ހިމަބިހިން ރައްކާތެރިވުމަށް ވެކްސިން ދިނުމުގެ ޤައުމީ ކެމްޕޭން ފަށައިފި

މީސްލްސްއާއި ރުބެއްލާގެ ޤައުމީ ވެކްސިން ޕްރޮގްރާމް "މަވެސް ޖަހައިފިން" ރަސްމީކޮށް ފަށައިފިއެވެ. މިރަސްމިއްޔާތުގައި މިނިސްޓްރީ އޮފް ހެލްތާއި މިނިސްޓްރީ އޮފް އެޑިއުކޭޝަނާއި ޑަބްލިއުއެޗްއޯ އަދި ޔުނިސެފްގެ އިސްވެރިންވަނީ ބައިވެރިވެވަޑައިގަންނަވާފައެވެ.

އަމީނިއްޔާ ސްކޫލުގައި ބޭއްވި ޚާއްސަ ރަސްމިއްޔާތެއްގައި މީސްލްސް އަދި ރުބެއްލާގެ ޤައުމީ ވެކްސިންގ ކެމްޕެއިން "މަވެސް ޖަހައިފިން" ފަށްޓަވައިދެއްވީ މިނިސްޓަރ އޮފް ހެލްތު ޢަބްދުﷲ އަމީނެވެ.

މިރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ހެލްތު މިނިސްޓަރ ޢަބްދުﷲ އަމީން ވިދާޅުވީ މިހާރު މަސައްކަތް ކުރަމުންމިދަނީ ރާއްޖެއިން މުޅިން ނައްތާލެވިފައިވާ ބައްޔަކާ ދެކޮޅަށް ކަމަށެވެ. މިފަދަ ނުރައްކާތެރި އެތައް ބައްޔަކާ ދެކޮޅަށް ރާއްޖޭއިން މަސައްކަތްކޮށް ބޮޑެތި ކާމިޔާބީތަކެއް ހޯދާފައިވަނީ މިހާރު ހުރި ވަޞީލަތްތައް ނެތް، ދަތުރުފަތުރު ކުރުމުގައި ގިނަ ގޮންޖެހުން ހުރި ޒަމާނެއްގައިކަން ފާހަގަކުރައްވާ މިނިސްޓަރ ވިދާޅުވީ މިކެމްޕެއިނުގެ ޒަރިއްޔާއިން މިކަމުން ރާއްޖެ އަރައިގަންނާނެކަމަށެވެ. އެހެންކަމުން ވެކްސިންދިނުމަށް ހުރިހާ ފަރާތަކުންވެސް ޚާއްސަ އިސްކަމެއް ދެއްވުމަށް މިނިސްޓަރ ވަނީ އިލްތިމާސްކުރައްވާފައެވެ. ވެކްސިންގ ދިނުމުގެ ޤައުމީ ކެމްޕޭން ނިމޭއިރު ރާއްޖޭގެ ހުރިހާ ސްކޫލެއްގައި ތިބި ހުރިހާ ކުދިންނަށް ވެކްސިން ދެވިފައިވާކަން ކަށަވަރުކުރާނެކަމަށްވެސް ހެލްތު މިނިސްޓަރ ވިދާޅުވިއެވެ.

"ވެކްސިން ޖެހުމާ ގުޅޭގޮތުން އެއްވެސް ބޭފުޅަކު ފަރުވާކުޑަ ނުކޮށް މިކަން ކުރިއަށް ގެންދިޔުމަށް އަޅުގަނޑު އިލްތިމާސްކުރަން. މިއީ ހަމައެކަނި ތިމާ ގެ ރައްކާތެރިކަމަށް ކުރާ ކަމެއްކަމުގައި ނުދެކި މިއީ މުޅި މުޖުތަމަޢުގެ ރައްކާތެރިކަމާއި ގުޅިފައިވާކަމެއްގެ ގޮތުގައި ހުރިހާ ބޭފުޅުންވެސް ދެކެވަޑައިގަތުމަކީ އަޅުގަނޑުގެ ވަރަށް ބޮޑު އިލްތިމާސެއް." އަމީން ވިދާޅުވިއެވެ.

