މިއަހަރުގެ ރަމަޞާން މަސް ފެށުމުގެ ކުރިން މާވެޔޮ މިސްކިތް ނަމާދުކުރަން ހުޅުވާލާނެކަމަށް އިސްލާމިކް މިނިސްތްރިއިން ބުނެފިއެވެ.
އަންނަ އޭޕްރިލް މަހުގެ 18ގެ ކުރިން މާވެޔޮ މިސްކިތުގެ މަސައްކަތް އެއްކޮށް ނިންމައި އިސްލާމިކް މިނިސްޓްރީއާއި މިސްކިތް ހަވާލުކުރުމަށް، މަސައްކަތް ކުރާ ކުންފުންޏަށް މިނިސްޓްރީން މިހާރު ވަނީ އަންގާފައެވެ.
އަމިއްލަ ކުންފުންޏަކުން ކުރިއަށްގެންދާ މި މަޝްރޫޢުގެ މަސައްކަތް ފެށުމަށް މާވެޔޮ މިސްކިތް ބަންދުކޮށްފައި ވަނީ 2016ވަނަ އަހަރުއެވެ. އޭރު އެ މިސްކިތަކީ ހަތަރުސަތޭކައެއްހާ މީހުންގެ ޖާގައިގެ މިސްކިތެކެވެ.
މާވެޔޮ މިސްކިތް އަލުން އިމާރާތްކުރަނީ ދެހާހެއްހާ މީހުންނަށް އެއްފަހަރާ ނަމާދު ކުރެވޭނެ ޖާގައާއިއެކުއެވެ. މިސްކިތުގެ އިމާރާތް ހަދަނީ 6 ފަންގިފިލާއަށެވެ. މިސްކިތުގެ އިމާރާތުގައި ނަމާދުކުރާ ބައިގެ އިތުރުން، އިދާރީ މަސައްކަތް ކުރެވޭނެހެން ބައެއް ފަންގިފިލާތައްވަނީ ފަރުމާކޮށްފައެވެ.
މިސްކިތުގެ ސްޓަރަކްޗަރގެ މަސައްކަތްތައް ނިމި ދިގުމުއްދަތެވީނަމަވެސް، މިސްކި ނުހުޅުވި މިހާދުވަސްވީ ފިނިޝިންގް މަސައްކަތް ނިމިފައި ނުވާތީއެވެ. ނަމަވެސް މިހާރު މިސްކިތުގެ މައިގަނޑު ހުރިހާ މަސައްކަތެއްވަނީ ނިމިފައެވެ.
އިސްލާމިކް މިނިސްޓްރީއިން އެ މިސްކިތުގެ މަސައްކަތް ކުރާ ކުންފުންޏަށް އަންގާފައި ވަނީ އަންނަ މަހުގެ 18ގެ ކުރިން މިސްކިތް މިނިސްޓްރީއާއި ހަވާލުކުރުމަށެވެ. އިސްލާމިކް މިނިސްޓްރީއިން ބުނީ މިއަހަރުގެ ރަމަޟާންމަހުގެ ކުރިން މާވެޔޮ މިސްކިތް އާއްމުނަނަށް ނަމާދު ކުރެވޭނެހެން ހުޅުވާލާނެކަމަށެވެ.
މާވެޔޮ މިސްކިތުގައި ފިރިހެނުންނަށް ޚާއްސަ ބައެއްގެ އިތުރުން، އަންހެނުންނަށް ނަމާދު ކުރެވޭގޮތަށްވެސް ޚާއްސަ ބައެއް ވަނީ ހަދާފައެވެ.
މާވެޔޮ މިސްކިތް އެޅުމަށް 50 މިލިއަނަށްވުރެ ގިނަ ރުފިޔާ ހޭދަކޮށްފައިވެއެވެ.
އިސްލާމިކް މިނިސްޓްރީން ވަނީ މިދިޔަ އަހަރުގެ ރަމަޟާންމަހުގެ ކުރިންވެސް އެ މިސްކިތް ހުޅުވުމަށް މަސައްކަތްކޮށްފައެވެ.