ތޮށް ޖެހިފައިވާ ފަލަސްޠީނުގެ ޣައްޒާއިން ކޯވިޑް-19 ޖެހިފައިވާ ދެމީހުން ފެނިއްޖެއެވެ. އެއީ ކޯވިޑް-19 ޖެހިފައިވާ ބަޔަކު ޣައްޒާއިން ފެނުނު ފުރަތަމަ ފަހަރެވެ.
ޣައްޒާގައި ކޯވިޑް-19 ޖެހިފައިވާ ދެ މީހުންނަކީ ޕާކިސްތާނަށް ދަތުރުކުރުމަށްފަހު މިޞްރުމަގުން ޣައްޒާއަށް އެތެރެވެފައިވާ ދެމީހުންނެވެ. އެދެމީހުންވެސް މިހާރު ތިބީ ރަފާޙުގައި ޤާއިމްކޮށްފައިހުރި ކަރަންޓީނު މަރުކަޒެއްގައެވެ. ދެމީހުންގެ ޙާލުވެސް ރަނގަޅުކަމަށް ޣައްޒާގެ ޞިއްޙާތާގުޅޭ ވުޒާރާއިން ބުނެއެވެ.
ބަންދުކުރެވިފައިވާ ޣައްޒާގައި ގާތްގަނޑަކަށް ދެމިލިއަން މީހުން ދިރިއުޅެއެވެ. އޭގެ ތެރޭގައި ގިނައީ ފަޤީރުންނާއި ވަޒީފާއެއް ނެތް މީހުންނެވެ. ކޯވިޑް-19 ފެތުރުނަނުދިނުމަށް ޣައްޒާގެ މަދަރުސާތަކާއި ބާޒާރުތައްވަނީ މީގެ ދެހަފުތާކުރިން ބަންދުކޮށްފައެވެ. އަދި ޖަމާޢަތުގައި ހުކުރު ނަމާދުކުރުންވެސްވަނީ ވަގުތީގޮތުން މެދުކަނޑާލާފައެވެ.
އިސްރާޢީލުން އިސްތިޢުމާރުކޮށްފައިވާ ހުޅަނގު އައްސޭރިން ކޯވިޑް-19 ޖެހިފައިވާ 59 މީހުން މިހާތަނަށް ފެނިފައިވެއެވެ. އަދި ވައިރަހުގެ އަސަރުކޮށްފައިވާ 1،071 މީހުން އިސްރާއީލުން ފެނިފައިވެއެވެ.
އިސްރާއީލުން މިހާރުވަނީ ފަލަސްޠީނާއެކު ޙިއްސާކުރާ ސަރަޙައްދީ ރޮނގު ބަންދުކޮށްފައެވެ. ނަމަވެސް ބައެއް ބަލި މީހުންނާއި އިންސާނީ އެހީތެރިކަން ފޯރުކޮށްދޭ މީހުންނަށް ކޮންމެވެސް ވަރަކަށް ސަރަޙައްދީ ރޮނގު ހުރަސްކުރެވެއެވެ.