އިސްތިއުމާރުކޮށްފައިވާ ހުޅަނގު އައްސޭރިން ފަލަސްޠީނު ރައްޔިތުން ނެރެލުމަށްޓަކައި ޔަހޫދީ ދައުލަތުގެ ބައިވެރިވުމާއެކު ނަސްލު ނައްތާލުމުގެ ޖަރީމާތަކެއް ހިންގަމުންދާ ކަމަށް އެމްނެސްޓީ އިންޓަރނޭޝަނަލްއިން ބުނެފިއެވެ.
ޔަހޫދީން ޣައިރުޤާނޫނީ ގޮތުގައި ވެރިވެގަނެފައިވާ ހުޅަނގު އައްސޭރީގައި، ޔަހޫދީ ދައުލަތުގެ ފުރިހަމަ ވާގިވެރިކަމާއެކު ވަޒަންވެރިން ހިންގަމުންދާ ލާއިންސާނީ ޢަމަލުތަކަކީ، އެ ބިމުން ފަލަސްޠީނުގެ ރައްޔިތުން އެއްކޮށް ނެރެލުމަށް ނުވަތަ ނަސްލު ނައްތާލުމަށް ރާވައިގެން ހިންގާ ސިޔާސަތެއް ކަމަށް އިންސާނީ ޙައްޤުތަކަށް މަސައްކަތްކުރާ ބައިނަލްއަޤްވާމީ ޖަމްޢިއްޔާ، އެމްނެސްޓީ އިންޓަރނޭޝަނަލްއިން ހާމަކޮށްފިއެވެ.
އެމްނެސްޓީން އިންޒާރު ދީފައިވާ ގޮތުގައި، ބައިނަލްއަޤްވާމީ މުޖުތަމަޢުން އެކަށޭނަ ފިޔަވަޅުތަކެއް އެޅުމުގައި ނުކުޅެދިފައިވުމުގެ ނަތީޖާއެއްގެ ގޮތުން، ޣައިރުޤާނޫނީ ޔަހޫދީ ވަޒަންވެރިންގެ ހަމަލާތައް ވަނީ އިންތިހާއަށް އިތުރުވެފައެވެ.
އެގޮތުން ވޭތުވެދިޔަ ދުވަސްތަކުގައި ހުޅަނގު އައްސޭރީގެ ދަނޑުވެރިންނަށާއި، ވިލާތުގެ ޤައުމުތަކުގެ ޑިޕްލޮމެޓުންނަށާއި، އަދި އެމެރިކާގެ 'ދަ ވޮޝިންގޓަން ޕޯސްޓް' ނޫހުގެ ފޮޓޯ ނަގާ ނޫސްވެރިޔަކަށް އަމާޒުކޮށް ޔަހޫދީ ވަޒަންވެރިން ވަނީ ނުރައްކާތެރި ހަމަލާތަކެއް ދީފައެވެ.
އެމްނެސްޓީގެ މެދުއިރުމައްޗާއި އުތުރު އެފްރިކާގެ ސަރަހައްދީ ޑިރެކްޓަރު ހީބާ މޮރާޔެފް ވިދާޅުވީ، މިއީ ވަކިވަކިން ހިނގާ ހާދިސާތަކެއް ނޫން ކަމަށާއި، މިއީ ފަލަސްޠީނު މީހުން އެމީހުންގެ ވަޒަނުން ބޭރުކުރުމަށްޓަކައި ޔަހޫދީ ސަރުކާރުގެ ބައިވެރިވުމާއެކު ފުޅާ ދާއިރާއެއްގައި ހިންގަމުންދާ ނުރައްކާތެރި ހަރަކާތްތަކެއް ކަމަށެވެ.
މިފަދަ ބޮޑެތި ޖަރީމާތަކާއި ބައިނަލްއަޤްވާމީ ޤާނޫނުތަކާ ޚިލާފުވާ ޔަހޫދީ އިސް އޮފިޝަލުންނާ ދެކޮޅަށް ހަރުކަށި ދަތިކުރުމުގެ ފިޔަވަޅުތައް އެޅުމަށް އެމްނެސްޓީން ވަނީ ގޮވާލާފައެވެ. މީގެ އިތުރުން، ޣައިރުޤާނޫނީ ވަޒަންވެރިންގެ އުފެއްދުންތަކާއި އެ ސަރަހައްދުތަކާއެކު ކުރެވޭ އެންމެހައި ވިޔަފާރީގެ މުޢާމަލާތްތައް ވަގުތުން ހުއްޓާލުމަށާއި، ޔަހޫދީ އަސްކަރިއްޔާއަށް ހަތިޔާރާއި ސަލާމަތީ އާލާތްތައް ފޯރުކޮށްދިނުން މެދުކަނޑާލުމަށް ވެސް އެ ޖަމްޢިއްޔާއިން ދުނިޔޭގެ ޤައުމުތަކަށް ވަނީ އިލްތިމާސްކޮށްފައެވެ.
ފަލަސްޠީނުގެ ނިކަމެތި ރައްޔިތުންނަށް ކުރިމަތިވަމުންދާ މި އަނިޔާވެރިކަން ވަގުތުން ހުއްޓުވުމަށްޓަކައި، ބައިނަލްއަޤްވާމީ މުޖުތަމަޢުން އަވަސް އަދި ނަތީޖާ ނެރެވޭނެ ފަދަ ޢަމަލީ ފިޔަވަޅުތަކެއް އަޅަންޖެހޭ ކަމަށް އެމްނެސްޓީން ވަނީ ބާރުއަޅާފައެވެ.