އެމްޓީސީސީގެ ޗީފް ފައިނޭންޝިއަލް އޮފިސަރގެ މަޤާމުގައި ހުންނެވި މުޙައްމަދު ހިލްމީ އެ މަޤާމުން ވަކިކޮށްފިއެވެ.
ހިލްމީ އެ މަޤާމުން ވަކިކުރުމަށް ނިންމާފައިވަނީ އިއްޔެ ބޭއްވި އެމްޓީސީސީގެ ޑިރެކްޓަރުންގެ ބޯޑުގެ ޖަލްސާގައެވެ. އެމްޓީސީސީން ބުނީ ކުންފުނީގެ ޗީފް ފައިނޭންޝަލް އޮފިސަރގެ މަޤާމުގައި ހުންނެވި މުޙައްމަދު ހިލްމީ 18 ޖޫން 2020 އިން ފެށިގެން އެ މަޤާމުން ވަކިކޮށްފައިވާކަމަށެވެ. ނަމަވެސް ވަކިކުރެއްވި ސަބަބެއް ހާމައެއް ނުކުރައްވައެވެ.
އެމްޓީސީސީގެ ޑިރެކްޓަރުންގެ ބޯޑުގައި ހިމެނެނީ 6 ބޭފުޅުންނެވެ. އެއީ ސަރުކާރުގެ ފަރާތުން އައްޔަންކުރައްވާފައިވާ 4 ބޭފުޅަކާއި، އާންމު ހިއްސާދާރުން އައްޔަންކުރައްވާ 2 ބޭފުޅެކެވެ.
ސަރުކާރުގެ ފަރާތުން އައްޔަންކުރައްވާފައިވަނީ ޗެއަރމަން މުހައްމަދު ފަހީމްއާއި، ސީއީއޯ އާދަމް އާޒިމްއާއި، ސީއޯއޯ ޝާހިދު ހުސައިން މޫސާގެ އިތުރުން ޑިރެކްޓަރ ސިނާން އަލީއެވެ. އާންމު ހިއްސާދާރުން ތަމްސީލުކުރުމަށް ޑިރެކްޓަރުންގެ ގޮތުގައި އިންތިޚާބުކޮށްފައިވަނީ ފަތުހުﷲ އިސްމާޢީލްއާއި އަހުމަދު އަބޫބަކުރުއެވެ. މިދެބޭފުޅުންވެސް އިންތިހާބްކޮށްފައިވަނީ މިދިޔަ އަހަރު ބޭއްވި އަހަރީ އާންމު ޖަލްސާގެ ތެރެއިންނެވެ.