ފިއުލް ސަޕްލައި މޯލްޑިވްސް، އެފްއެސްއެމްގެ ފިއުލް ސްޓޭޝަނެއް ތިލަފުށީގައި ހުޅުވައިފިއެވެ.
އެފްއެސްއެމްއިން ބުނީ ބުރާސްފަތިދުވަހު ތިލަފުށީގައި ހުޅުވި ފިއުލް ސްޓޭޝަނުން އެއްގަމާއި ކަނޑު އުޅަނދުފަހަރަށް ޑީސަލްއާއި ޕެޓްރޯލް އަޅައިދިނުމުގެ ޙިދުމަތް ލިބިގެންދާނެކަަމަށެވެ. އެފްއެސްއެމްއިން ކުރިންވެސް ތިލަފުށީގައި ބައެއް އުޅަނދުތަކަށް ޕެޓްރޯލާއި ޑީސަލް ފޯރުކޮށްދިނުމުގެ ޙިދުމަތް ދިޔައީ ދެމުންނެވެ. ނަމަވެސް އަލަށް ހުޅުވި ފިއުލް ސްޓޭޝަނާއެކު ޙިދުމަތް އިތުރަށް ފުޅާވެ، ހުރިހާ ބާވަތެއްގެ އުޅަނދަކަށްވެސް މިހާރު ފިއުލް ފޯރުކޮށްދެވޭނެކަމަށް އެ ކުންފުނިން ބުނެއެވެ. އެގޮތުން ސައިކަލާއި، ޕިކަޕާއި، ކާރުވެސް ހިމެނެއެވެ.
އެފްއެސްއެމްގެ ތިލަފުށީ ފިއުލް ސްޓޭޝަން ހުޅުވާފައި ހުންނާނީ ހޮނިހިރު ދުވަހުން ބުރާސްފަތި ދުވަހަށް ކޮންމެ ދުވަހެއްގެ ހެނދުނު 8:30 އިން ރޭގަނޑު 9:00 އަށެވެ. އަދި ހުކުރު ދުވަހުގެ ހަވީރު 03:00 އިން ރޭގަނޑު 9:00 އަށް ޙިދުމަތް ލިބޭނެއެވެ.
އެފްއެސްއެމްއިން އަންނަނީ މާލޭ އަދި ހުޅުމާލޭގައިވެސް އެ ކުންފުނީގެ ޙިދުމަތްދެމުންނެވެ. އެފްއެސްއެމްއަކީ އެސްޓީއޯގެ ސަބްސިޑަރީ ކުންފުންޏެކެވެ.