ޙަބީބުއްރަޙުމާނު ދިރިއުޅޭ ހަތަރުފާރުގެ ބޭރުން ފެންނަ ހަމައެކަނި މަންޒަރަކީ ގައިދުރުކޮށްގެން ތިބުމަށް އިރުޝާދުދެމުންދާ ފާރަވެރިންނާއި އޭނާ ދިރިއުޅޭ ކޮޓަރިބަރީގައި އުޅޭ މީހުން ބޭނުންކުރާ ޢާންމުފާހާނާތައް ދޮވެ ސާފުކުރުމުގައި އަވަދިނެތި އުޅޭ މަސައްކަތު މީހުންނެވެ. ބަންގްލަދޭޝަށް އުފަން ޙަބީބުއްރަޙުމާނު ދިރިއުޅެނީ ސިންގަޕޫރުގައި ހުންނަ ބިދޭސީ މަސައްކަތްތެރިން ދިރިއުޅޭ ކޮޓަރިބަރިއެއްގައެވެ. އޭނާ ދިރިއުޅޭ ކުޑަކުޑަ ކޮޓަރީގައި އިތުރު 11 މީހުން ދިރިއުޅެއެވެ.
ސިންގަޕޫރުގައި ދިރިއުޅޭ އެތައް ހާސް ބިދޭސީ މަސައްކަތްތެރިންނެކޭ އެއްގޮތަށް 25 އަހަރުގެ ޙަބީބުއްރަޙުމާނު ސިންގަޕޫރަށް ދިޔައީ އޭނާގެ ޢާއިލާގެ ދިރިއުޅުމުގެ ޙާލަތު ރަނގަޅުކުރުމުގެ ފޮނި އުންމީދުގައެވެ. ދެކުނު އޭޝިޔާއަށް ނިސްބަތްވާ ގިނަ ޢަދަދެއްގެ ބިދޭސީން ދިރިއުޅޭ މަޝްހޫރު އެސް11 ކޮޓަރިބަރީގައި ދިރިއުޅޭ ޙަބީބުއްރަޙުމާނާއި އެތަނުގައި ދިރިއުޅޭ އެތައް ހާސް ބިދޭސީންނަށް މިއަދުވަނީ އެމީހުންގެ ތޮށްޖެހިފައިވާ ކޮޓަރިތަކުން ނުނިކުމެ ތިބުމަށް މަޖުބޫރުވެފައެވެ. ސިންގަޕޫރުގައި ކޯވިޑް-19 ޖެހިފައިވާ 8000އަށްވުރެ ގިނަ މީހުންގެ ތެރެއިން 1،977 މީހުން ދިރިއުޅެނީ އެސް11 ކޮޓަރިބަރީގައެވެ. އެހެންކަމުން ބަލިމަޑުކަން އިތުރަށް ފެތުރުނަ ނުދިނުމަށް ސަރުކާރުންވަނީ އެއްވެސް މީހަކު ކޮޓަރިތަކުން ނުނިކުތުމަށް އަންގާފައެވެ.
އެތައް ބަޔަކާއެކު ކޮޓަރިތަކުގައި ބަންދުވާން ޖެހުމުން ބިދޭސީ މަސައްކަތްތެރިންދަނީ ފޫހިކަން އިޙްސާސްކުރަމުންނެވެ. އެމީހުންތިބީ ހާސްވެ ނުތަނަވަސްވެފައެވެ.
"އަހަރެމެންގެ ތެރެއިން އެކަކަށް ބަލިމަޑުކަމުގެ އަސަރުކުރިއަސް، އަހަރެމެން އެންމެންގެ ތެރޭގައި ފަސޭހަމަކާއެކު ބަލި ފެތުރޭނެ. އަހަރެމެން މިތިބީ އަހަރެމެން ދިރިއުޅޭ ކޮޓަރިތަކުގައި ބަންދުވެގެން. އެންމެންވެސް ތިބީ ބިރުގަނެފައި. އަހަރުމެން ﷲއަށް އަޅުކަންކުރަނީ. 5 ވަގުތު ބަރާބަރަށް ނަމާދުކުރަން." ޙަބީބުއްރަޙުމާނު ކިޔާދިނެވެ.
