ދުނިޔޭގެ އެންމެ ބޮޑު އެއް ޓެކް ކުންފުނި، ގޫގުލްއިން އެމެރިކާ، އިނގިރޭސިވިލާތް އަދި ސްޕެއިން ޓްރާންސްއެޓްލާންޓިކް ޑޭޓާ ކޭބަލްއަކުން ގުޅާލަން ނިންމައިފިއެވެ.
ގޫގުލްއިން ބުނީ އެމެރިކާ، އިނގިރޭސިވިލާތް އަދި ސްޕެއިން ގުޅާލާ ޓްރާންސްއެޓްލާންޓިކް ކޭބަލްއަކީ ކަނޑުއަޑިން އަޅާ ކޭބަލްއެއްކަމަށެވެ. އަދި އަލަށް ކޭބަލްއަކީ މިހާރު އަޅާފައިވާ މިފަދަ ކޭބަލްތަކާއި އަޅާބަލާއިރު ޓެކްނޮލޮޖީގެ ގޮތުން ފެންވަރު ރަނގަޅު ކޭބަލްއެއްކަމަށެވެ. ގޫގުލްއިން ބުނީ އެމެރިކާ، އިނގިރޭސިވިލާތް އަދި ސްޕެއިން ގުޅާލަދޭ ކޭބަލް އެޅުމުގެ މަސައްކަތް 2022 ވަނަ އަހަރު ނިންމާލެވޭވަރުވާނެކަމަށެވެ.
ކަނޑުއަޑީގައި އާއްމު ގޮތެއްގައި މިފަދަ ކޭބަލްތައް އަޅަނީ މުވާސަލާތީ ޚިދުމަތްދޭ ކުންފުނިތަކުންނެވެ. އެކުންފުނިތަކުން ކޭބަލްތައް އެޅުމަށްފަހު، އެ ކޭބަލް އެހެން ކުންފުނިތަކަށް ބޭނުންކުރެވޭނީ ފީއެއް ދައްކައިގެނެވެ.
ގޫގުލްއިން އަޅާ ކޭބަލްއަށް "ގްރޭސް ހޮޕަރ"ގެ ނަން ދީފައިވާއިރު، އެއީ އެމެރިކާގެ ކޮމްޕިއުޓަރ ސައިންޓިސްޓެއްގެ ނަމަށް ނިސްބަތްކޮށް ދީފައިވާ ނަމެކެވެ. އަދި މިއީ ގޫގުލްއިން ކަނޑުއަޑީގައި އަޅާ މިފަދަ 4 ވަނަ ކޭބަލްއެވެ.
މުވާސަލާތީ ޚިދުމަތްދޭ ކުންފުނިތަކަށް ކަނޑުއަޑީގައި އަޅާ ޑޭޓާ ކޭބަލްއިން ބޮޑެތި ފައިދާތަކެއް ކުރާއިރު، މިފަދަ އެންމެ ފުރަތަމަ ކޭބަލް އަޅާފައިވަނީ 1858 ވަނަ އަހަރު އަޔަރލެންޑާއި އެމެރިކާއާ ދެމެދުއެވެ. އަދި މިއަދު ގާތްގަނޑަކަށް 750000 މޭލުގެ ޑޭޓާ ކޭބަލް ކަނޑުއަޑީގައި އަޅާފައިވެއެވެ.
ކޯވިޑްއާއެކު އިންޓަނެޓްގެ ބޭނުން ބޮޑުވެ، ޑިމާންޑު ބޮޑުވަމުންދާއިރު، އިންޓަނެޓްގެ ސްޕީޑް ހަލުވިކުރަން ޓެކް ކުންފުނިތަކުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މައިކްރޯސޮފްޓާއި ފޭސްބުކްއިންވެސް ދަނީ ކަނޑުއަޑީގެ ޑޭޓާ ކޭބަލް އެޅުން ފަދަ އިންފްރާސްޓްރަކްޗަރތައް ޤާޢިމްކުރަމުންނެވެ.