މުސާރައާއި ޢިނާޔަތްތަކުން ޓެކްސް ނަގަންފަށައިފި

މުވައްޒަފުންގެ މުސާރައާއި ޢިނާޔަތްތަކުން ޓެކްސް ނަގަން ފަށައިފިއެވެ.

މިއީ 60،000 ރުފިޔާއަށްވުރެ ބޮޑު ޢާމްދަނީއެއް މަހެއްގެ މައްޗަށް ލިބޭ މީހުންގެ އަތުން ނަގާ ޓެކްހެކެވެ. ޢާމްދަނީން ޓެކްސް ނެގުމުގެ ޤާނޫނުގެދަށުން މުސާރައާއި ޢިނާޔަތްތައް ނޫން އެހެން ޢާމްދަނީން ޓެކްސް ނަގަން ފަށާފައިވަނީ މިދިޔަ ޖެނުއަރީ މަހުގެ 1ވަނަ ދުވަހުން ފެށިގެންނެވެ. މިއަދުން ފެށިގެން ޓެކްސް ނަގަން ފަށާފައިވަނީ މުވައްޒަފުންގެ މުސާރައާއި ޢިނާޔަތްތަކުންނެވެ.

މިދިޔަ އަހަރުގެ ޑިސެމްބަރު މަހުގެ 17ވަނަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ތަސްދީޤުކުރެއްވި އިންކަމް ޓެކްސްގެ ޤާނޫނުގެދަށުން މުސާރައިގެ ގޮތުގައި ލިބޭ ޢާމްދަނީ ނޫން އެހެން ހުރިހާ ޢާމްދަނީއަކުން ޓެކްސް ނަގަން ފެށީ މިއަހަރުގެ ޖެނުއަރީ 1ވަނަ ދުވަހުން ފެށިގެންނެވެ.

ފަރުދުންގެ މުސާރައިން ޓެކްސް ނަގާގޮތް

• 1 - 60000 އިން ދަށުގެ ޢާމްދަނީންން - %0
• 2 - 60000 އާއި 100،000 އާއި ދެމެދުގެ ޢާމްދަނީން - %5.5
• 3 - 100،000 އާއި 150،000 އާއި ދެމެދުގެ ޢާމްދަނީން - %8
• 4 - 150،000 އާއި 200،000 ދެމެދުގެ ޢާމްދަނީން - %12
• 5 - 200،000 އިން މަތީގެ އާމްދަނީން - %15

ޢާމްދަނީން ޓެކްސް ނެގުމުގެ ޤާނޫނުގެ ދަށުން ޓެކްސް ދައްކަންޖެހޭ ފަރާތްތުން ރަޖިސްޓަރީކުރަންޖެހެއެވެ. އެގޮތުން އެފަރާތްތައް ރަޖިސްޓަރީކުރުމަށް އެދި ހުށަހަޅާ ހުށަހެޅުންތައް ޖޫރިމަނާއަކާ ނުލައި ބަލައިގަންނާނެ އެންމެފަހު ތާރީޚުވަނީ ހުސްވިމަހުގެ ނިޔަލަށް ހަމަވެފައެވެ.

ރަޖިސްޓްރީކުރަންޖެހޭ ފަރާތްތަކުން ޢާމްދަނީން ޓެކްސް ނެގުމުގެ ޤާނޫނުގެދަށުން ރަޖިސްޓަރީކުރުމަށް އެދި ހުށަހަޅަންޖެހޭނީ "މީރާ 117" ޢާމްދަނީން ނަގާ ޓެކުހަށް ރަޖިސްޓަރީކުރާ ފޯމެވެ. އަދި އުޖޫރަ ދޭ ފަރާތްތަކުން، އުޖޫރަދެވޭ މީހުން ރަޖިސްޓަރީކުރުމަށް އެދި މިޤާނޫނުގެ ދަށުން ހުށަހަޅާނީ "މީރާ 118" އުޖޫރަ ލިބޭ މީހާ ރަޖިސްޓަރީކުރާ ފޯމް"އެވެ. ރަޖިސްޓްރީކުރުމަށް ހުށަހަޅާ ފޯމު މީރާގެ ވެބްސައިޓުން ޑައުންލޯޑު ކުރެވޭނެއެވެ.

މުވައްޒަފުންގެ މުސާރައިން ޓެކްސް ނަގަން ފެށުމާ ގުޅިގެން މީރާއިން މިއަދުވަނީ ޓެކްސް ފައިސާ ދައްކަން ޖެހޭ ސުންގަޑިތައް ހާމަކުރައްވާފައެވެ.