ކޯވިޑް-19ޖެހިގެން ރާއްޖެއިން މަރުވި މީހުންގެ ޢަދަދު 2 އަށް އަރައިފިއެވެ.
އެޗްޕީއޭއިން ވިދާޅުވީ އެމީހާއަކީ ބަންގްލަދޭޝްގެ މީހެއްކަމަށާއި، އޭނާގެ ޙާލު ސީރިއަސްވެގެން ހޮސްޕިޓަލަށް ގެންގޮސްފައިވަނީ ރޭގައިކަމަށެވެ. އަދި އޭނާ ކޯވިޑް-19އަށް ޕޮޒިޓިވްވެފައިވަނީ ހޮސްޕިޓަލަށް ގެންދިޔަ ފަހުން ހެދި ޓެސްޓުންކަމަށްވެސް އެޗްޕީއޭއިން ވިދާޅުވެއެވެ.
ރާއްޖޭގައި ކޯވިޑް-19 ޖެހުނު މީހުންގެ ތެރެއިން އެންމެ ގިނައީ ބަންގްލަދޭޝްގެ މީހުންނެވެ. އެގޮތުން ރާއްޖެއިން މިހާތަނަށް މިބަލި ޖެހުނު 362 ބިދޭސީންގެ ތެރެއިން 284 މީހުންނަކީ ބަންގްލަދޭޝްގެ މީހުންނެވެ. މި ބަލި ޖެހުނު ދިވެހިންގެ އަދަދަކީ 196އެވެ.
ރާއްޖޭގައި ގިނަ އަދަދެއްގެ ބިދޭސީންނަށް ކޯވިޑް-19 ޖެހިފައިވާއިރު، މި ބަލި ފެތުރުން ކޮންޓްރޯލް ކުރުމަށްޓަކައި މާލޭގައި ބިދޭސީން ތޮއްޖެހިގެން ދިރިއުޅެމުންދާ ތަންތަނުން އެމީހުން ރައްކާތެރި ތަންތަނަށް ބަދަލުކުރުމުގެ މަސައްކަތް ސަރުކާރުން ވަނީ ފަށާފައެވެ.