މިރަސްމިއްޔާތުގައި ވާހަކަފުޅުދައްކަވަމުން މިނިސްޓްރީ އޮފް އެޑިއުކޭޝަންގެ ސްޓޭޓް މިނިސްޓަރ ފާތުމަތު ނަސީރު ވިދާޅުވީ ކާމިޔާބު ޖީލެއް ބިނާކުރެވޭނީ ސިއްޙީ ގޮތުން ދުޅަހެޔޮބަޔަކަށް ދަރިވަރުން ހެދިގެންކަމަށެވެ. އެހެންކަމުން ވެކްސިން ދިނުމަށް ހުރިހާ ބެލެނިވެރިންގެ ޒިންމާއެއްކަމުގައި ދެކެވަޑައިގެން އެކަމުގައި އެއްބާރުލުން ދެއްވުމަށް ސްޓޭޓް މިނިސްޓަރވަނީ އެދިވަޑައިގަންނަވާފައެވެ.

ކުރިއަށް އޮތް 3 މަހަށް އަމާޒުކޮށްގެން ޢުމުރުން 40 އަހަރުން ދަށުގެ ހުރިހާ މީހަކަށާއި ސްކޫލްތަކުގެ ހުރިހާ ދަރިވަރުންނަށް ވެކްސިން ދިނުމުގެ ޤައުމީ ކެމްޕޭން މާލޭގައި ފެށިނަމަވެސް ކުރިއަށް އޮތް ދުވަސްތަކުގައި އަތޮޅުތެރޭގައިވެސް ވެކްސިންގ ދިނުމުގެ ކަންކަން ކުރިއަށްގެންދާނެކަމަށް ހެލްތު މިނިސްޓްރީން ވިދާޅުވެއެވެ. މިޕްރޮގްރާމުގެ ދަށުން ސްކޫލް ދަރިވަރުންނާއި ޓީޗަރުންނާއި ސްކޫލް މުވައްޒަފުންނަށް ވެކްސިން ދިނުމަށްވަނީ ހަމަޖެހިފައެވެ.

މާލޭގައި ވެކްސިން ދިނުމުގެ ކަންކަން ކުރިއަށް ގެންދާނީ ހުކުރު ދުވަސް ނޫން ކޮންމެދުވަހަކު ސޯޝަލް ސެންޓަރުގައި އެދުވަހެއްގެ މެންދުރު 14:00އިން ފެށިގެން ހަވީރު 17:00އާ ހަމައަށެވެ. އަދި ދަމަނަވެށީގައި ސަރުކާރު ބަންދު ދުވަސްތައް ފިޔަވާ ކޮންމެ ދުވަހެއްގެ ހެނދުނު 8:15 އިން މެންދުރުފަހު 13:30އާ ހަމައަށް ވެކްސިން ދިނުމަށްވަނީ ހަމަޖެހިފައެވެ.

މީގެ އިތުރުން ހޮނިހިރު ދުވަހުގެ މެނދުރުފަހު 14:00އިން ފެށިގެން ހަވީރު 17:00އަށްވެސް ދަމަނަވެށީގައި ވެކްސިން ދިނުމަށްވަނީ ހަމަޖެހިފައެވެ. ހުޅުމާލޭގައި ވެކްސިން ދިނުން ކުރިއަށްދާނީ އެޗްޑީސީގެ ތިރީގައި ސަރުކާރު ބަންދު ނޫންކޮންމެ ދުވަހެއްގެ ހެނދުނު 9އިން މެންދުރުފަހު 15:00 ޖެހުމާއި ހަމައަށެވެ. ވިލިމާލޭ ފެރީ ޓަރމިނަލްގައި ކޮންމެ ހުކުރު ދުވަސް ފިޔަވާ ކޮންމެ ދުވަހެއްގެ ހަވީރު 16:00އިން އިރުއޮއްސި 18:00އާ ހަމައަށް ޢުމުރުން 40 އަހަރުގެ ދިވެހިންނަށް ވެކްސިން ދިނުމުގެ އިންތިޒާމުވަނީ ހަމަޖައްސާފައެވެ.

2017ވަނަ އަހަރު އެއްކޮށް ނައްތާލާފައިވާ މިބަލި މިއަހަރުގެ ޖެނުވަރީ މަހު ފެނުނުފަހުން މިހާތަނަށް ދިހަހާހަށްވުރެ ގިނަ މީހުންނަށްވަނީ ވެކްސީންދީފައިކަމަށް ހެލްތު މިނިސްޓްރީން ވިދާޅުވެއެވެ.