މާލެސިޓީގެ މޭޔަރު ސިފާ މުޙައްމަދުގެ އިތުބާރު ނެތްކަމުގެ މައްސަލައެއް ހުށައަޅާ، ޖަވާބުދާރީވުމަށް 10 ދުވަހުގެ މުހުލަތެއް ދީފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން އަދާކުރައްވަން ޖެހިވަޑައިގަންވާ ޒިންމާތަކާއި، މޭޔަރު ޚިލާފުވެވަޑައިގެންފައި ވާކަމަށް ތުހުމަތު ކުރައްވައި މޭޔަރުގެ އިތުބާރު ނެތްކަމުގެ މައްސަލަ އިއްޔެ ބޭއްވި ކައުންސިލް ބައްދަލުވުމަށް ހުށައަޅުއްވާފައި ވަނީ މާފަންނު އުތުރު ދާއިރާގެ ކައުންސިލް މެންބަރު މުޙައްމަދު ފަޒީނެވެ.
ކައުންސިލްގެ އިއްޔެގެ ބައްދަލުވުމުގައި މޭޔަރުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ފާސްވީ 9 މެންބަރުންގެ ވޯޓުންނެވެ. އަދި މޭޔަރު ކައުންސިލް ހިންގެވުމަށް އިހުމާލެވެވަޑައިގެންފައި ވާތީ އެކަމަށް ޖަވާބުދާރިވުމަށް 10 ދުވަހުގެ މުހުލަތެއް ދިނުމަށް މިބައްދަލުވުމުގައި ވަނީ ނިންމާފައެވެ. މާލެ ސިޓީކައުންސިލް އެކުލެވިގެން ވަނީ މޭޔަރާއި ޑެޕިއުޓީ މޭޔަރާއިއެކު ޖުމްލަ 13 މެންބަރުންގެ މައްޗަށެވެ.
މޭޔަރާއި ޑެޕިއުޓީ މޭޔަރުގެ އިތުބާރު ނެތްކަމުގެ މައްސަލައެއް މީގެ ކުރިންވެސް ކައުންސިލްގެ ބައްދަލުވުމަށް ހުށައެޅުމަށް މަސައްކަތްކޮށްފައި ވެއެވެ. ނަމަވެސް އެމައްސަލަ އެޖެންޑާނުކުރުމުން ލޯކަލް ގަވަރުމަންޓް އޮތޯރިޓީ، އެލްޖީއޭއަށްވެސް ހުށައެޅިއެވެ.
ކައުންސިލަށް ހުށައަޅާފައިވާ އިތުބާރު ނެތްކަމުގެ މައްސަލައާއި ގުޅޭގޮތުން ޕީއެސްއެމް ނިއުސް އާއި ވާހަކަފުޅު ދައްކަވަމުން މޭޔަރު ސިފާ މުޙައްމަދު ވަނީ އެކަމަނާގެ މައްޗަށް ފަޒީންކުރާ ތުހުމަތުތައް ދޮގުކުރައްވާފައެވެ. ސިފާ ވިދާޅުވީ، ސިޓީ ކައުންސިލގެ 3 އަހަރުގެ ދައުރު ފުރިހަމަކުރެއްވީ ވަރަށް ދަތި އުނދަގުލުގައި ކަމަށާއި، އެދަތިކަމުގައި މާލޭގެ ރައްޔިތުންނަށްޓަކައި ކުރެއްވި މަސައްކަތް ފެންނަން ހުންނާނެކަމަށެވެ. މިއީ ޒާތީ ގޮތުން ހުށައަޅުއްވާފައިވާ މައްސަލައެއްކަމަށް ތުހުމަތުކުރައްވާ ސިފާ ވިދާޅުވީ، ކައުންސިލްގައި ތިއްބެވި އެމްޑީޕީގެ އެއްވެސް މެންބަރަކު ވޯޓު ދެއްވާނެކަމަށް ޤަބޫލު ނުކުރެވޭކަމަށެވެ.
"މިއީ ސިޔާސީ ބަޔަކު ފަހަތުގައި ތިބެގެން ވަރަށް ބޮޑު ރޯލެއް އޮވެގން ކުރާ ކަމެއް. އަދިކިރިޔާ ތަނެއް ލިބިގެން އަޅުގަނޑުމެން މަސައްކަތް ފަށައިގަތީމި. މެންބަރު ފަޒީންނާއި، މެންބަރު އާދަމް މަނިކު ފިޔަވާ ދެންތިއްބެވި ހުރިހާ ބޭފުޅުން ނިކުމެ ކުރެއްވި ހުރިހާ މަސައްކަތް، ނުކުރާކަމަކަށް ދައްކަން ކުރާ ކަމެއްމިއީ. ޕާޓީގެ ޕްރައިމަރީން ފެއިލްވީމަ މާލޭ ސިޓީ ކައުންސިލް ލޮޅުން އަރުވާލުމަށް ކުރާ މަސައކްަތެއް. އެމްޑީޕީގެ މެންބަރުން ވޯޓު ދޭނެކަމަށް އަޅުގަނޑަކަށް ޤަބޫލެއް ނުކުރެވޭ." ސިފާ ވިދާޅުވިއެވެ.
ސިފާ ވަނީ 10 ދުވަހުގެ ތެރޭގައި އެމައްސަލައަށް ޖަވާބުދާރީ ވާނެކަމަށް ވިދާޅުވެފައެވެ.