ޓްރާންސްމޯލްޑިވިއަން އެއަރވޭސްގެ އެއަރޓެކްސީއެއް ކުރެއްދޫ އައިލެންޑް ރިސޯޓުގައި ޖެއްސުމުގެ ތެރޭގައި އެކްސިޑެންޓެއް ހިނގައިފިއެވެ.
މި ޙާދިސާ ހިންގާފައިވަނީ މިއަދު މެދުރުކުރީ 11:30ހާއިރެވެ.
މިކަމާއި ގުޅިގެން މޯލްޑިވްސް ސިވިލް އޭވިއޭޝަން އޮތޯރިޓީން ނެރުނު ނޫސްބަޔާނެއްގައި ބުނެފައި ވަނީ މި ޙާދިސާގައި ބޯޓުގެ ފަޅުވެރިއަކަށް ހާނިކަތަކެއް ލިބިފައިވާކަމަށެވެ. ނަމަވެސް ބޯޓުން ދަތުރުކުރި އެއްވެސް ފަތުރުވެރިއަކަށް ގެއްލުން ވެފައި ނުވާކަމަށް އެ އޮތޯރިޓީން ބުނެއެވެ. ބޯޓުން ދަތުރުކުރި ފަރާތްތައް ވަނީ ސަލާމަތްތެރިކަމާއިއެކު ކުރެއްދޫ އައިލެންޑް ރިސޯޓަށް ގެންގޮސްފައެވެ.
މި ޙާދިސާ ހިނގީ ވެލާނާ އިންޓަރނޭޝަނަލް އެއަރޕޯޓުން ފުރައިގެން ކުރެއްދޫ އައިލެންޑް ރިސޯޓަށް ދަތުރުކޮށް، މޫދުގައި ޖައްސަން އުޅުމުގެ ތެރޭގައެވެ. ޙާދިސާ ހިންގަން މެދުވެރިވި ސަބަބުން ސިވިލް އޭވިއޭޝަން އޮތޯރިޓީން ޙާމަކޮށްފައެއް ނުވެއެވެ. ނަމަވެސް ސޯޝަލް މީޑިއާގައި ދަތުރުވަމުން އަންނަ ފޮޓޯތަކުން ފެންނަގޮތުގައި ބޯޓުގެ އިންޖީނަށްވަނީ ބޮޑެތި ގެއްލުންތަކެއްވެފައެވެ.
މި މައްސަލަ މިހާރުދަނީ އެކްސިޑެންޓް އިންވެސްޓިގޭޝަން ކޯޑިނޭޓިންގ ކޮމިޓީންނާއި ސިވިލް އޭވިއޭޝަން އޮތޯރިޓީން ތަޙްޤީގުކުރަމުންނެވެ.
މީގެކުރިންވެސް ރާއްޖޭގައި ސީޕްލޭންތައް ވެއްޓުމުގެ ޙާދިސާތައް ހިންގާފައެވެ.
ދިވެހިރާއްޖެއަކީ ދުނިޔޭގައި ސީޕްލޭންގެ ޚިދުމަތް އެންމެ ފުޅާދާއިރާއެއްގައި ދެމުން އަންނަ ޤައުމެވެ. ރާއްޖޭގައި މި ޚިދުމަތް މައިގަނޑުގޮތެއްގައި ދެމުން އަންނަނީ ރިސޯޓްތަކަށް ފަތުރުވެރިން އުފުލުމަށެވެ.