މެލޭޝިޔާގެ ވެރިރަށް ކުއަލަލަންޕޫރުން މިހަފްތާގައި އަންނަ މޯލްޑިވިއަންގެ 2 ފުލައިޓްގެ ބެގޭޖް އެލަވަންސްއަކީ 30 ކިލޯކަމަށް އެ އެއަރލައިނުން ބުނެފިއެވެ.
މޯލްޑިވިއަނުން ބުނީ މިމަހުގެ 15 އަދި 17 ވަނަ ދުވަހު ކުއަލަލަންޕޫރުން އަންނަ ފުލައިޓްގައި ކަސްޓަމަރުންނަށް ގެނެވޭނީ 30 ކިލޯކަމަށެވެ. އެ އެއަރލައިނުން ބުނީ ބައެއް ޓިކެޓްތަކުގައި ކަސްޓަމަރުންނަށް ގެނެވޭނީ 20 ކިލޯކަމަށް ޖެހިފައިވާކަމަށެވެ. ނަމަވެސް މިއީ އޮޅުމެއްކަމަށް މޯލްޑިވިއަނުން ބުނެއެވެ.
ޤައުމީ އެއަރލައިންނަށްވެހުރި ކޯވިޑް19 ގެ މިދަނޑިވަޅުގައި މޯލްޑިވިއަނުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖެއިން ބޭރުގެ އެކި ޤައުމުތަކުގައި ތިބި ދިވެހިން ރާއްޖެ ގެނައުމާއި، ރާއްޖެއަށް ބޭނުންވާ ކާބޯތަކެއްޗާއި ޒަރޫރީ އެހެނިހެންވެސް ތަކެތި މޯލްޑިވިއަންގެ ފްލައިޓްތަކުގައި ރާއްޖެ އަންނަނީ ގެނެސްދެމުންނެވެ.
ކޯވިޑް-19އާ ގުޅިގެން ބޭރުގެ ޤައުމުތަކުގައި ރާއްޖެއަށް ނާދެވިފައިތިބި ދިވެހިން ގެނައުމަށް މިހާތަނަށް 38 ދަތުރުކޮށް، 4000 ދިވެހިން މޯލްޑިވިއަންގެ ޕްލައިޓްތަކުގައި ރާއްޖެ ވަނީ ގެނެސްފައެވެ. އަދި މޯލްޑިވިއަންގެ ކާގޯ ފްލައިޓުތަކުގައި މިހާތަނަށް 700 ޓަނުގައި ކާގޯ ރާއްޖެއަށް އެ އެއަރލައިނުން ވަނީ ގެނެސްފައެވެ.