އެސް11 ކޮޓަރިބަރީގައި ބަންގްލަދޭޝާއި އިންޑިޔާއާއި ޗައިނާއަށް ނިސްބަތްވާ 300.000އަށްވުރެ ގިނަ ބިދޭސީ މަސައްކަތްތެރިން ދިރިއުޅެއެވެ. ކޮންމެ ކޮޓަރިއެއްގައިވެސް 12އާއި 20އާ ދެމެދުގެ ޢަދަދަކަށް މީހުން ދިރިއުޅެއެވެ. އެމީހުންނަށް ދުވާލެއްގެ މައްޗަށް ލިބޭ އާމުދަނީ 20 އެމެރިކާ ޑޮލަރަށްވެސް ނާރައެވެ. އެސް11ފަދަ ތޮށްޖެހިފައިވާ ކޮޓަރިބަރިތައް ހުންނަނީ ފަތުރުވެރިން އާންމުކޮށް ޒިޔާރަތް ނުކުރާ ސަރަޙައްދުތަކުގައެވެ.
ސިންގަޕޫރުގައި ކޯވިޑް-19 ޖެހިފައިވާ މީހުންގެ ޢަދަދު ކުއްލިއަކަށް އިތުރުވެފައިވަނީ ސާފުތާހިރުކަން ކުޑަ އަދި އެހާމެ ތޮށްޖެހިފައިވާ އެފަދަ ކޮޓަރިބަރިތަކުގައި ބަލިމަޑުކަން ފެތުރެން ފެށުމުންނެވެ. އެޤައުމުގައި ކޯވިޑް-19ޖެހިފައިވާ މީހުންގެ 75 އިންސައްތަ މީހުންނަކީ އެފަދަ ކޮޓަރިބަރިތަކުގައި ދިރިއުޅޭ ބިދޭސިންނެވެ. ސިންގަޕޫރު ސަރުކާރުން އެފަދަ 19 ތަނެއްވަނީ ކަރަންޓީނުކޮށްފައެވެ. އޭގެ ސަބަބުން އެތައް ސަތޭކަ ބިދޭސީންދަނީ އިތުރު ތަކުލީފުތަކަކާ ކުރިމަތިލަމުންނެވެ.
ބިދޭސީން ދިރިއުޅޭ ތަންނަނުން ކޯވިޑް-19 ޖެހިފައިވާ މީހުން ފެންނަންފެށީ ސިންގަޕޫރުން ކޯވިޑް-19 ފެތުރުން ހުއްޓުވުމަށް އަޅާފައިވާ ހަރުދަނާ ފިޔަވަޅުތަކަށް މުޅި ދުނިޔެ ތަޢުރީފު ކުރަމުންދަނިކޮށެވެ. އިންސާނީ ހައްޤުތަކަށް މަސައްކަތްކުރާ ޖަމާޢަތްތަކުން ބުނީ ސިންގަޕޫރަށް ކުރިމަތިވެފައިވާ ޙާލަތުގެ ސަބަބުން އެޤައުމުން ބަލިމަޑުކަން ފެތުރުން ހުއްޓުވުމަށް އަޅާފައިވާ ފިޔަވަޅުތަކުގައި ހުރި މައްސަލަތައް ފާހަގަވެފައިވާ ކަމަށެވެ. އެތަންތަނުގައި އިތުރަށް ބަލިމަޑުކަން ފެތުރުން ހުއްޓުވުމަށް އެއިމާރާތްތަކުގައި ދިރުއުޅޭ އެންމެން އިމާރާތުގެ ތެރޭގައި ބަންދުކޮށް ކަރަންޓީނުކުރުމުން އެތަންތަނުގައި ތިބި މީހުންނަށް ބަލިޖެހުމުގެ ފުރުޞަތު އިތުރު ވެގެންދާނެކަމަށް ގިނަ ބަޔަކުވަނީ ފާހަގަކޮށްފައެވެ.
