކަށް މި މަރުކަޒު ވާންޖެހޭނެކަމަށް ޤަރާރުގައިވެއެވެ. ޒުވާނުންގެ ހުނަރުތައް ބޭނުންކުރެވޭނެ ފުރުސަތު ހޯދައިދިނުމަކީ ދަޢުލަތުގެ މަސްޢޫލިއްޔަތެއްކަމަށްވެސް ރައްޔިތުންގެ މަޖިލީހަށް ހުށައެޅި ޤަރާރު ވަނީ ބުނެފައެވެ.