ދުނިޔޭގެ މަޝްހޫރު އައިސްކްރީމް ބުރޭންޑު، މޫވްއެންޕިކްގެ މާލޭގެ އައުޓްލެޓުން އައިސްކްރީމް ޑެލިވަރީގެ ހިދުމަތް ފަށައިފިއެވެ.
އައިސްކްރީމް ގޭގެއަށް ޑެލިވަރީކޮށްދިނުމަކީ ރާއްޖެއަށް އާ ޙިދުމަތެކެވެ.
މޫވްއެންޕިކްއިން ބުނީ، އައިސްކްރީމް ޑެލިވަރީ ހިދުމަތް ދޭން ފެށީ، ކޯވިޑް-19 އާއި ގުޅިގެން ގޭގައި މީހުން ތިބުމަށް އިރުޝާދު ދީފައިވާއިރު، ގޭގައި ތިބެގެންވެސް އައިސްކްރީމް ބޯން ބޭނުންވާ މީހުންނަށް އެ ކަން ފަހިކޮށްދިނުމުގެ ގޮތުން ކަމަށެވެ. އެތަނުން ފުރަބަންދު ވަގުތުގައިވެސް އައިސްކްރީމް ޑެލިވަރީކޮށްދޭނެކަމަށް މޫވްއެންޕިކްއިން ބުނެއެވެ.
މޫވްއެންޕިކްއިން ޑެލިވަރީ ހިދުމަތް ދެމުން ގެންދާނީ މާލެ އަށެވެ. ކަސްޓަމަރުންގެ ޑިމާންޑު ބޮޑުވާނަމަ ހުޅުމާލެއަށްވެސް ޑެލިވަރީ ހިދުމަތް ދިނުމަށް މޫވްއެންޕިކްއިން ތިބީ ތައްޔާރަށެވެ.
މޫވްއެންޕިކްއިން އެތައް ފްލޭވާއެއްގެ އައިސްކްރީމް ވިއްކަމުން އަންނައިރު، ޑެލިވަރީ ކޮށްދޭން ނިންމާފައި ވަނީ 9 ފްލޭވާއެކެވެ. 150 ރުފިޔާއަށް ވުރެ މަތިން އޯޑަރު ކުރާ ކޮންމެ ފަރާތެއްގެ ގޭގެ ދޮރާއްޓާއި ހަމައަށް އައިސްކްރީމް ތަށި ގެންގޮސްދާނެކަމަށް މޫވްއެންޕިކްއިން ބުނެއެވެ. އަދި މީގެ އިތުރުން ހަތަރު ވައްތަރެއްގެ ބުއިމެއްވެސް ޑެލިވަރީ ކޮށްދިނުމަށް ވަނީ ނިންމާފައެެވެ.
މޫވްއެންޕިކްއިން ހެނދުނު 11:00 އިން ރޭގަނޑު 11:00އާ ހަަމައަށް ޑެލިވަރީ ހިދުމަތް ދެމުންގެންދާއިރު، 9561012 އަށް ގުޅުއްވުމުން ޑެލިވަރީކޮށްދޭނެެއެވެ.