ޖެނުއަރީ މަހުގެ ތެރޭގައި ސިންގަޕޫރުގައި އެންމެ ފުރަތަމަ ކޯވިޑް-19 ފެތުރެންފެށުމުން ބިދޭސީ މަސައްކަތްތެރިން ދިރިއުޅޭ ތަންތަނުގައި ބަލިމަޑުކަން ފެތުރުނަނުދިނުމަށް ފިޔަވަޅުތަކެއް އަޅާފައިވާކަމަށް ސިންގަޕޫރުގެ ސަރުކާރުން ބުނެއެވެ. ނަމަވެސް އެތަންތަން ކަރަންޓީނުކުރަން ޖެހުނީ އެއިމާރާތްތަކުގައި ބަލިމަޑުކަން ފެތުރެން ފެށުމުންކަމަށް ސިންގަޕޫރުގެ ސަރުކާރުން ބުނެއެވެ. އެސް11ގައި ދިމާވެފައިވާ ޙާލަތާ ގުޅޭގޮތުން އިމާރާތުގެ ވެރިފަރާތާއި ސިންގަޕޫރުގެ ޞިއްޙަތާބެހޭ ވުޒާރާއާއި މަސައްކަތްތެރިންނާބެހޭ ވުޒާރާގެ ބަހެއް ލިބިފައެއް ނުވެއެވެ.
ސިންގަޕޫރުގައި ކޯވިޑް-19 ޖެހިފައިވާ މީހުންގެ ޢަދަދު ކުއްލިއަކަށް އިތުރުވެގެން ގޮސްފައިވީނަމަވެސް މިހާރު މެދުވެރިވެފައިވާ ޙާލަތުގެ ސަބަބުން އުނދަގޫތަކެއް ސިންގަޕޫރު ސަރުކާރަށް ކުރިމަތިވާނެކަމަށް ދުނިޔޭގެ ޞިއްޙަތު ޖަމްޢިއްޔާ، ޑަބްލިއުއެޗުއޯއިން ބުނެއެވެ. ނަމަވެސް އުނދަގޫ ތަކާއެކުވެސް ކުރިމަތިވެފައިވާ ޙާލަތުން އަރައިގަތުމުގެ ގާބިލްކަން ސިންގަޕޫރަށް ލިބިފައިވާކަމަށް އެޖަމްޢިއްޔާއިން ބުނެއެވެ.
އެސް11ގައި ދިރިއުޅޭ ބަޔަކު ރޮއިޓާރސާ ވާހަކަ ދައްކަމުން ބުނީ އެމީހުން ކޮޓަރިން ބޭރަށް ނުކުންނަނީ ހަމައެކަނި ފާހާނާ ބޭނުންކުރަން ކަމަށެވެ. އެމީހުންނަށް ބޭނުންވާ ކާބޯތަކެތި ގަޑިންގަޑިއަށް ދޮރާހަމައަށް ގެނެސްދެއެވެ. އެމީހުންގެ ވަގުތު ހޭދަކުރަނީ ފޯނުން ފިލުމު ބެލުމުގައާއި ޢާއިލާ މީހުންނަށް ގުޅައިގެން ވާހަކަދެއްކުމުގައެވެ.
ވަޒީފާ ގެއްލިދާނެކަމުގެ ބިރަށް ނަން ހާމަކުރަން ބޭނުންނުވާ ބައެއް މަސައްކަތްތެރިން ބުނީ އެމީހުން ދިރިއުޅޭ ތަނުގެ ސާރުތާހިރުކަން ވަރަށް ދަށްކަމަށާއި ރައްކާތެރިކަމުގެ ފިޔަވަޅު އާޅާފައިވާ މިންވަރާމެދު ހިތްހަމަނުޖެހޭ ކަމަށެވެ. ކޮޓަރިތަކުގެ ތެރޭގައި އަބަދު އެއްކަމެއް ކުރަން ތިބެންޖެހުމުން އެކަމުގެ ޝަކުވާވެސް އެމީހުން ކުރިއެވެ. ކޯވިޑް-19އާ ދެކޮޅަށް ސިންގަޕޫރުގެ ސަރުކާރުން އަޅާފައިވާ ފިޔަވަޅުތަކަށް އެއްބަޔަކު ތާޢީދުކުރިއެވެ. ނަމަވެސް ވާހަކަ ދެއްކި އެންމެންވެސް އެއްބަސްވާ އެއްކަމެއް އެބައޮތެވެ: ކޯވިޑް-19 ޖެހިދާނެކަމަށް އެންމެންވެސް ތިބީ ބިރުންނެވެ.
