އެފްރިކާގެ 34 ޤައުމަކުން ކޯވިޑް-19 ޖެހުނު މީހުންގެ ޢަދަދު 640އަށް އަރާފައިވާކަމަށް އެފްރިކާ ސެންޓަރ ފޯ ޑިޒީޒް ކޮންޓްރޯލް އެންޑް ޕްރިވެންޝަން، ސީޑީސީން ބުނެފިއެވެ.
ނޫސްވެރިންނާ ވާހަކަދައްކަވަމުން އެފްރިކާ ސީޑީސީގެ ޑައިރެކްޓަރ ޖޮން އެންކެންގަސޮން ވިދާޅުވީ އެފްރިކާ ބައްރުން ވައިރަސް ޖެހުނު މީހުންގެ ޢަދަދު 640އަށް އަރާފައިވާކަމަށެވެ. ވައިރަހުގެ ސަބަބުން އެފްރިކާގެ 5 ޤައުމަކުން މަރުވި މީހުންގެ ޢަދަދު އެއްކޮށްލުމުން 16އަށް އަރާކަމަށްވެސް އޭނާ ވިދާޅުވިއެވެ. އެފްރިކާގައި ކޯވިޑް-19 ޖެހިގެން މީހުން މަރުވެފައިވަނީ އަލްޖީރިޔާއާއި ބުރުކިނާ ފާސޯއާއި މިޞްރާއި މޮރޮކޯއާއި ސޫދާނުންނެވެ.
ހަފުތާއަކަށްވުރެ ކުޑަ ދުވަސްކޮޅެއްގެ ތެރޭގައި އެފްރިކާއިން ކޯވިޑް-19 ޖެހުނު މީހުންގެ ޢަދަދު ކުއްލިއަކަށް މަތިވެގެން ގޮސްފައިވާތީ ވައިރަހުގެ ނުރައްކާތެރިކަން ހުރި މިންވަރު ވަޒަންކޮށްލަން އެނގޭކަމަށް އޭނާވަނީ ވިދާޅުވެފައެވެ. އެންމެ އިސްކަމެއްދެނީ ވައިރަސް ފެތުރުން ހުއްޓުވަންކަމަށާއި އެގޮތުން ބައްޔަށް ތަޙުލީލުކުރުމުގެ ކަންތައް ފަސޭހަކުރުން ހިމެނޭކަމަށް އެންކެންގަސޮންވަނީ ވިދާޅުވެފައެވެ. އަންނަ ހޯމަދުވަހާ ހަމައަށް އެފްރިކާގެ ޤައުމުތަކުން 60،000 މީހުން ތަޙުލީލުކުރެވޭނެ ގޮތް ހަދާނެކަމަށާއި ދެވަނައަށް އެންމެ އިސްކަމެއްދޭނީ ބަލިޖެހިގެން މީހުން މަރުވާ މިންވަރު މަދުކުރުންކަމަށްވެސް އެންކެންގަސޮން ވިދާޅުވިއެވެ.
އެފްރިކަން ޔޫނިއަންގެ ފަރާތުން މިހާރުވަނީ ސީޑީސީ މެދުވެރިކޮށް ޤައުމުތަކުގެ އެއްބާރުލުމާއެކު ޞިއްހީ ކުއްލި ނުރައްކަލުގެ ޙާލަތެއް އިޢުލާންކޮށްފައިވާކަމަށްވެސް އޭނާ ވިދާޅުވިއެވެ.