މިދިޔަ އަހަރުގެ އޭލެވެލް އިމްތިޙާންގެ ސެޓްފިކެޓްތައް ރާއްޖެ ގެނެސް ސެންޓަރުތަކަށް ސެޓްފިކެޓްތައް ފޮނުވަން ފަށައިފިއެވެ.
ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެ ހުންނެވި އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވީ އޭލެވެލް ސެޓްފިކެޓްތައް ރާއްޖެ ލިބުމާ ގުޅިގެން އެ ސެޓްފިކެޓްތައް މިހާރު މާލޭގެ ހުރިހާ ސެންޓަރުތަކަށް ފޮނުވަ ނިންމާފައިވާކަމަށެވެ.. އަދި އަންނަ ހަފްތާ އިން ފެށިގެން ދަރިވަރުންނަސް ސެޓްފިކެޓްތައް ދޫކުރަން ފަށާނެކަމަށާއި ނަމަވެސް ފުރަތަމަ އިސްކަންދޭނީ ސެޓްފިކެޓްތައް އަވަހަށް ބޭނުންވާ ދަރިވަރުންގެ ތެރެއިން އެކަމަށް އެދިފައިވާ ދަރިވަރުންނަށްކަމަށެވެ.
އިހްސާން ވިދާޅުވީ އަންނަ ހަފްތާގައި ރަށްރަށުގެ ސްކޫލްތަކާއި މިހާރު އެކުލަވާލާފައިވާ ޓާސްކްފޯސް އާ ގުޅިގެން ފޮނުވަން ފަށާނެކަމަށެވެ.
ސެންޓަރުތަކަށް ސެޓްފިކެޓްތައް ފޮނުވި ނަމަވެސް އެރަށަކީ މޮނިޓަރިންގެ ހާލަތުގައިވާ ރަށެއް ނަމަ ނުވަތަ ލޮކްޑައުންކޮށްފައިވާ ރަށެއްނަމަ މީގެ ކުރީ އަހަރުތަކުގައި ދަރިވަރުންނަށް ސެޓްފިކެޓްތައް ދޫކުރި އުސޫލުން ދޫނުކުރާނެ ކަމަށް އިހްސާން ވިދާޅުވިއެވެ. އަދި އެފަދަ ރަށްރަށުގައި ސެންޓަރުތަކަށް ކޮންމެ ދަރިވަރަކު ގޮސް ސެޓްފިކެޓް ނެގުމުގެ ބަދަލުގައި މި ހާލަތުގައި އަމަލުކުރާނެ ޚާއްސަ އުސޫލެއް އާއްމު ކުރާނެ ކަމަށް އިހްސާން ވިދާޅުވިއެވެ.
މިދިޔަ އަހަރުގެ އޯލެވެލް އިމްތިހާނުގެ ނަތީޖާ ސެޓްފިކެޓްތައް، އަދިވެސް ރާއްޖެ ލިބިފައިނުވާ ކަމަށާއި، ނަމަވެސް އެ ސެޓްފިކެޓްތައްވެސް ކުރިއަށް އޮތް ދެ ހަފްތާ ތެރޭގައި ލިބޭނެ ކަމަށް އިހްސާން ވިދާޅުވިއެވެ.
މިދިޔަ އަހަރުގެ އޭލެވެލް އަދި އޯލެވެލް އިމްތިޙާންގެ ސެޓްފިކެޓްތައް ރާއްޖެ ނުގެވި ލަސްވީ ކޯވިޑް-19ގެ ސަބަބުން އިނގިރޭސިވިލާތް ހިމެނޭހެން ގިނަ ޤައުމުތަކުގެ އެއާރޕޯޓްތައް ބަންދުކޮށްފައިވުމާއި ޤައުމުތައް ފުރަބަންދަށް ދިއުމުގެސަބަބުން ދިމާވި ގޮންޖެހުންތަކުގެ ސަބަބުނެވެ.
މިދިޔަ އަހަރުގެ އޯލެވެލް އިމްތިހާނުގައި ރާއްޖެއިން 5000 އަށްވުރެ ގިނަ ދަރިވަރުން ބައިވެރިވިއެވެ. އަދި އޭލްވެލް އިމްތިހާންގައި 48 ސެންޓަރުކުން 1500 އަށް ވުރެ ގިނަ ދަރިވަރުން ވަނީ ބައިވެރިވެފައެވެ.