ގެދޮރުވެރި ކުރުމުގެ މަޝްރޫއުގެ ދަށުން ހުޅުމާލޭގައި އަޅާ ފްލެޓްތަކަށް އެދި ފޯމް ހުށަހެޅި ފަރާތްތަކުގެ ފޯމްތައް ޑަބަލް ޗެކް ކުރުމުގެ މަސައްކަތް ހައުސިން މިނިސްޓްރީން ފަށައިފިއެވެ.ހައުސިން މިނިސްޓަރ ޑރ މުހައްމަދު މުއިއްޒު ވިދާޅުވީ، ފޯމުތައް ޑަބަލް ޗެކް ކުރަނީ ފޯމުތައް އެންޓަރ ކުރުމުގައްޔާއި މާކްސް ދިނުމުގައި އެއްވެސް މައްސަލައެއް ދިމާވެފައި އޮތްތޯ ބެލުމަށް ކަމަށާއި، އަދި އެގޮތަށް މައްސަލަ ދިމާވެ ފްލެޓް ދިނުމުގައި އިސްކަންދޭންވާ ފަރާތްތަކަށް އިސްކަން ނުދެވުންފަދަ، ކަންތައްތައް ބަލައި އެފަދަ ކަމެއް ދިމާވިޔަ ނުދިނުމަށް ކަމަށެވެ. އަދި ފޯމްތައް ޑަބަލް ޗެކް ކުރުމަށްފަހު، ގޭގެއަށް ޒިޔާރަތްކޮށް ހާލަތު ވަޒަންކުރުމުގެ މަރުހަލާ ފެށޭނެ ކަމަށްވެސް މިނިސްޓަރ ވިދާޅުވިއެވެ.ހުޅުމާލޭގައި އިމާރާތްކުރާ 1100 ފްލެޓަށް އެދި 17 ހާސް މީހުން ފޯމް ހުށަހަޅާފައިވެއެވެ.ހައުސިންގް މިނިސްޓަރ ކުރިން ވިދާޅުވެފައިވަނީ، ފްލެޓް ދޭނެ ފަރާތްތައް ހޮވުމަށް ގުރުއަތަކަށް ދިޔުމުގެ ބަދަލުގައި ގޭގެއަށް ޒިޔާރަތްކޮށްގެން ޝޯޓްލިސްޓް ކުރާނެ ކަމަށާއި، ޕޮއިންޓް އެއްވަރު ވެއްޖެ ނަމަ ގުރުއަތަކަށްވެސް ދާންޖެހިދާނެ ކަމަށެވެ.ހުޅުމާލޭގައި އަޅާ ފްލެޓް ތަކުގެ މަސައްކަތްނިމި އަންނަ އަހަރު އެ ފްލެޓް ތަކުގައި މީހުން ދިރިއުޅެން ފަށާނެ ކަމަށް ހައުސިން މިނިސްޓްރީން ވަނީ ވިދާޅުވެފައެވެ.