ކުރިއަށް އޮތް ދެ އަހަރު ދުވަހުގެ ތެރޭގައި ކޯވިޑް-19ން ދުނިޔެ ސަލާމަތްވާނެކަމަށް އުއްމީދުކުރާކަމަށް ދުނިޔޭގެ ޞިއްޙަތު ޖަމުޢިއްޔާ، ޑަބްލިއުއެޗުއޯއިން ބުނެފިއެވެ.
ނޫސްވެރިންނާ ވާހަކަ ދައްކަވަމުން ޑަބްލިއުއެޗުއޯގެ ޑިރެކްޓަރ ޖެނެރަލް ތެޑްރޮސް އަދަނަމް ގެބްރިއޭސުސް ވިދާޅުވީ ދެ އަހަރަށްވުރެ ކުރު މުއްދަތެއްގެ ތެރޭގައި ބަލި ފެތުރުން އެއްކޮށް ހުއްޓުވޭނެކަމަށް ބެލެވޭކަމަށެވެ. 1918ވަނަ އަހަރު ފެތުރުނު ސްޕެނިޝް ފުލޫ ފެތުރުން ހުއްޓުވުމަށް އެއަށްވުރެ ދިގު މުއްދަތެއް ނެގިކަން ފާހަގަކުރައްވާ ތެޑްރޮސް ވިދާޅުވީ އެ ބަލިމަޑުކަމަށްވުރެ އަވަހަށް ކޯވިޑް-19 ފެތުރުން ހުއްޓުވޭނެކަމުގެ ޔަޤީންކަން އޮތްކަމަށެވެ. ތެޑްރޮސް ވިދާޅުވީ 1918ވަނަ އަހަރާ އަޅާބަލާއިރު ދުނިޔޭގެ ޤައުމުތައް އެއްކޮށް ގުޅިފައި އޮތް އޮތުމާއި ދަތުރުފަތުރުގެ ފަސޭހަތަކުގެ ސަބަބުން މި ޒަމާނުގައި ކޯވިޑް-19ގެ ނުރައްކާ ބޮޑުކަމަށެވެ. އެހާ އަވަސް އަދި ކުރު މުއްދަތެއްގެ ތެރޭގައި ދުނިޔޭގެ ހުރިހާ ސަރަޙައްދަކަށް ބަލީގެ އަސަރު ފޯރާފައިވަނީ އެ ސަބަބަށްޓަކައިކަމަށް އޭނާ ވިދާޅުވިއެވެ.
ނަމަވެސް 1918ވަނަ އަހަރާ އަޅާބަލާއިރު ބޮޑު ބަލިމަޑުކަމެއްގެ ސަބަބުން ކުރިމަތިވާ ޙާލަތްތައް ރަނގަޅުކުރުމަށް މިޒަމާނުގައި ގިނަ ވަޞީލަތްތަކެއް ލިބެންހުރިކަމަށް އޭނާ ވިދާޅުވިއެވެ. އޭގެ އިތުރުން ބަލިން ރައްކާތެރިކޮށްދޭނެ ވެކްސިނެއްގެ އުއްމީދު ބޮޑުވެފައިވާތީ 1918ވަނަ އަހަރުގެ ބަލިމަޑުކަން ފެތުރުން ހުއްޓުވުމަށް ނެގި މުއްދަތަށްވުރެ ކުރިން މިހާރު ކުރިމަތިވެފައިވާ ބަލިމަޑުކަމުން އަރައިގަނެވޭނެކަމަށް ޤަބޫލުކުރައްވާކަމަށް އޭނާ ވިދާޅުވިއެވެ.
މިދިޔަ އަހަރުގެ ޑިސެމްބަރު މަހުގެ ފަހުކޮޅު ޗައިނާގެ ވުހާން ސިޓީން ކޯވިޑް-19 ފުރަތަމަ ފެނުނު ފަހުން ދުނިޔޭގެ އެކި ސަރަޙައްދުތަކުގައި 22.75 މިލިއަނަށްވުރެ ގިނަ މީހުންނަށް އެ ބަލިވަނީ ޖެހިފައެވެ. އެ ބަލީގައި މިހާތަނަށް 794،814 މީހުންވަނީ މަރުވެފައެވެ. ނަމަވެސް ފަހުގެ ތާރީޚުގައި ކުރިމަރިވި އެންމެ ބޮޑު ބަލިމަޑުކަން ކަމުގައިވާ ސްޕެނިޝް ފުލޫގައި 1918ވަނަ އަހަރުގެ ފެބުރުއަރީ މަހާއި މި އަހަރުގެ އޭޕްރިލް މަހާ ދެމެދު 500 މިލިއަނަށްވުރެގިނަ މީހުންނަށް ބަލިޖެހި 50 މިލިއަން މީހުންވަނީ މަރުވެފައެވެ. އެމެރިކާއިން ފުރަތަމަ ފެނި ވިލާތުގެ ޤައުމުތަކަށާއި ދުނިޔޭގެ އެހެން ސަރަޙައްދުތަކަށް ފެތުރުނު އެ ބަލީގައި ފުރަތަމަ ބޮޑު ހަނގުރާމައިގައި މަރުވި މީހުންގެ ޢަދަދަށްވުރެ 5 ގުނަ އިތުރު މީހުންވަނީ މަރުވެފައެވެ.
ޑަބްލިއުއެޗުއޯގެ ކުއްލި ޙާލަތްތަކާބެހޭ އިސްވެރިޔާ މައިކް ރަޔަން ވިދާޅުވީ ސްޕެނިޝް ފުލޫގެ ބިޔަ ތިން ރާޅު އައިސްފައިވާކަމަށާއި ދެވަނަ އަދި އެންމެ ނުރައްކާތެރި ރާޅު ބިންދާލާފައިވަނީ 1918ވަނަ އަހަރުގެ ފަހު ހަމަހުގެ ތެރޭގައިކަމަށެވެ. ބަލި ޖެހުމުގެ ނުރައްކާ އެންމެ ބޮޑު މީހުންނަށް ބަލިޖެހިފައިވަނީ ތިން ރާޅެއްގެ މަތިންކަން ފާހަގަކުރައްވާ މައިކް ރަޔާން ވިދާޅުވީ އެއަށްފަހު ބަލިމަޑުކަން ހަމައަކަށް އެޅި އޭގެ ބާރު ދެރަވެ މޫސުމީ ރޯގާއަކަށް ބަދަލުވިކަމަށެވެ. މިހާރު ފެތުރެމުންދާ ކޯވިޑް-19 ފެތުރެނީ ތަފާތުކޮށްކަން ފާހަގަކުރައްވާ މައިކް ރަޔާން ވިދާޅުވީ ބަލި ފެތުރުން ހަމައަކަށް ނޭޅުވޭނަމަ އަވަސް އަވަހަށް ބަލީގެ ރާޅުތައް އުފެދެމުންދާކަން އެކަމުން ހާމަވެގެންދާކަމަށެވެ.