އިސްރާއީލުން އިސްތިޢުމާރުކޮށްފައިވާ ސޫރިޔާގެ ޖައުލާންގެ އުސްބިންތަކަށް ސޫރިޔާއިން މިސައިލު ޙަމަލާތަކެއް ދިންކަމަށް ބުނެ، އިސްރާއީލުން ސޫރިޔާއަށް ވައިގެ ޙަމަލާތަކެއް ދީފިއެވެ.
ސޫރިޔާގެ ރަސްމީ ނޫސް އިދާރާއިން ބުނީ އެ ޤައުމުގެ ދެކުނުގައި އޮންނަ ޤުނައިޠުރާގެ އަސްކަރީ ތިން މަޤާމަކަށް އިސްރާއީލުގެ ވައިގެ ޙަމަލާތަކެއް އަމާޒުވިކަމަށާއި އެ ޙަމަލާތަކުގައި ދެ މީހުން ޒަޚަމްވިކަމަށެވެ. އިސްރާއީލުން އެ ޙަމަލާ ދީފައިވަނީ ޖައުލާންގެ އުސްބިންތަކުގައި ގޮވުންތަކެއް ގޮވައި އިސްރާއީލުގެ އަސްކަރީ އުޅަނދަކަށް ގެއްލުންވުމުގެ ބަދަލެއްގެ ގޮތުންނެވެ.
ފާއިތުވި ދުވަސްތަކުގައި އިސްރާއީލާއި ސޫރިޔާއާ ދެމެދުވަނީ ނުތަނަވަސްކަން އިތުރުވެފައެވެ. އޭގެ އެންމެ ބޮޑު ސަބަބަކީ ލުބުނާނުގެ ޙިޒްބުﷲ ޖަމާޢަތުގެ ހަނގުރާމަވެރިއެއް ސޫރިޔާގެ ދިމިޝްޤުގައި ހުއްޓައި އިސްރާއީލުން ޙަމަލާދީ އޭނާ މަރާލުމެވެ. އިރާނާއި ސޫރިޔާގެ ސަރުކާރާ ގާތް ގުޅުންތަކެއް އޮންނަ ޙިޒްބުﷲއަށް އަމާޒުކޮށް އިސްރާއީލުން ދެމުންދާ ޙަމަލާތަކުގައި އެ ޖަމާޢަތުގެ އެތައް ސަތޭކަ ހަނގުރާމަވެރިންނެއްވަނީ މަރުވެފައެވެ.