ޕާކިސްތާނުގެ ޚާރިޖީ ވަޒީރު ޝާހް މަޙްމޫދު ޤުރައިޝީ ކޯވިޑް-19 އަށް ޕޮޒިޓިވްވެއްޖެއެވެ.
ކޯވިޑް-19އަށް ޕޮޒިޓިވްވެފައިވާކަން 64 އަހަރުގެ ޝާޙް މަޙްމޫދު ޤުރައިޝީވަނީ ޓުވިޓަރ މެދުވެރިކޮށް ހާމަކުރައްވާފައެވެ.
އޭނާ ވިދާޅުވީ މިއަދު ހަވީރު ހުމުގެ އަލާމާތެއް ފެނިގެން އަމިއްލަފުޅަށް ގޭގައި ކަރަންޓީން ވެވަޑައިގެންނެވިކަަމަށާއި އަދި ޓެސްޓްކުރުމުން ކޯވިޑް-19 އަށް ޕޮޒިޓިވްވެފައިވާކަމަށެވެ.
ބައްޔަށް ޕޮޒިޓިވްވި ނަމަވެސް ﷲގެ ވާގިފުޅާއެކު އޭނާގެ ހާލު ރަނގަޅުކަމަށާއި ގޭގައި ހުރެގެން މައްސޫލިއްޔަތު އަދާކުރައްވަމުން ގެންދަވާނެކަމަށް އޭނާ ވަނީ ވިދާޅުވެފައެވެ.
ޕާކިސްތާނުގެ ޚާރިޖީވަޒީރު ކޯވިޑް-19 އަށް ޕޮޒިޓިވްވުމާއި ގުޅިގެން ރާއްޖޭގެ ޚާރިޖީ ވަޒީރު އަބްދުﷲ ޝާހިދުވަނީ ޝާހް މަޙްމޫދު ޤުރައިޝީއަށް އަވަސް ޝިފާއެއް މިންވަރުކުރެއްވުން އެދި ދުޢާކުރައްވާކަމުގައި ވިދާޅުވެ ޓްވީޓްކުރައްވާފައެވެ.
ޕާކިސްތާނުގެ ޚާރިޖީ ވަޒީރު ކޯވިޑް-19އަށް ޕޮޒިޓިވެފައިވާއިރު އެޤައުމު ފާހަގަކުރެވެނީ ދުނިޔޭގައި 12 ވަނައަށް އެންމެ ގިނަ މީހުން ކޯވިޑް19އަށް ޕޮޒިޓިވެފައިވާ ޤައުމުގެ ގޮތުގައެވެ. އެގޮތުން މިހާތަނަށް އެޤައުމުގައި 221,896 މީހުން ކޯވިޑް-19 އަށް ޕޮޒިޓިވެވެ، 4,551 މީހުންވަނީ މި ބަލީގައި މަރުވެފައެވެ. އަދި 113,623 މީހުން ވަނީ އެޤައުމުގައި ބަލިން ރަނގަޅުވެފައެވެ.