އޮސްޓްރޭލިޔާއާއި ވިލާތުގެ އިއްތިޙާދާ ދެމެދު އޮންނަ އެއްބަސްވުމަށް އިނގިރޭސިވިލާތުގެ ޝައުޤުވެރިކަން
ވިލާތުގެ އިއްތިޙާދުން އިނގިރޭސިވިލާތް ވަކިވުމުން ދެ ފަރާތުގެ ދެމެދުގައި އޮންނާނެ އިޤްތިޞާދީ ގުޅުމާގުޅޭ އެއްބަސްވުމެއް އެކުލަވާނުލެވިއްޖެނަމަ އޮސްޓްރޭލިޔާއާއި ވިލާތުގެ އިއްތިޙަދާ ދެމެދު އޮންނަފަދަ އެއްބަސްވުމެއް ޤާއިމުކުރަން ތައްޔާރަށް އޮތްކަމަށް އިނގިރޭސިވިލާތުން ބުނެފިއެވެ.
މިދިޔަ ޖެނުއަރީ މަހު ވިލާތުގެ އިއްތިޙާދުން އިނގިރޭސިވިލާތުންވަނީ ރަސްމީކޮށް ވަކިވެފައެވެ. އައު ޤަވާއިދުތަކެއް އެކުލަވާލެވެންދެން މި އަހަރުގެ ނިޔަލަށް ޢަމަލުކުރަމުންދާނީ އިނގިރޭސިވިލާތަކީ ވިލާތުގެ އިއްތިޙާދުގެ ޤައުމެއްގެ ގޮތުގައި ދެކިގެންނެވެ. މިއަހަރުގެ ޑިސެންބަރުގެ މަހުގެ 31ވަނަ ދުވަހު އިންތިޤާލީ މަރުޚަލާ ނިމުމަކަށް އައުމުގެ ކުރިން ދެ ފަރާތުގެ މެދުގައި މިނިވަން ވިޔަފާރީގެ އެއްބަސްވުމެއް އެކުލަވާލެވޭނެކަމާމެދުވަނީ ސުވާލު އުފެދިފައެވެ. އައު ޤަވާއިދުތަކެއް އެކުލަވާލުމަށް ދެ ފަރާތުގެ މެދުގައި ކުރާ މަޝްވަރާތަކަށް ބޮޑު ކުރިއެރުމެއް އައިސްފައެއް ނުވެއެވެ. ނަމަވެސް އިންތިޤާލީ މަރުހަލާގެ މުއްދަތު އިތުރުކުރަން ބޭނުން ނުވާކަމަށް އިނގިރޭސިވިލާތުންވަނީ ތަކުރާރުކޮށް ބުނެފައެވެ. ކުރިއަށް އޮތް ހަފުތާގެ ތެރޭގައި އިތުރު މަޝްވަރާތަކެއް ފެށުމަށް ދެ ފަރާތުން ދަނީ ތައްޔާރުވަމުންނެވެ.
ޕޮލެންޑުގެ ބޮޑުވަޒީރު މަތެއުޝް މޮރަވިއެކްސްކީއާއެކު ބޭއްވެވި ބައްދަލުވުމެއްގައި ވާހަކަދައްކަވަމުން އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން ވިދާޅުވީ އެއްބަސްވުމަކާ ހަމައަށް ނާދެވިއްޖެނަމަ އޮސްޓްރޭލިޔާއާއި ވިލާތުގެ އިއްތިޙާދާ ދެމެދު އޮންނަފަދަ ވިޔަފާރީގެ އެއްބަސްވުމެއް އިންތިޤާލީ މަރުޙަލާއަށްފަހު ޤާއިމުކުރައްވާނެކަމަށެވެ.
ބޮޑުވަޒީރުގެ ރަސްމީ އިދާރާއިން ބުނީ ކުރިއަށް އޮތް މަޝްވަރާތަކުގައި ރަނގަޅު އެއްބަސްވުމަކާ ހަމައަށް އައުމަށް ބޮޑުވަޒީރު ޖޮންސަން މަސައްކަތްކުރައްވާނެކަމަށެވެ. ނަމަވެސް ހަރުދަނާ އެއްބަސްވުމަކާ ހަމައަށް ނާދެވިއްޖެނަމަ އިންތިޤާލީ މަރުޙަލާ ނިމުމަކަށް ގެނެސް އޮސްޓްރޭލިޔާގެ އުޞޫލުތަކާ އެއްގޮތަށް ޢަމަލުކުރަން ނިންމަވަން ބޮޑުވަޒީރު ފަސްޖެހިވަޑައިނުގަންނަވާނެކަމަށް އެ އިދާރާއިން ބުންޏެވެ.
އޮސްޓްރޭލިޔާއާއި ވިލާތުގެ އިއްތިޙާދާ ދެމެދު އޮންނަ ވިޔަފާރީގެ އެއްބަސްވުމަކީ ދުނިޔޭގެ ވިޔަފާރި ޖަމްޢިއްޔާ، ވޯލްޑު ޓުރޭޑު އޯގަނައިޒޭޝަނުގެ ޤަވާއިދުތަކާ އެއްގޮތަށް އެކުލަވާލައިފައިވާ އެއްބަސްވުމެކެވެ. އެ އެއްބަސްވުމުގެ ދަށުން ވަކި ބާވަތްތަކުގެ މުދާ ވިއްކުމާ ގުޅޭގޮތުން ޚާއްޞަ އުޞޫލުތަކެއްވަނީ ހިމަނައިފައެވެ.