އިމާރާތްކުރުމުގެ ދާއިރާގައި މަސައްކަތްކުރާ ނަޢީމު އަޙުމަދުގެ ހިތުގައި އުފެދިފައިވާ ބިރުވެރިކަންވަނީ ހަޤީޤަތަކަށް ވެފައެވެ. ބަންގްލަދޭޝަށް ނިސްބަތްވާ 25 އަހަރުގެ ޒުވާނާއަށް ކޯވިޑް-19 ޖެހުނީ އޭނާއާ އެއްކޮޓަރިއެއްގައި ދިރިއުޅޭ މީހެއްގެ ފަރާތުންނެވެ. އޭޕްރިލް މަހުގެ 8ވަނަ ދުވަހު ހެނދުނު ހޭލެވުނީ ހުންއައިސްގެންނެވެ. އެހެންވެ އޭނާ ކަމާބެހޭ ފަރާތްތަކަށް ލަސްނުކޮށް އެކަން އެންގިއެވެ. އޭނާގެ ސާންޕަލު ނެގުމަށްފަހު ކޮޓަރިބަރިއާ ވަކިން ހުންނަ އައިސޮލޭޝަން މަރުކަޒަކަށް ބަދަލުކުރިއެވެ. އޭގެ ދެދުވަސްފަހުން އޭނާއަށް ކޯވިޑް-19 ޖެހިފައިވާކަމަށް ޞިއްޙީ ކަމާބެހޭ ފަރާތްތަކުން އެންގިއެވެ،
"އަހަންނަށް އެޚަަބަރުލިބުނު ވަގުތު ވީގޮތް ބުނެދޭންވެސް ނޭނގެ. އަހަރެން ހީކުރީ އަހަރެން ދެން މި މަރުވަނީއޭ،" ނަޢީމް ކިޔާދިނެވެ.
ނަޢީމު ބުނީ ސިންގަޕޫރުގެ ސަރުކާރުގެ ފަރާތުން ހަމަޖައްސާފައިވާ އިންތިޒާމްތަަކަށް ޝުކުރުވެރިވާކަމަށެވެ. އޭނާއަށް އެޤައުމުގެ ސަރުކާރުންވަނީ ބޭސްފަރުވާއާއި ކާބޯތަކެތި ފޯރުކޮށްދީފައެވެ. އަދި ކަރަންޓީނުގައި ތިބޭ މީހުންނަށް ބަރާބަަރަށް މުސާރަ ލިބޭނެ އިންތިޒާމުވެސް ސިންގަޕޫރުގެ ސަރުކާރުންވަނީ ހަމަޖައްސައިދީފައެވެ. ނަމަވެސް ބިދޭސީން ދިރިއުޅޭ ތޮށްޖެހިފައިވާ މާހައުލުތަކުގައި ބަލިމަޑުކަން ފެތުރުނަނުދިނުމަށް އިތުރު މަސައްކަތްތަކެއް ކުރަންޖެހޭކަމަށް ނަޢީމު ފާހަގަކުރިއެވެ.
''މިތަންތަނުގައި ބަލިމަޑުކަން ފެތުރޭތީ އަހަރެން ހައިރާނެއް ނުވޭ. މިތަންތަން މިއޮންނަނީ ތޮށްޖެހިފައި. ނުލާހިކު މުޑުދާރު. އޭގެ ހިތި ނަތީޖާ ތަހައްމަލުކުރަން މިޖެހެނީ އަހަރެމެންނަށް،" ނަޢީމް ބުންޏެވެ.