ސަޢުދީ ޢަރަބިއްޔާގެ ވެރިރަށް ރިޔާޟަށާއި އުތުރުގެ ސިޓީއެއްކަމަށްވާ ޖާޒާނަށް އަމާޒުކޮށް ދިން މިސައިލް ޙަމަލާތަކެއް ނާކާމިޔާބުކޮށްލާފައިވާކަމަށް ސަޢުދީ ޢަރަބިއްޔާއިން ބުނެފިއެވެ.
ސަޢުދީ ޢަރަބިއްޔާއަށް ޙަމަލާދީފައިވަނީ ކޮންބައެއްކަމެއް އަދި ސާފެއް ނުވެއެވެ. މިހާތަނަށް އެއްވެސް ފަރާތަކުން އެޙަމަލާގެ ޒިންމާ އުފުލާފައެއް ނުވެއެވެ.
ޔަމަނުގެ ސަރުކާރު ބަދަލުކޮށް އެގައުމަށް އަތްގަދަކުރުމަށް ހަނގުރާމަކުރަމުންދާ ހޫޘީ ޖަމާޢަތުން މީގެ ކުރިންވަނީ ސަޢުދީ ޢަރަބިއްޔާއަށް އަމާޒުކޮށް ގިނަ ޙަމަލާތަކެއްދީފައެވެ. 2019ވަނަ އަހަރުގެ ސެޕްޓެންބަރު މަހުގެ ތެރޭގައި ސަޢުދީ ޢަރަބިއްޔާގެ އާންމު ރައްޔިތުންނަށާއި އިމާރާތްތަކަށް އަމާޒުކޮށް އެޖަމާޢަތުންވަނީ ޑްރޯނާއި މިސައިލު ޙަމަލާތަކެއްދީފައެވެ.
އެޙަމަލާތައް ދިނީ ހޫޘީންކަމަށް އެޖަމާޢަތުން ބުނިނަމަވެސް ސަޢުދީ ޢަރަބިއްޔާއިންވަނީ އެޙަމަލާދިނީ އީރާނުންކަމަށް ތުޙުމަތުކޮށްފައެވެ. އެތުޙުމަތުތަކަށް އީރާނުން އިންކާރުކުރެއެވެ.