ދިވެހިރާއްޖެއިން ކުޑަކުދިންގެ ޙައްގުތައް ރައްކާތެރިކުރުމަށް ކުރާ މަސައްކަތްތަކަށް އދގެ ތަޢުރީފް
ދިވެހިރާއްޖެއިން ކުޑަކުދިންގެ ޙައްގުތައް ރައްކާތެރިކުރުމަށް ކުރާ މަސައްކަތްތަކަށް އދ.ން ތަޢުރީފްކޮށްފިއެވެ.
އދ.ން މިކަމަށް ތަޢުރީފްކުރެއްވީ މިހާރު ރާއްޖެ ވަޑައިގެންއުޅުއްވާ ސްޕެޝަލް ރެޕްރެޒެންޓޭޓިވް އޮފް ދަ ޔުނައިޓެޑް ނޭޝަންސް ސެކެޓްރީ ޖެނެރަލް އޮން ވައިލެންސް އެގެއިންސް ޗިލްޑްރަން ޑރ. މަޖަތު މައްލާ މާޖިދް، ފޮރިން މިނިސްޓަރ ޢަބްދުﷲ ޝާހިދާ ބައްދަލުކުރައްވާ ދެއްކެވި ވާހަކަފުޅުގައެވެ. މިބައްދަލުކުރެއްވުވުމުގައި ދެ ބޭފުޅުންވަނީ ކުޑަކުދިންގެ ހައްޤުތައް ކަށަވަރުކުރުުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.
މި ބައްދަލުވުމުގައި ވާހަކަފުޅުދައްކަވަމުން، ފޮރިން މިނިސްޓަރ އަބްދުﷲ ޝާހިދު ވަނީ، ރާއްޖެއިން ކުޑަކުދިންގެ ހައްޤުތައް ކަށަވަރުކޮށް އެކުދިންނަށް ރައްކާތެރިކަން ފޯރުކޮށްދިނުމަށް ކުރާ މަސައްކަތްތަކުގެ މަޢުލޫމާތު އދގެ މަންދޫބާއި ހިއްސާކުރައްވާފައެވެ. އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ވެރިކަމުގައި ކުޑަކުދިންގެ ހައްޤުތައް ކަށަވަރުކުރުމަށް ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި ކުޑަކުދިންގެ އަދުލްގެ ގާނޫނު ނުވަތަ "ޖުވެނައިލް ޖަސްޓިސް އެކްޓް" ތަސްދީގުކުރައްވައިފައިވާކަން މިނިސްޓަރ ޝާހިދު ފާހަގަކުރެއްވިއެވެ.
މީގެ އިތުރުން ކުޑަކުދިންނަށް ކުރާ އަނިޔާތަކުގެ މައްސަލަތައް ބެލުމަށް "ކުޑަ ކުދީންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަން" ގެ ނަމުގައި ރިޔާސީ ކޮމިޝަނެއް އުފައްދަވާފައިވާކަން މިނިސްޓަރ ޝާހިދު ފާހަގަކުރެއްވިއެވެ. މީގެއިތުރުން ފޮރިން މިނިސްޓަރ ޝާހިދުވަނީ، ރާއްޖެއިން ކުޑަކިދިންގެ ހައްޤުތައް ދިފާއުކުރުމައްޓަކައި ބައިނަލްއަޤްވާމީގޮތުން އެކަށައަޅާފައިވާ ޤާނޫނުތަކާއި މުޢާހަދާތަކަށް އަމަލުކުރާނެކަމުގެ ޔަޤީންކަން ދެއްވާފައެވެ. އަމި ބައްދަލުވުމުގައި ރާއްޖެއިން ކުޑަކުދިންނަށް ކުރާ އަނިޔާ އާއި ގޯނާ ރިޕޯޓްކުރުމަށް ފަސޭހަ އަދި ރައްކާތެރި މަގެއް އެކަށައެޅުމަށް ކުރާ މަސައްކަތް ފޮރިން މިނިސްޓަރ ޝާހިދު ވަނީ ހިއްސާކުރައްވާފައެވެ.
މި ބައްދަލުވުމުގައި ވާހަކަދައްކަވަމުން އދގެ ސެކެޓްރީ ޖެނެރަލްގެ މަންދޫބުވަނީ، ދިވެހިރާއްޖެއިން ކުޑަކުދިންގެ ޙައްގުތައް ރައްކާތެރިކުރުމަށް ކުރާ މަސައްކަތްތަކަށް ތަޢުރީފްކުރައްވާފައެވެ. އެގޮތުން ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނާއި ކުޑަކުދިންގެ އަދުލްގެ ގާނޫނުގެ އިތުރުން ބައިނަލްއަޤްވާމީ ޕްރޮޓޮކޯލްތަކަށް ދިވެހިރާއްޖެއިން އަމަލުކުރާގޮތައް އދގެ މަންދޫބުވަނީ ތަޢުރީފްކުރައްވާފައެވެ.
މި ބައްދަލުވުމުގައި އދ.ން ރާއްޖެއަށް ކަނޑައަޅުއްވާފައި ހުންނަވާ ދާއިމީ މަންދޫބު ކެތުރީން ހޭޒްވެލްއާއި، ޔުނިސެފްގެ މަންދޫބު މުނީރް ސަފްލިއްދީންގެ އިތުރުން ފޮރިން މިނިިސްޓްރީގެ އިސްވެރިން ބައިވެރިވެވަޑައިގެންނެވިއެވެ.
ސްޕެޝަލް ރެޕްރެޒެންޓޭޓިވް އޮފް ދަ ޔުނައިޓެޑް ނޭޝަންސް ސެކެޓްރީ ޖެނެރަލް އޮން ވައިލެންސް އެގެއިންސް ޗިލްޑްރަން، ފޮރިން މިިނިިސްޓަރާއި ބައްދަލުކުރައްވާފައިވާއިރު، އދގެ މަންދޫބުވަނީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދާވެސް ބައްދަލުކުރައްވާފައެވެ. މި ބައްދަލުވުމުގައި ދެ ކަނބަލުންވަނީ ސޯޝަލް ވޯކަރުންގެ ކެޕޭސިޓީ އިތުރުކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ.