ކޯވިޑް-19ގެ އަސަރު އެންމެ ބޮޑަށްކޮށްފައިވާ ޤައުމުތަކުގެ ތެރޭގައި ހިމެނޭ ސްޕެއިންގައި އިޢުލާންކޮށްފައިވާ ފުރަބަންދުގެ އުޞޫލުތަކަށް ލުއިތަކެއް ދީފިއެވެ.
ސްޕެއިންގައި އަޅާފައިވާ ފިޔަވަޅުތަކަށް ލުއިތަކެއް ދީފައިވަނީ އެޤައުމުގައި ކޯވިޑް-19 ޖެހިގެން މަރުވާ މީހުންގެ ނިސްބަތްދަށަށްދާކަން ތަފާސްހިސާބުތަކުން ދެއްކުމުންނެވެ. ފާއިތުވި 24 ގަޑިއިރުގެ ތެރޭގައި ސްޕެއިންގައި ކޯވިޑް-19ވަނީ 2,665 މީހުންނަށް ޖެހި، 280 މީހުން މަރުވެފައެވެ. މިއީ ފާއިތުވި 3 ހަފުތާގެ ޢަދަދުތަކަށްވުރެ ދަށް ޢަދަދެކެވެ. އެޤައުމުގައި 169,496 މީހަކަށް ކޯވިޑް-19 ޖެހި، 17,489 މީހުންވަނީ މަރުވެފައެވެ.
ސްޕެއިންގެ ސަރުކާރުންވަނީ ބައެއް ވިޔަފާރިތަކުގެ މަސައްކަތް ކުރިއަށްގެންދިއުމަށް ހުއްދަދީފައެވެ. އޭގެ ތެރޭގައި ޢުމްރާނީ އަދި އުފެއްދުންތެރިކަމުގެ ސިނާޢަތްތައް ހިމެނެއެވެ. ނަމަވެސް ބައެއް ފިހާރަތަކާއި ކެފޭތަކާއި ރެސްޓޯރެންޓުތަކާއި ޢާންމުތަންތަން ބަންދުކޮށް، އޭޕްރިލް 26ވަނަ ދުވަހާ ހަމައަށް ޢާންމުންވެސް ބޭރަށް ނުނުކުތުމަށް ސްޕެއިންގެ ސަރުކާރުންވަނީ އަންގާފައެވެ.
ސްޕެއިންގެ ސަރުކާރުންވަނީ އެތެރޭގެ ދަތުރުފަތުރުކުރުމަށްވެސް ލުއިތަކެއް ދީފައެވެ. ނަމަވެސް، ޢާންމުކޮށް ކާރޫބާރޫބޮޑު ވެރިރަށް މެޑްރިޑުފަދަ ރަށްތަކުގެ މަގުތަކަށް ގިނަ ބަޔަކު ނުކުމެފައެއް ނުވެއެވެ. އަދި ޢާންމު ދަތުރުފަތުރުގައި ބޭނުންކުރާ ބަހާއި ރޭލުގެ ޚިދުމަތް ބޭނުންކުރުމުގައި ގިނަ ބަޔަކު ފަސްޖެހިފައިވާ މަންޒަރުވަނީ ފެނިފައެވެ.
ކޯވިޑް-19ގެ ސަބަބުން ގިނަ ޢަދަދެއްގެ ބައެއްގެ ވިޔަފާރިތަކަށްވަނީ ބޮޑެތި ގެއްލުންތަކެއްވެފައެވެ. އަދި 900،000 މީހުންގެ ވަޒީފާވަނީ ގެއްލިފައެވެ. އަދި ފުރަބަންދުގެ އުޞޫލުތަކަށް ލުއިތަކެއް ދީ، ބައެއް ވިޔަފާރިތައް ކުރުމުގެ ޙުއްދަދިނުމުން ބަލިމަޑުކަން ފެތުރުމުގެ މަގު އަލުން ހުޅުވިގެންދާނެކަމަށްވެސް ބައެއް ތަޖުރިބާކާރުން ބުނެއެވެ.