ވެލާބިސްވަޅަކުން ނުކުތް އެތައް ސަތޭކަ ކުދި ވެލާތަކަކަށް މަގުއޮޅި މ މުލީ މަގުމަތީގައި ދުވަނިކޮށް ފެނިއްޖެއެވެ.
މ މުލިން މައުލޫމާތު ދިން މީހަކު ބުނީ، ރަށުގެ މެދެއްހާ ހިސާބުން ވެލާތައް ފެނުނީ ރޭގެ ފަތިސްވާން އުޅެނިކޮށް ކަމަށެވެ. ވެލާތަށް ފެނުނީ މުލީ ރީޖަނަލް ހޮސްޕިޓަލް ކައިރިން މަގުމަތިންނެވެ.
ވެލާތައް މަގުމަތީގައި އުޅޭކަން ފާހަގަވީވެސް މުލީ ރީޖަނަލް ހޮސްޕިޓަލްގެ ކައުންޓަރ އޭރިއާއަށް ބައެއް ވެލާތައް ވަނުމުން ކަމުގައި އޭނާ ބުންޏެވެ.
ވެލާ ބިސްވަޅަކުން ނުކުތް ވެލާތައް މަގުއޮޅި ރަށުތެރެއަށް އައިސް ފައިބާފައި ވަނީ، ވާރޭވެހިގެން މަގުގައި ހެދިފައި އޮތް ފެންގަނޑެއްގެ ތެރެއަށެވެ.
މުލިން ވާހަކަދެއްކި މީހަކު ބުނީ، ވެލާތައް މަގުމަތީގައި އުޅޭތަން ފެނިގެން ފުލުހުންނަށް ރިޕޯޓް ކުރުމުން، މަގުމަތިން ވެލާތައް ހޮވައި ނަގައިގެން ގެންގޮސް ފަތިހު މޫދަށް ދޫކޮށްލާފައި ވާކަމަށެވެ.
ކުރިން މުލީ ރީޖަނަލް ހޮސްޕިޓަލާއި އެރަށުގެ އިރުމަތީ ފަރާތު މޫދާއި ގާތްނަމަވެސް، ބިންހިއްކައި ބޮޑު ކުރިފަހުން ގޮނޑުދޮށާއި ހޮސްޕިޓަލާއި ދެމެދުގައި ވަރަށް ބޮޑު ޖާގައެއް އޮވެއެވެ. އަދި އެދިމާއިން ގޯތި ދޫކޮށް މީހުންވެސް އާބާދުވާން ވަނީ ފަށާފައެވެ.
ބައެއް މީހުން ލަފާކޮށްފައިވާ ގޮތުގައި ވެލާތަަކަށް މަގު އޮޅިގެން ރަށުތެރެއަށް އަރާފައި ވަނީ، ވެލާ ބިސްވަޅު އެއްގަމުގެ ކޮންމެވެސް ހިސާބެއްގައި ހުރުމުގެ ސަބަބުންނެވެ.
ވެލާ ކަނހަބަކީ އެސޮރު ބޮޑުވެ ބިސްއަޅާ އުމުރަށް ދިޔުމުން، އުފަންވި ތަނަން ބިސްއަޅަން އަންނަ އެއްޗެކެވެ.
ރާއްޖޭގައި ވެލާ ކަހަނބު ހިފުން މަނާކޮށްފައިވާތާ އެތައް އަހަރެއް ވަނީ ވެފައެވެ.
މުލީ ރަށުތެރެއިން ރޭ ކުދި ވެލާތަކެއް ފެނުނު އިރު، އެރަށަކީ، ރާއްޖޭގައި ކަންޒުކަހަނބު ދިރިއުޅޭ މަދުރަށްތަކުގެ ތެރޭގައި ހިމެނޭ ރަށެކެވެ. އެރަށުގެ ކިލާގަނޑޭ ކިޔާ ސަރަހައްދުގައި ކަންޒު ކަނބު ދިރިއުޅޭއިރު މަދުމަދުން ރަށުތެރެއިން ކަންޒުކަަނބުވެސް ފެނެއެވެ.
ދަ ވެލާ
މަގު އޮޅުނީ ވެލާއަކަށް ނޫން... އިންސާނުންނަށް...