ރައްޔިތުންގެ މަޖިލީހުގެ އިދާރާގެ މުވައްޒަފަކު ކޯވިޑް-19 އަށް ޕޮޒިޓިވްވެ މަޖިލީހީހުގެ އިދާރާ ބަންދުކޮށްފިއެވެ.
ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރ ހަސަން ޒިޔާއު ވިދާޅުވީ މަޖިލީހުގެ އިދާރާގެ މެއިންޓަނަންސް ސެކްޝަންގައި މަސައްކަތް ކުރާ ފިރިހެން މުވައްޒަފަކު ކޯވިޑް-19 އަށް ޕޮޒިޓިވްވެފައިވާ ކަމަށާއި އެޗްޕީއޭއާ ގުޅިގެން މިހާރު ކޮންޓެކްޓް ޓްރޭސިންގ ކުރިއަށްދާ ކަމަށެވެ.
ޒިޔާއު ވިދާޅުވީ މަޖިލީހުގެ އިދާރާގައި 140 އަށް ވުރެ ގިނަ މުއައްޒަފުން މަސައްކަތް ކުރަމުންދާ ކަމަށެވެ. މަޖިލީހުގެ އިދާރާ މިހާރު ބަންދުކޮށްފައިވާ ކަމަށާއި މަޖިލީހުގެ މަސައްކަތްތައް ދެން ކުރިއަށް ގެންދާނީ އެޗްޕީއޭއިން ދެއްވާ ލަފާގެ މަތިން ކަމަށްވެސް ޒިޔާއު ވިދާޅުވިއެވެ.
މަޖިލީހުގެ ޖަލްސާތަކާބެހޭގޮތުން ހަސަން ޒިޔާއު ވިދާޅުވީ މަޖިލީހުގެ އިދާރާ ޑިސްއިންފެކްޓް ކުރުމުގެ މަސައްކަތް ކުރަމުންދާ ކަމަށާއި ޑިސްއިންފެކްޓް ކުރުމަށްފަހު އަންނަ ހަފްތާގައި ޖަލްސާތައް ބާއްވާނެ ކަމަށެވެ.
ރާއްޖޭގައި މިހާތަނަށް ކޯވިޑް-19 އަށް 2094 މީހުން ޕޮޒިޓިވްވެ މީގެ ތެރެއިން 1670 މީހުންވަނީ ބަލިން ރަނގަޅުވެފައެވެ. އަދި ކޯވިޑް-19 ޖެހިގެން 8 މީހަކު ރާއްޖެއިން މަރުވެފައެވެ.