އޭޝިޔާގައި ކޯވިޑް-19 ޖެހިފައިވާ މީހުންގެ ޢަދަދު 10 މިލިއަން ހުރަސްކޮށް މައްޗަށް އަރައިފިއެެވެ. މިއީ ބަލީގެ ސަބަބުން ޙާލަތު އެންމެ ގޯސްވެފައިވާ މެދުތެރޭ އެމެރިކާއަށްފަހު ބަލިޖެހިފައިވާ މީހުންގެ ޢަދަދު 10 މިލިއަނަށްވުރެ އެރި ދެވަނަ ސަރަޙައްދެވެ.
ދުނިޔޭގައި ކޯވިޑް-19 ޖެހިފައިވާ މީހުންގެ ޖުމްލަ ޢަދަދު 42.1 މިލިއަނަށްވުރެ އިތުރުވެ 1.1 މިލިއަން މީހުންވަނީ މަރުވެފައެވެ. ބަލިޖެހިފައިވާ މީހުންގެ ޖުމްލަ ޢަދަދުގެ ހަތަރު ބައި ކުޅަ އެއްބައި މީހުންނަށް ބަލިޖެހިފައިވަނީ އޭޝިޔާ ސަރަޙައްދުންނެވެ. ކޯވިޑް ޖެހިގެން މަރުވެފައިވާ ތެރެއިން 163،000 މަރު ދަފްތަރުކޮށްފައިވަނީވެސް އޭޝިޔާގައެވެ. އެއީ ބަލީގައި މަރުވި މީހުންގެ 14 އިންސައްތައެވެ.
އެ ޢަދަދުތައް ބިނާކޮށްފައިވަނީ ވަކިވަކި ޤައުމުތަކުން ޙިއްޞާކޮށްފައިވާ ޢަދަދުކުގެ މައްޗަށް ކަމަށްވުމުން ބައްޔަށް ތަހުލީލުކުރުމުގައި ހުރި ދަތިތަކާއި ހަޤީޤީ ޢަދަދުތައް ޙިއްޞާކުރުމުގައި ބައެއް ޤައުމުތަކުން އޮޅުވާލާކަމަށް ބެލެވޭތީ ކޯވިޑް ޖެހިފައިވާ މީހުންގެ ހަޤީޤީ ޢަދަދު އެތައް ގުނައެއް އިތުރުވުން އެކަށީގެންވާކަމަށް ކަމާބެހޭ މާހިރުން ލަފާކުރެއެވެ.
އޭޝިޔާގެ ސަރަޙައްދުތަކުގައި ބަލިފެތުރޭ މިންވަރު ދޭތެރެ ދޭތެރެއިން ވަރަށް ބޮޑަށް އިތުރުވަމުން ދިޔަ ނަމަވެސް ފާއިތުވި ހަފުތާތަކުގައި އޭޝިޔާ ސަރަޙައްދުގެ ޙާލަތު ރަނގަޅުވަމުން އަންނަކަމަށް ވަނީ ފާހަގަވެފައެވެ. އެގޮތުން އެންމެ ހަލުވިކޮށް ބަލިފެތުރެމުންދިޔަ އިންޑިޔާގައި ބަލިފެތުރޭ މިންވަރުދަނީ މަޑުމަޑުން މަދުވަމުންނެވެ. އެހެންކަމުން އޭޝިޔާގައި މިވަގުތު ބަލިފެތުރެމުންދާ ގޮތާއި ވިލާތުގެ ޤައުމުތަކާއި އުތުރު އެމެރިކާގައި ބަލިފެތުރެމުންދާ ގޮތާ ތަފާތެވެ.
އޭޝިޔާ ސަރަޙައްދުންވެސް އެންމެ ބޮޑަށް ބަލީގެ އަސަރުކޮށްފައިވަނީ ދެކުނު އޭޝިޔާ ސަރަޙައްދަށެވެ. އެ ސަރަޙައްދުން ބަލިޖެހިފައިވާ މީހުންގެ 21 އިންސައްތައާއި މަރުވެފައިވާ މީހުންގެ 12 އިންސައްތަ ޙިއްޞާކުރެއެވެ.
ބަލިޖެހިފައިވާ 7.8 މިލިއަން މީހުންނާއެކު އެ ސަރަޙައްދަށް ނިސްބަތްވާ އިންޑިޔާ އޮތީ އެމެރިކާއަށްފަހު ދެވަނައަށް އެންމެ ގިނަ ޢަދަދެއްގެ މީހުންނަށް ބަލިޖެހިފައިވާ ޤައުމުގެ ގޮތުގައެވެ. ދުނިޔޭގެ ދެވަނައަށް އެންމެ ބޮޑު އާބާދީ އޮންނަ އިންޑިޔާގައި ދުވާލެއްގެ މައްޗަށް އެވަރެޖުކޮށް 57،000 މީހުންނަށް ދަނީ ބަލިޖެހެމުންނެވެ. އެއީ އެ ޤައުމުގެ އާބާދީގެ ކޮންމެ 10،000 މީހުންގެ ތެރެއިން 58 މީހުންނެވެ. އެ ޤައުމުގައި ދުވާލެއްގެ މައްޗަށް 764 މީހުން އެވަރެޖުކޮށް މަރުވަމުންދާއިރު އެއީ މަރުވާ މީހުންގެ ނިސްބަތް އެންމެ މަތީ ޤައުމެވެ. އެ ޤައުމުގައި ބަލިފެތުރޭ މިންވަރު މިހާރު ދަށަށް ދާން ފަށައިފައިވީނަމަވެސް ކުރިއަށް އޮތް ހަފުތާތަކުގައި ބަލި ފެތުރޭ މިންވަރު އަނެއްކާވެސް އިތުރުވެދާނެކަމުގެ ބިރުވަނީ ހީވެފައެވެ.
އޭޝިޔާ ސަރަޙައްދުން ދެން އެންމެ ޙާލަތު ގޯސްވެފައިވަނީ ބަންގުލަދޭޝްގައެވެ. އެ ޤައުމުގައި މިހާތަނަށް 400،000 މީހުންނަށްވަނީ ބަލިޖެހިފައެވެ. ޖުލައި މަހުގެ ތެރޭގައި ޙާލަތު ވަރަށް ބޮޑަށް ގޯސްވި ބަންގުލަދޭޝްގައި ދުވާލެއްގެ މައްޗަށް ބަލިޖެހޭ މީހުންގެ ޢަދަދުވަނީ އޭރާ އަޅާބަލާ އިރު 40 އިންސައްތަ ދަށަށް ގޮސްފައެވެ. އޭގެ އިތުރުން އިންޑޮނޭޝިޔާގެ ޙާލަތުވެސްދަނީ ގޯސްވަމުންނެވެ.
އޭޝިޔާގައި ބަލިޖެހިފައިވާ މީހުންގެ ޢަދަދު އިތުރުވެފައިވީ ނަމަވެސް ދުނިޔޭގެ ޞިއްޙަތު ޖަމުޢިއްޔާގެ ތަޖުރިބާކާރަކުވަނީ ކޯވިޑް-19 އާ ދެކޮޅަށް ފިޔަވަޅު އެޅުމުގައި ވިލާތުގެ ޤައުމުތަކުންނާއި އުތުރު އެމެރިކާގެ ސަރަޙައްދުތަކުން މިސާލެއްގެ ގޮތުގައި އޭޝިޔާ ދެކެންޖެހޭކަމަށް ވިދާޅުވެފައެވެ.