ކޮރޯނާވައިރަސް، ކޯވިޑް-19 ފެތުރުން ހުއްޓުވުމުގެ ގޮތުން ޕާކިސްތާނުގެ އެކި ހިސާބުތަކުގައި ސްކޫލުތައް ބަންދުކޮށް އީރާނަށް ކުރާ ވައިގެ ދަތުރުތައް މެދުކަނޑާލައިފިއެވެ. ޕާކިސްތާނުގައި ދެމީހަކަށްވަނީ ކޯވިޑް-19 ޖެހިފައެވެ.
ޕާކިސްތާނާއެކު ސަރަޙައްދީ ރޮނގު ޙިއްސާކުރާ ދެޤައުމުކަމަށްވާ ޗައިނާއާއި އީރާނުގައި ވައިރަހުގެ ނުރައްކާ ބޮޑުވެފައިވީނަމަވެސް މިއީ ޕާކިސްތާނުން ވައިރަސް ފެނުނު ފުރަތަމަ ފަހަރެވެ. ޕާކިސްތާނުން އެޅި ރައްކާތެރިކަމުގެ ފިޔަވަޅެއްގެގޮތުން އެޤައުމުގެ ދެކުނުގައި އޮންނަ ކަރާޗީއާއި ސިންދު ޕްރޮވިންސުގެ ސްކޫލުތަކާއި އީރާނާ އިންވެގެން އޮންނަ ބަލުޗިސްތާން ޕްރޮވިންސުގެ ސްކޫލުތައްވަނީ ބަންދުކޮށްފައެވެ.
ޕާކިސްތާނުގައި ވައިރަސް ޖެހިފައިވާ މީހުން އެންމެ ފުރަތަމަ ފެނިފައިވަނީ ކަރާޗީއާއި ބަލުޗިސްތާނުންނެވެ. އީރާނަށް ޒިޔާރަތްކުރުމަށްފަހު އެނބުރި އައިސްފައިވާ އަށްހާސް މީހުންގެ ފަރާތުން ޕާކިސްތާނުގައި ވައިރަސް ފެތުރިދާނެކަމަށްވަނީ ބެލެވިފައެވެ.