ކުރީގެ ރައީސް ޢަބްދުﷲ ޔާމީންގެ ޝަރީޢަތަށް ނުފޯޒު ފޯރުވުމަށް ޖުޑީޝަލް ސާރވިސް ކޮމިޝަން (ޖޭއެސްސީ) އިން މަސައްކަތްކުރާކަމަށް ބުނެ އެކަން އިދިކޮޅު ޕްރޮގްރެސިވް ކޮންގްރެސް ކޯލިޝަނުން ކުށްވެރިކޮށްފިއެވެ.
އިދިކޮޅު ޕީޕީއެމް ޕީއެންސީން ނެރެފައިވާ ބަޔާނެއްގައި ވަނީ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ޝަރީޢަތަށް ނުފޫޒު ފޯރުވުމަށް ސަރުކާރުގެ އެކި ލެވެލްގައި، މަސައްކަތްކުރަމުންދާކަމަށް ތުހުމަތުކޮށްފައެވެ.
ޚާއްޞަކޮށް ޖުޑީޝަލް ސަރވިސް ކޮމިޝަނުން ނުފޫޒު ފޯރުވުމަށް މަސައްކަތްކުރާކަން ތުހުމަތުކޮށް އިދިކޮޅު ކޯލިޝަންގެ ބަޔާނުގައި ރައީސް ޔާމީންގެ އެކައުންޓްތައް ފްރީޒްކޮށްފައިވަނީ ޤާނޫނާ ޚިލާފަށް ކަމަށް މިމަހުގެ 8ވަނަ ދުވަހު ސުޕްރީމް ކޯޓުން ކުރި ޙުކުމާ ގުޅިގެން ހައިކޯޓުގައި ކުރިއަށްދާ ރައީސް ޔާމީންގެ އިސްތިއުނާފު މައްސަލައަށް ނުފޫޒުފޯރުވުމަށް ޖޭއެސްސީން މަސައްކަތް ކުރާކަމުގެ މަޢުލޫމާތު އެކޯލިޝަނަށް ވަނީ ލިބިފައިވާކަމަށް ވަނީ ބުނެފައެވެ.
މިއީ ސުޕްރީމްކޯޓުން ދަށު ކޯޓުގެ ޙުކުމަށް ތާއީދު ކުރުމާއެކު، ރައީސް ޔާމީނަށް ކޮށްފައިވާ ޙުކުމަކީ ސިޔާސީ ޙުކުމެއްކަން ދިވެހި ރައްޔިތުންނަށް އިތުރަށް ޔަޤީންވެފައިވާ ދަނޑިވަޅެއްގައި ޖޭއެސްސީގެ އިސްވެރިންނާއި މިސަރުކާރުގެ އިސްވެރިން ގޮތްހުސްވެގެން ކުރަމުންދާ ދަށުދަރަޖައިގެ ޢަމަލެއްކަމަށްވެސް އިދިކޮޅު ކޯލިޝަނުން ވަނީ ތުހުމަތުކޮށްފައެވެ.