މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން އެމްޓީޑީސީގެ އަހަރީ އާއްމު ޖަލްސާ މިމަހު ބާއްވަން ހަމަޖެހިފައިވާކަމަށް އެކުންފުނިން ހާމަކޮށްފިއެވެ.ޕަބްލިކް ލިމިޓެޑް ކުންފުނިތަކުގެ ތެރެއިން މިހާތަނަށް އަހަރީ އާއްމު ޖަލްސާ މިއަހަރު ބާއްވާފައި ނުވަނީ ހަމައެކަނި އެމްޓީޑީސީންނެވެ.އެމްޓީޑީސީން ބުނީ އަހަރީ އާއްމު ޖަލްސާ ބޭއްވުން ލަސްވެފައިވަނީ ޖަލްސާގެ ކުރިން ނިންމަންޖެހޭ ބައެއް ކަންކަން ނުނިމިހުރުމުންކަމަށެވެ. ނަމަވެސް މިހުރިހާކަމެއްވެސް ނިމި ޖަލްސާ މިމަހުގެ ތިންވަނަ ހަފްތާތެރޭގައި ބާއްވަން ނިންމާފައިވާކަމުގައި އެކުންފުނިން ބުނެއެވެ.ސަރުކާރުން މިހާރު ވަނީ އެމްޓީޑީސީގެ ބޯޑަށް ދެ ބޭފުޅަކު އައްޔަނުކޮށްފައެވެ.މި ދެ ބޭފުޅުންނަކީ ހ. ސިތާރާވާދީ ފަޒްލީ އަބްދުލް ވައްޚާބާއި، މ. މުލީ، މާކޯނި، އަލީ ނިޝާންއެވެ.އެ ކުންފުނީގެ ޗެއާޕާސަނެއްގެ ގޮތުގައި މިއަހަރުވެސް ސަރުކާރުން ހަމަޖައްސާފައި ވަނީ މިދިއަ އަހަރުވެސް އެ މަގާމުގައި ހުންނެވި އިބްތިޝާމާ އަހުމަދު ސައީދުއެވެ.އެމްޓީޑީސީ އަށް 2014 ވަނަ އަހަރު ސާފު ފައިދާގެ ގޮތުގައި 13.5 މިލިއަން ރުފިޔާ ލިބިފައިވެއެވެ.