އާޖެންޓީނާގައި ކޯވިޑް-19 ޖެހިފައިވާ މީހުންގެ ޢަދަދު އެއް މިލިއަން ހުރަސްކޮށްފިއެވެ. މިއީ ކޯވިޑް-19 ޖެހިފައިވާ މީހުންގެ ޢަދަދު އެއް މިލިއަނަށްވުރެ މައްޗަށް އެރި ފަސްވަނަ ޤައުމެވެ.
ފާއިތުވި 24 ގަޑިއިރުގެ ތެރޭގައި އާޖެންޓީނާގައި 12،982 މީހުންނަށް ބަލިޖެހި 451 މީހުންވަނީ މަރުވެފައެވެ. އާޖެންޓީނާއަކީ އެއް މިލިއަނަށްވުރެ ގިނަ މީހުންނަށް ބަލިޖެހިފައިވާ ޤައުމުތަކުގެ ތެރެއިން އެންމެ ކުޑަ ޤައުމެވެ. އެއް މިލިއަން މީހުންނަށް ބަލިޖެހިފައިވާ އެހެން ޤައުމުތަކާ އަޅައިބަލާއިރު އާޖެންޓީނާގެ އާބާދީ ވަރަށް ކުޑައެވެ. އެ ޤައުމުގެ އާބާދީއަކީ 45 މިލިއަނެވެ.
ބައްޔަށް ތަހުލީލުކުރާ މިންވަރުވެސް އެހެން ޤައުމުތަކާ އަޅައިބަލައި އިރު އެ ޤައުމުގައި ދަށެވެ. ތަހުލީކުރަމުންދާ މީހުންގެ ތެރެއިން 60 އިންސައްތައަށްވުރެ ބޮޑު ނިސްބަތެއްދަނީ ބައްޔަށް ޕޮސިޓިވް ވަމުންނެވެ. އެއީ ދުނިޔޭގެ އެކި ސަރަޙައްދުތަކުގައި ބައްޔަށް ޕޮސިޓިވްވާ މިންވަރަށް ބަލާއިރު އެންމެ މަތީ އެއް ޢަދަދެވެ.
ބަލިޖެހޭ މީހުންގެ ޢަދަދު ވަރަށް ބޮޑަށް އިތުރުވުމުގެ ސަބަބުން އާޖެންޓީނާގެ ޞިއްޙީ ނިޒާމަށްވަނީ ވަރަށް ބޮޑަށް ބާރުބޮޑުވެފައެވެ. ޙާލުދެރަވާ މީހުންނަށް ކުއްލި ފަރުވާދޭ އައިސީޔޫގައި ހުރި އެނދުތަކުގެ 64 އިންސައްތަދަނީ ބޭނުންކުރަމުންނެވެ. އަދި ޑޮކްޓަރުންނާއި ޞިއްޙީ ޚިދުމަތްތެރިންވަނީ ވަރުބަލިވެފައެވެ.
ކޯވިޑް-19 ޖެހިފައިވާ މީހަކު ފުރަތަމަ ފަހަރަށް އާޖެންޓީނާއިން ފެނުމާއެކު އެ ޤައުމުގައި ކަރަންޓީނުގެ އުސޫލުތައް އެންމެ ފުރަތަމަ ޤާއިމްކުރީ މާރިޗު މަހުގެ 20ވަނަ ދުވަހުގައެވެ. އޭގެ ސަބަބުން އެ ޤައުމުގައި ބަލިފެތުރޭ މިންވަރު ލަސްކުރުމަށް އެހީތެރިވެދިނެވެ. ނަމަވެސް ލިބެމުންދާ އިޤްތިޞާދީ ގެއްލުންތަކުން އަރައިގަތުމަށް ރައްކާތެރިކަމުގެ ފިޔަވަޅުތަކަށް ފަހުން ލުއިދިނުމުގެ ސަބަބުން އެ ޤައުމުގައި ބަލިފެތުރޭ މިންވަރުވަނީ އިތުރުވެފައެވެ. އެ ޤައުމުގައި 26،000އަށްވުރެ ގިނަ މީހުން މަރުވެފައިވާއިރު އެއީ ބަލިޖެހިފައިވާ މީހުންގެ 2.7 އިންސައްތައެވެ.
އާޖެންޓީނާގެ ސަރަޙައްދީ ރޮނގުތައް އަދިވެސް އޮތީ ބަންދުކޮށްފައެވެ. ނަމަވެސް ޞިއްޙީ، ޢާއިލީ އަދި ވަޒީފާގެ ބޭނުމަށް އެތެރޭގެ އުދުހުންތަކަށް ޚާއްޞަ ޙުއްދައެއްގެ ދަށުންވަނީ ފުރުޞަތު ދީފައެވެ.