ޤަލްފުގެ މައްސަލަ މާބޮޑަށް ދިގުލައިގެން ގޮސްފައިވާކަމަށާއި އެ މައްސަލައިގެ ސަބަބުން ސަރަޙައްދީ އަމާންކަމާއި ކުރިއެރުމަށް ހުރަސްއެޅޭކަމަށް އެމެރިކާއިން ބުނެފިއެވެ.
ނިރުބަވެރި ޖަމާޢަތްތަކަށް އެހީތެރިވެ، އީރާނަށް އެއްބާރުންދޭކަމަށް ބުނެ ގަލްފުގެ ބާރުތައްކަމަށްވާ ސަޢުދީ ޢަރަބިއްޔާއާއި ޔޫއޭއީއާއި ބަޙުރައިނުންވަނީ 2017ވަނަ އަހަރުގެ ޖޫން މަހު ޤަތަރާއެކު އޮންނަ ސިޔާސީ އަދި ވިޔަފާރީގެ ގުޅުންތައް ކަނޑާލައިފައެވެ. އެ ޤައުމުތަކާއެކު މިޞްރުންވެސް ޤަތަރާއެކު އޮންނަ ގުޅުން ކަނޑާލިއެވެ. އެ ޤައުމުތަކުން ކުރާ ތުހުމަތުތައް ޤަތަރުން ދޮގުކުރެއެވެ.
ގަލްފު ކޯޕަރޭޝަން ކައުންސިލު، ޖީސީސީގައި ހިމެނޭ ކުވައިތާއި ޢުމާނުންވަނީ ގަލްފުގެ މައްސަލަ ޙައްލުކުރުމަށް މަސައްކަތްކޮށްފައެވެ. އެމެރިކާއިންވެސް ދަނީ މައްސަލަ ޙައްލުކުރުމަށް އެހީތެރިވުމަށް މަސައްކަތްކުރަމުންނެވެ. ނަމަވެސް މިހާތަނަށް އެ މަސައްކަތްތައް ކާމިޔަބުވެފައެއް ނުވެއެވެ.
ޤަތަރުގެ ވެރިރަށް ދައުހާގައި އެ ޤައުމުގެ ޚަރިޖީ ވަޒީރު ޝެއިޚު މުޙައްމަދު ބިން ޢަބްދުލްރަޙުމާން އައްޘާނީއާ ބައްދަލުކުރެއްވުމަށްފަހު ނޫސްވެރިންނާ ވާހަކަދައްކަވަމުން އީރާނަށް ކަނޑައަޅާފައިވާ އެމެރިކާގެ ޚާއްޞަ މަންދޫބު ބުރަޔަން ހުކު ވިދާޅުވީ ގަލްފުގެ މައްސަލަ ވަރަށް ބޮޑަށް ދިގުލައިގެން ގޮސްފައިވާކަމަށާއި އެ މައްސަލައިގައި ހިމެނޭ ހުރިހާ ޤައުމުތަކުގެ މަޞްލަޙަތަށް އެންމެ ރަނގަޅު ގޮތަކީ އެ މައްސަލަ އަވަހަށް ނިމުމަމަކަށް ގެނައުންކަމަށެވެ.
ފާއިތުވި އަހަރުތަކުގައި ގަލްފުގެ މައްސަލަ ޙައްލުކުރުމަށް އެއްވެސް ކުރިއެރުމެއް ލިބިފައިނުވާކަމަށާއި އެއްވެސް ކޮޅެއްގައި ނުޖެހި މައްސަލަ ދިގުލައިގެން ގޮސްފައިވާކަން ފާހަގަކުރައްވަމުން ހުކު ވިދާޅުވީ އެ މައްސަލައާ ގުޅޭގޮތުން ކުވައިތުގެ އިސްވެރިންނާއެކު މަޝްވަރާކުރެއްވުމަށް އެ ޤައުމަށް ވަޑައިގަންނަވާނެކަމަށެވެ. އަދި އެމެރިކާއާއި ކުވައިތުގެ ދައުރަކީ މައްސަލައިގައި ހިމެނޭ ޤައުމުތަކުގެ މެދުގައި މަޝްވަރާތައް ކުރުމަށް ބާރު އަޅައި މައްސަލަ ޙައްލުކުރުމަށް އަލި މަގެއް ހޯދުމަށް އެހީތެރިވެދިނުންކަމަށް އޭނާ ވިދާޅުވިއެވެ.