މިހާރު ކުރިޔަށްދާ ހައުސިންގ މަޝްރޫއާއިއެކު ބޯހިޔާވަހިކަމުގެ މައްސަލައަށް ޙައްލެއް ލިބޭނެ: ތުޅާދޫ ކައުންސިލް

އިތުރުވަމުން އަންނަ އަބާދީއާއިއެކު ރާއްޖެއަށް މިހާރު ކުރިމަތިވެފައިވާ އެންމެ ބޮޑު އެއް ދަތިކަމަކީ ބޯހިޔާވަހިކަމުގެ ދަތިކަމެވެ. މާލެ ސަރަޙައްދެކޭ އެއްގޮތަށް، އަތޮޅުތަކުގެ ރަށްރަށުގެ އާބާދީވެސް އިތުރުވަމުން އައިސް ބޯހިޔާވަހިކަމުގެ ދަތިކަން ރަށްރަށުގެ ރައްޔިތުންނަށްވެސް ވަނީ ބޮޑުވެފައެވެ.

ރާއްޖޭގެ ރަށްރަށުގެ ތެރެއިން ރަށުގެ ބިން ފުރި ބިންހިއްކަންޖެހުނު އެއް ރަށަކީ ބ.ތުޅާދުއެވެ. އެރަށުން އެންމެ ފަހުން ގޯތި ދޫކޮށްފައި ވަނީ 2002ވަނަ އަހަރުގަވެ. ބިމުގެ ދަތިކަމުގެ ސަބަބުން އެރަށުން ގޯތި ދޫނުކުރާތާ މިހާރު ވަނީ 18 އަހަރު ވެފައެވެ. ރަށަށް ބިން އިތުރުކުރުމަށް 2010ވަނަ އަހަރު ތުޅާދޫން ވަނީ 17 ހެކްޓަރުގެ ބިން ހިއްކާފައެވެ. ހިއްކި ސަރަޙައްދުގެ ބޮޑު އިންސައްތައެއް ބޭނުންކުރާނީ ބޯހިޔާވަހިކަމުގެ މަޝްރޫޢުތަކަށެވެ. އެގޮތުން 88 ގޯތި ދޫކުރުމަށާއި، 50 ހައުސިންގ ޔުނިޓް އެޅުމަށް ނިންމާފައި ވާއިރު މިހާރު ވަނީ ގޯއްޗާއި ހައުސިންގ ޔުނިޓްލިބޭ މީހުންގެ ފައިނަލް ލިސްޓްވެސް އެކުލަވާލާފައިކަމަށް ތުޅާދޫ ކައުންސިލްގެ ރައީސް އަޙުމަދު ރަޝީދު ވިދާޅުވިއެވެ.

ތުޅާދޫގެ ބޯހިޔާވަހިކަމުގެ މައްސަލައާއި ގުޅޭގޮތުން މަޢުލޫމާތު ޙިއްސާކުރައްވަމުން އަޙުމަދު ރަޝީދު ވިދާޅުވީ އެންމެ ފަހު ހުޅުވާލި 88 ގޯއްޗާއި، 50 ހައުސިންގ ޔުނިޓަށް ރަށުގެ ގިނަ ބަޔަކު އެދުނުކަމަށެވެ.

"ވަރަށް ބޮޑަށް ދަތި މައްސަލައެއްމިއީ. ގޯއްޗަށް އޭރު ހުޅުވާލިއިރު 518 މީހުން ކުރިމަތިލި، އަދި 50ހައުސިންގ ޔުނިޓަށް 318 މިހުން އެދުނު." އަޙުމަދު ރަޝީދު ވިދާޅުވިއެވެ.

ބ.ތުޅާދޫގެ ބޯހިޔާވަހިކަމުގެ މައްސަލައަށް ޙައްލެއް ގެނައުމަށް މިދިޔަ އަހަރު ސަރުކާރުން ވަނީ އެރަށުގައި އިތުރު 100 ހައުސިންގ ޔުނިޓް އެޅުމުގެ މަޝްރޫޢުއެއް ފަށާފައެވެ. ތުޅާދޫގައި އަޅާ ހައުސިންގ ޔުނިޓްތަކަކީ ވަކިވަކި ގެތަކަށް ހަދާ ރޯހައުސްތަކެކެވެ. ކޮންމެ ގެއެއް ހެދުމަށް ހަމަޖެހިފައިވަނީ 1100އަކަފޫޓުގެ ބިމެއްގައެވެ. ތުޅާދޫގައި އަލަށް ފެށި ޕްރޮޖެކްޓްގައި އަޅާ ހުރިހާ ގެތަކަކީވެސް 3ކޮޓަރީގެ ގެތަކެވެ. 3ކޮޓަރިއާއި، 3 ފާޚާނަ އާއި، ސިޓިންގ ރޫމާއި، ބަދިގެ އަދި ސްޓޯރޫމާއި، ލޯންޑްރީ ރޫމްވެސް މިގެތަކުގައި ހިމެނެއެވެ.

ހައުސިންގ ޔުނިޓްގެ ޢަމަލީ މަސައްކަތްތައް ފަށާފައިވާއިރު މިހާރު ވަނީ 81 ހައުސިންގ ޔުނިޓްގެ ފައުންޑޭޝަން މަސައްކަތްތައް ނިންމާފައެވެ. މި މަސައްކަތާއިއެކު މުޅި މަޝްރޫޢުގެ 32 އިންސައްތަ މަސައްކަތްވަނީ ނިމިފައެވެ.

" އަލަށް ހަދާ ޔުނިޓްތަކަށް ކުރިމަތިލުމަށް ވަރަށް އަވަހަށް ހުޅުވާލެވޭނެކަމަށް މިނިސްޓްރިއިން މަޢުލޫމާތު ލިބެނީ. ކުރީގެ 88ގޯއްޗާއި، 50ޔުނިޓާއި، އަދި މިހާރު އަޅާ 100ރޯހައުސްއާއިއެކު މި މައްސަލައަށް 85% ޙައްލު ލިބޭނެ." އަޙުމަދު ރަޝީދު ވިދާޅުވިއެވެ.

2019ވަނަ އަހަރާއި 2020ގެ ބަޖެޓުން 57މިލިއަނަށްވުރެ ގިނަ ރުފިޔާ ވަނީ މި ޕްރޮޖެކްޓަށް ކަނޑައަޅާފައެވެ. މަޝްރޫޢުގެ މަސައްކަތް މުޅިން ނިމޭއިރު 65.3 މިލިއަން ރުފިޔާ މި މަޝްރޫއަށް ސަރުކާރުގެ ބަޖެޓުން ޚަރަދުކުރުމަށްވަނީ ހަމަޖެހިފައެވެ. މި މައްސައްކަތް އަންނަ އަހަރު އޭޕްރިލްމަހަށް ނިންމުމަށް ދަނީ މަސައްކަތް ކުރަމުންނެވެ.

ތުޅާދޫގެ 558 ގޭބިސީގައި 3000 އަށްވުރެ ގިނަ މީހުން ދިރިއުޅެމުންދެއެވެ.