ކޯވިޑް-19: ހެޕީ މާކެޓު ރިޒޯޓުތަކުގެ މުވައްޒަފުންނަށް މުސާރައާއި އެކު ދެމަސްދުވަހުގެ ޗުއްޓީއެއް
ހެޕީ މަކެޓުން ހިންގާ ރިޒޯޓުތަކުގެ މުވައްޒަފުންނަށް މުސާރައާއެކު ދެމަސްދުވަހުގެ ޗުއްޓީއެއް ދިނުމަށް އެކުންފުނިން ނިންމައިފިއެވެ.
ހެޕީ މާކެޓުގެ ރިޒޯޓުތައް ހިންގާ އަންގިރި ރިޒޯޓުން އަންނަނީ ރާއްޖޭގައި 4 ރިޒޯޓެއް ހިންގަމުންނެވެ. އެއީ ތުޅާގިރި އައިލެންޑް ރިޒޯޓާއި، އަންގާގާ އައިލެންޑް ރިޒޯޓް އެންޑް ސްޕާ އާއި، ޑްރީމްލޭންޑް ދަ ޔުނީކް ސީ އެންޑް ލޭކް ރިޒޯޓު އާއި ސަފާރީ އައިލެންޑް ރިޒޯޓެވެ.
މި ހަތަރު ރިޒޯޓު ވަގުތީގޮތުން ބަންދު ކުރުމަށް ނިންމާފައިވާއިރު، މި ރިޒޯޓުތަކުގެ މުވައްޒަފުންނަށް މުސާރައާއި އެކު ދެމަސްދުވަހުގެ ޗުއްޓީއެއް ދިނުމަށް ވަނީ ނިންމާފައެވެ. އެގޮތުން ދިވެހި އަދި ބިދޭސީ މުވައްޒަފުންނަށްވެސް މުސާރައާއި އެކު ޗުއްޓީދޭނެ ކަމަށް ހެޕީ މާކެޓުން ހާމަކުރެއެވެ.
މުސާރައާއެކު ދޭ ޗުއްޓީ މިމަހުގެ ހަތަރުވަނަ ދުވަހު ފަށާނެ ކަމަށާއި، އެރިޒޯޓުތަކުގައި މަސައްކަތްކުރާ ފަރާތްތަކުން މި ފުރުސަތުގެ ބޭނުން ހިފާ އާއިލާއާއެކު ގިނަ ވަގުތު ހޭދަކުރާނެ ކަމަށް އުއްމީދު ކުރާކަމަށް ހެޕީ މާކެޓުން ހާމަކުރެއެވެ.
ހެޕީ މާކެޓަކީ ރާއްޖެއަށް ތަފާތު ބާވަތްތަކުގެ ކާބޯތަކެތި އެތެރެކޮށްގެން ހޯލްސޭލް އަދި ރީޓޭލްކޮށް ވިއްކަމުންދާ ކުންފުންޏެކެވެ. ކޯވިޑް 19 ގެ މިދަނޑިވަޅުގައި އެކުންފުނިން ވިއްކާ ބާވަތްތަކުގެ އަގު ބޮޑު ނުކުރާނެ ކަމަށް އެކުންފުނިން މީގެކުރިންވަނީ ބުނެފައެވެ.