މިނިސްޓަރ އޮފް ހައުސިންގ އެންޑް އަރބަން ޑިވެލޮޕްމަންޓްގެ މަގާމުން އިސްތިޢުފާ ދެއްވި އާމިނަތު ޢާޠިފާ، އެ މަގާމުގައި ހުންނަވައިގެން ކޮށްދެއްވި ޚިދުމަތްތަކަށް ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޝުކުރު އަދާކުރައްވައިފިއެވެ.
މިއަދު މެންދުރުފަހު އޮންލައިންކޮށް ބޭއްވެވި ވަޒީރުންގެ މަޖިލީހުގެ ޖަލްސާގައި ހައުސިންގ އެންޑް އަރބަން ޑިވެލޮޕްމަންޓް މިނިސްޓަރުގެ މަގާމުގައި ހުންނަވައިގެން ޢާޠިފާ ކޮށްދެއްވި ޚިދުމަތްތައް ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ވަޒީރުންގެ މަޖިލީހުގެ މެންބަރެއްގެ ހައިސިއްޔަތުން މަޖިލީހުގެ މަސައްކަތްތަކަށް ދެއްވި ލަފައާއި އެއްބާރުލެއްވުމާއި އެހީތެރިކަމަށްޓަކައިވެސް އާޠިފާއަށް ރައިސުލްޖުމްހޫރިއްޔާ ޝުކުރުއަދާކުރެއްވިއެވެ.
ވަޒީރުންގެ މަޖިލީހުގެ މެންބަރުން ދެއްކެވި ވާހަކަފުޅުގައި، އެމަޖިލީހުގައި އެކަމަނާއާ އެކުގައި މަސައްކަތް ކުރެއްވުމަކީ، އެބޭފުޅުންނަށް ލިބިވަޑައިގެންނެވި ވަރަށްބޮޑު އުފާފުޅެއް ކަމުގައި ވިދާޅުވިއެވެ. އަދި އެކަމަނާ އެމަގާމުން އިސްތިޢުފާ ދެއްވީ ޞިއްޙީ ހާލުކޮޅު ހުރިގޮތުން އެ މަގާމުގެ ވާޖިބުތައް އަދާކުރެއްވުމަށް ޢުޒުރުވެވަޑައިގަންނަވާތީ ކަމަށްވުމާއެކު، އެކަމަނާއަށް މަޖިލީހުގެ މެންބަރުން އަވަސް ޝިފާއަކަށް އެދިވަޑައިގެންނެވިއެވެ. ހައުސިންގ މިނިސްޓަރުގެ މަޤާމުގައި ހުންނެވި އާޠިފާ އިސްތިއުފާ ދެއްވާފައިވަނީ ސިއްޙީ ޙާލުކޮޅު ތަންނުދޭތީއެވެ.
މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގައި ކޯވިޑް-19 ފެތުރުން ކުޑަކުރުމަށްޓަކައި އަޅާފައިވާ ފިޔަވަޅުތަކަށް ލުއިދިނުމުގައި ޢަމަލުކުރެއްވުމަށް ނިންމަވައިފައިވާ ގޮތްތަކާ ގުޅޭގޮތުންނާއި، އިޤްތިޞާދީ ގޮތުންނާއި އިޖުތިމާޢީގޮތުން ޤައުމު އާރާސްތުކުރުމަށް އިތުރަށް ކުރެވެންހުރި ކަންކަމާ ބެހޭގޮތުން ވެސް މަޝްވަރާ ކުރެއްވިކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއެވެ.