މިދިޔަ އަހަރުގެ ޑިސެންބަރު މަހު ޗައިނާގެ ވޫހާން ސިޓީގައި ފެތުރެންފެށި ކޮރޯނާ ވައިރަސް ނުވަތަ ކޯވިޑް-19ގެ ޝިކާރަޔަކަށްވެ 27,456 މީހުންވަނީ މަރުވެފައެވެ.
އެއީ އެމެރިކާއިން 1,704، އިޓަލީން 9,134، ޗައިނާއިން 3،295، ސްޕެއިނުން 5,138، ޖަރުމަނުވިލާތުން 395، އީރާނުން 2,378، ފަރަންސޭސިވިލާތިން 1،995، އިނގިރޭސިވިލާތުން 759، ސްވިޓްޒަރލޭންޑުން 237 އަދި ދެކުނު ކޮރެޔާއިން 144، ނެދަލޭންޑްސުން 546 އަދި ބެލްޖިއަމުން 289 މީހުންނެވެ. މިއީ ތަފާސް ހިސާބުތަކަށް ބަލާއިރު އެންމެ ގިނައިން މީހުން މަރުވެފައިވާ ޤައުމުތަކެވެ.
27,456 މީހުން މި ވައިރަސްޖެހިގެން މަރުވެފައިވާއިރު މި އަދަދު ދަނީ ކޮންމެ މިނެޓަކުން ބަދަލުވަމުންނެވެ. މި ވައިރަސްގެ ސަބަބުން މީހަކު އެންމެ ފުރަތަމަ މަރުވެފައިވަނީ ޖެނުއަރީ 11ގައެވެ. އެންމެ ފުރަތަމަ މަރުވެފައިވަނީ 61 އަހަރުގެ ފިރިހެނެކެވެ. ޖެނުއަރީ 22 ހަމައަށް 17 މީހުން ވަނީ ޗައިނާއިން މަރުވެފައެވެ. ޖެނުއަރީ 27 ގައި މަރުވި މީހުންގެ އަދަދު ފުރަތަމަ 100އަށް އެރިއެވެ.
ޗައިނާ ނޫން އެހެން ޤައުމަކުން ފުރަތަމަ ފަހަރަށް މީހަކު މަރުވީ ފެބްރުއަރީ 2ގައި ފިލިޕީންސްގައެވެ. ފެބްރުއަރީ 11ގައި މި ވައިރަސް ޖެހިގެން މަރުވި މީހުންގެ އަދަދު 1000އަށް އެރިއެވެ. ފެބްރުއަރީ 14ގައި ފަރަންސޭސިވިލާތުން ކޯވިޑް-19 ޖެހިގެން މީހަކު މަރުވިކަން އިއުލާނުކުރިއެވެ. މިއީ އޭޝިއާއިން ބޭރުން މީހަކު މަރުވި ފުރަތަމަ ފަހަރެވެ. މިހާ ހިސާބަށްދިޔަ އިރު ވައިރަސް ވަނީ ދުނިޔޭގެ ގިނަ ކަންކޮޅުތަކަށް ފެތުރިފައެވެ.
ފެބްރިއަރީ 18ގައި މަރުވި މީހުންގެ އަދަދު 2000އަށް އެރިއެވެ. 7 ދުވަސް ތެރޭ 1000 މީހުން މަރުވީއެވެ. މާޗް މަސް ފެށިގެން އައިއިރު ދުނިޔޭގެ ގިނަ ޤައުމުތަކަށް މި ވައިރަސްގެ ނުރައްކާ އޮތީ ކުރިމަތިވެފައެވެ. އެންމެ ކުދި ޤައުމުތަކުން ގޮސް ބޮޑެތި ތަރައްޤީވެފައިވާ ޤައުމުތަކަށްވެސް ފެތުރެން ފެށުމުން ސަރުކާރުތަކުން ވައިރަސް ފެތުރުން މަދުކުރެވޭތޯ ތަފާތު ފިޔަވަޅުތައް އަޅަން ފެށިއެވެ.
މާޗް 1ގައި މަރުވި މީހުންގެ އަދަދު 3050އަށް އިތުރުވިއެވެ. މާޗް 9ގައި 4025 މީހުން މި ވައިރަސްޖެހި ވަނީ މަރުވެފައެވެ. 8 ދުވަސް ތެރޭ 1000 މީހުން މަރުވިއެވެ. މި ވައިރަސްޖެހި މަރުވާ މީހުންގެ ނިސްބަތް އިތުރުވާން ފެށިއެވެ. އެއް ދުވަސް ތެރޭ މަރުވާ މީހުންގެ އަދަދު ގިނަވާން ފެށިއެވެ. މާޗް 27ގައި މަރުވި މީހުންގެ އަދަދު 26447އަށް އެރިއެވެ. ފެބްރުއަރީ 22ން މާޗް 22ގެ ނިޔަލަށް 14،640އަށްވުރެ ގިނަ މީހުންވަނީ މަރުވެފައެވެ. މާޗް 22ން މިއަދުގެ (27)ގެ ނިޔަލަށް 11،000އަށްވުރެ ގިނަ މީހުންވަނީ މަރުވެފައެވެ. މި ތަފާސް ހިސާބުތަކަށް ބަލާއިރު ވައިރަސްޖެހި މަރުވާ މީހުންގެ ނިސްބަތްދަނީ ދުވަހެއް ދުވަހަކަށް އިތުރުވަމުންނެވެ.
މާޗް މަހުގެ މިހާތަނަށް ކޯވިޑް19 ޖެހިގެން 23300 މީހުން ދުނިޔޭގެ އެކި ޤައުމުތަކުން މަރުވެފައިވާކަން ކޯވިޑް19ގެ ތަފާސްހިސާބުތަކުން ދައްކައެވެ. ކުރިން އެންމެ ގިނަ ބަޔަކު މަރުވި ޤައުމުގެ ގޮތުގައި ޗައިނާއޮތް ނަމަވެސް ޔޫރަޕްގެ ޤައުމުތަކުން މަރުވި މީހުންގެ އަދަދު މިހާރުވަނީ ޗައިނާއާ އަޅާބަލާއިރު ބޮޑުތަން އިތުރުވެފައެވެ.
މިބަލީގައި މިހާރު އެންމެ ގިނަ ބަޔަކު މަރުވެފައިވަނީ އިޓަލީންނެވެ. އިޓަލީގައި މި ބައްޔަށް ޕޮޒިވްވި 86498 މީހުންގެ ތެރެއިން 9134 މީހުން އެޤައުމުގައިވަނީ މަރުވެފައެވެ. ދެވަނައަށް އެންމެ ގިނަ މީހުން މިބަލީގައި މަރުވެފައިވަނީ ޔޫރަޕްގެ ޤައުމެއްކަމަށްވާ ސްޕެއިނުންނެވެ. ސްޕެއިންއިން ޕޮޒިޓިވްވި 64059 މީހުންގެ ތެރެއިން 4934 މީހުންވަނީ ކޯވިޑް19 ބަލީގައި މަރުވެފައެވެ.
މިހާރު އެންމެ ގިނަ ބަޔަކު ކޯވިޑް19 އަށް ޕޮޒިޓިވްވެފައިވާ އެމެރިކާގައި ބަލި ޖެހުނު 104,256 މީހުންގެ ތެރެއިން 1,704 މީހުންވަނީ މަރުވެފައެވެ.