ދެމެހެއްޓެނިވި ތަރައްޤީގެ ދާއިރާއިން ރާއްޖޭގައި ބާއްވާ އެންމެ ބޮޑު އިވެންޓު ފެން ފެސްޓިވަލް2021 އަންނަ އަހަރުގެ އޭޕްރީލް މަހުގައި ބޭއްވުމަށް ތައްޔާރުވާން ފަށައިފިއެވެ.
މި ފެސްޓިވަލަކީ ދެމެެއްޓެނިވި ގޮތެއްގައި އުފައްދާއެކި އީޖާދުތަކަށް އަމާޒުކޮށްގެން ރާއްޖޭގައި ބާއްވާ މިބާވަތުގެ އެންމެ ފުރަތަމަ އިވެންޓުކަމަށް ފެސްޓިވަލް އިންތިޒާމުކުރާ ފަރާތުން ވިދާޅުވެއެވެ. މި އިވެންޓު ރާއްޖޭގައި ބާއްވަނީ ދުނިޔޭގެ ބޮޑެތި ޖަމިއްޔާތަކާއި ބައެއް ދިވެހި ކުންފުނިތަކާއި ގުޅިގެންނެވެ.
ދެމެހެއްޓެނިވި ތަރައްޤީގެ ލަނޑުދަނޑިތަކަށް ވާސިލުވުމަށް ކުރިއަށްގެންދާ މިފެސްޓިވަލް ބާއްވަނީ ދ.އަތޮޅުގައެވެ. 2021 ވަނަ އަހަރުގެ އޭޕްރީލްމަހު ހަފްތާއެއްހައި ދުވަހަށް ދެމިގެންދާ ގޮތަށް ބާއްވާ މިއިވެންޓު ބާއްވަނީ ބަނިޔަން ޓްރީ އަންގސާނާ ވެލަވަރު އަދި ރިއު އެޓޯލްސްގައެވެ. މި އިވެންޓުގެ ތެރެއިން ބައިވެރިންނަށް ރާއްޖޭގއ ރީތި ގޮނޑުދޮށްތަކާއި މޫދާއި ގުދުރަތީ ރީތިކަން ތަޖުރިބާކޮށްލުމުގެ ފުރުސަތު ލިބިގެންދާނެކަމަށް "ފެން"އިން ވިދާޅުވެއެވެ.
ސިލްސިލާ މިފެސްޓިވަލްގައި ދުނިޔޭގެ ބޮޑެތި ބްރޭންޑްތަކާއި އޭޖެންސީތަކުން ބައިވެރިވުމަށް ހަމަޖެހިފައިވާކަމަށް "ފެން"އިން މަޢުލޫމާތުދެއެވެ. އެގޮތުން އިވެންޓުގައި ތަޤުރީރު ކުރާ ފާރާތްތަކުގެ ތެރޭގައި ގޫގުލް އާއި ނޭޝަނަލް ޖިއޮޖްރަފިކް އާއި ބްރިޓިޝް ޕެޓރޯލިއަމް އާއި ސީއެންއެން އާއި އޫބަރ އާއި ނާސާ އާއި ޔުނެސްކޯ އާއި އައިއެމްއެފް އާައި ބީއެމްޑަބްލިއު އާއި ޓޯރކީޑޯގެ އިސްފަރާތްތައް ހިމެނެއެވެ.
މިހާރު ފެސްޓިވަލްގައި ބައިވެރިވުމުގެ ފުރުސަތު ހުޅުވާލާފައިވާއިރު، www.fenn.events އިން އިތުރުމައުލޫމާތު ލިބިވަޑައިގަންނަވާނެއެވެ.
ރާއްޖެއަކީ ދެމެހެއްޓެނިވި ތަރައްޤީގެ ލަނޑުދަނޑިތަކަށް، ރޮނގުރޮނގުން މަސައްކަތްކުރަމުން އަންނަ ޤައުމެކެވެ. ރާއްޖޭގެ ނާޒުކު ވެށި ހިމާޔަތްކޮށް އިގްތިސާދު ކުރިއެރުވުމަށް ދެމެހެއްޓެނިވި ގޮތުގައި ތަރައްޤީ ގެނައުމަށް ރާއްޖެއަކީ އަބަދުވެސް މަސައްކަތްކުރާ ޤައުމެކެވެ.