ބެލަރޫސްގެ ސަލާމަތީ ކަންކަން ބެލެހެއްޓުމަށް ރަޝިޔާގެ އެހީތެރިކަމަށް ބޭނުންވެއްޖެ ހިނދެއްގައި އެހީތެރިކަން ފޯރުކޮށްދޭނެކަމަށް ރަޝިޔާއިން ބުނެފިއެވެ.
ބެލަރޫސްގެ ރިޔާސީ އިންތިޚާބު އެ ޤައުމުގެ ރައީސް އެލެކްސެންޑްރަ ލުކަޝެންކާ ބޮޑު އަޣުލަބިއްޔަތުން ކާމިޔާބުކުރެއްވުމުން އެ ޤައުމުގެ ގިނަ ޢަދަދެއްގެ ރައްޔިތުން ދަނީ އެކަމާ ދެކޮޅަށް މުޒާހަރާކުރަމުންނެވެ. 1994ވަނަ އަހަރުން ފެށިގެން ބެލަރުސްގެ ވެރިކަންކުރައްވާ ލުކަޝެންކާއަށް އިންތިޚާބު ކާމިޔާބުވާގޮތަށް ވޯޓުގެ ނަތީޖާ ބަދަލުކުރިކަމުގެ ތުހުމަތު އެޤައުމުގެ ގިނަ ޢަދަދެއްގެ ޢާންމުން ކުރެއެވެ. މުޒާހަރާތަކުގައި ދެ މީހުން މަރުވެފައި ވެއެވެ. އަދި އެތައް ހާސް މީހުންވަނީ ހައްޔަރުކޮށްފައެވެ. ރައީސް އެލެކްސެންޑްރަ ލުކަޝެންކާވަނީ މުޒާހަރާތައް ހުއްޓުވުމުގައި މިހާތަނަށް ނާކާމިޔާބުވެ ވަޑައިގެންފައެވެ. އަދި ބޭރުގެ ބަޔަކު ބެލަރޫސްގައި ހަމަނުޖެހުން އުފެއްދުމަށް މަސައްކަތްކުރަމުންދާކަމަށް އޭނާވަނީ ތުހުމަތުކުރައްވާފައެވެ.
ރަޝިޔާގެ ރައީސް ވްލަޑްމީރު ޕުޓިންއާ ފޯނު މެދުވެރިކޮށް ވާހަކަ ދެއްކެވުމަށްފަހު ލުކަޝެންކާ ވިދާޅުވީ ބޭރު ބައެއްގެ ސަބަބުން އަސްކަރީ ނުރައްކަލަށް ބެލަރޫސް ހުށަހެޅިއްޖެނަމަ ފުރަތަމަ ގޮވާލުމާއެކު ރަޝިޔާއިން އެހީތެރިކަން ފޯރުކޮށްދީ އެ ޤައުމުގެ ސަލާމަތްކަން ޔަޤީންކުރުމަށް މަސައްކަތް ކުރާނެކަމަށް ރަޝިޔާއިން ބުނެފައިވާކަމަށެވެ. އެ ފޯނު ކޯލަށްފަހު ރަޝިޔާއިން ނެރުނު ނޫސް ބަޔާނެއްގައި ސަލާމަތީ ކަންކަން ޔަޤީންކުރުމަށް އެހީތެރިކަން ފޯރުކޮށްދިނުމާބެހޭ އެއްވެސް ވާހަކައެއް ބަޔާންކޮށްފައެއް ނުވެއެވެ. ނަމަވެސް ބެލަރޫސްގައި ހިންގަމުންދާ ހަމަނުޖެހުންތަކާއި އެ ޤައުމަށް ކުރިމަތިވެފައިވާ މައްސަލަތައް ވަރަށް އަވަހަށް ޙައްލުވާނެކަމަށް އެ ބަޔާނުގައި ވަނީ ބުނެފައެވެ.
ނޭޓޯއާއި ވިލާތުގެ އިއްތިޙާދާ މުޢާމަލާތްކުރުމުގައި ބެލަރޫސްއަކީ މުހިންމު ބައިވެރިއެއްކަމަށް ރަޝިޔާއިން ދެކެއެވެ. ނަމަވެސް ލުކަޝެންކާގެ ސަރުކާރަށް ދެމުންދިޔަ މާލީ އެހީތެރިކަން ރަޝިޔާއިން މަދުކުރުމުން ބެލަރޫސްގެ އިންތިޚާބުގެ ކުރިން ރަޝިޔާއާ އެ ޤައުމާ ދެމެދު އޮތް ގާތް ގުޅުންވަނީ ކޮންމެވެސް ވަރަކަށް ހީނަރުވެފައެވެ.